டிஜிட்டல் நிதி மோசடியில் சிக்கும் உயர் அதிகாரிகள்: ஐஐடி மெட்ராஸ் நடத்திய அதிர்ச்சிகரமான ஆய்வு

ஐஐடி மெட்ராஸ் நடத்திய ஆய்வில் மருத்துவர்கள் மற்றும் வங்கியாளர்களும் சைபர் குற்றங்களுக்கு உள்ளாவது உறுதி செய்யப்பட்டுள்ளது.

இந்தியாவில் அதிகரித்து வரும் டிஜிட்டல் நிதி மோசடிகள் குறித்த ஐஐடி மெட்ராஸ் ஆராய்ச்சியாளர்களின் சமீபத்திய ஆய்வு, சமூகத்தில் நிலவும் பொதுவான கருத்துக்களை உடைத்துள்ளது. இதுவரை இத்தகைய மோசடிகளில் கல்வியறிவு இல்லாதவர்கள் அல்லது கவனக்குறைவாக இருப்பவர்கள் மட்டுமே சிக்கி வருவதாகக் கருதப்பட்டது. ஆனால், இந்த ஆய்வின் முடிவுகள் ஐடி வல்லுநர்கள், மருத்துவர்கள், வங்கி அதிகாரிகள் மற்றும் நிதி மேலாண்மைத் துறையில் பணியாற்றும் நிபுணர்கள் கூட இந்த வலையில் வீழ்வதை உறுதிப்படுத்தியுள்ளன. சைபர் பாதுகாப்புத் துறையில் தகுதியுடையவர்கள் கூட மோசடிக்கு இரையாவது சமூகத்தில் பெரும் விவாதத்தை ஏற்படுத்தியுள்ளது.

இந்த ஆய்வை ஐஐடி மெட்ராஸின் ஆராய்ச்சியாளர்களான பி.கந்தசாமி மற்றும் நந்தன் சுதர்சனம் ஆகியோர், ஆகாங்கா ஜெயஸ்வால் மற்றும் அமீதா பெர்னாண்டோ ஆகியோருடன் இணைந்து மேற்கொண்டனர். சென்னை, பெங்களூரு, ஹைதராபாத், டெல்லி மற்றும் மும்பை உள்ளிட்ட நகரங்களில் பாதிக்கப்பட்ட 33 நபர்களிடம் மேற்கொள்ளப்பட்ட நேர்காணல்களின் அடிப்படையில் இந்தத் தகவல்கள் தொகுக்கப்பட்டுள்ளன. இதில் 12 மூத்த குடிமக்களும் அடங்குவர். இந்த ஆய்வு முடிவுகள் புகழ்பெற்ற ஸ்பிரிங்கர் நேச்சர் இதழான 'ஹ்யூமானிட்டீஸ் அண்ட் சோஷியல் சயின்சஸ் கம்யூனிகேஷன்ஸ்' என்ற ஆய்விதழில் வெளியிடப்பட்டுள்ளன.

ஆய்வின் முக்கியக் கண்டுபிடிப்புகளாக நான்கு முக்கிய பலவீனங்கள் அடையாளம் காணப்பட்டுள்ளன. எதிர்பாராத ஆதாயம் கிடைக்குமோ என்ற பேராசை, பயம், விழிப்புணர்வு இல்லாமை மற்றும் சுயமரியாதைக்குக் குந்தகம் விளைவிக்கும் மிரட்டல்கள் ஆகியவை மோசடி நபர்களால் ஆயுதங்களாகப் பயன்படுத்தப்படுகின்றன. முதலீடு மற்றும் பங்குச் சந்தை மோசடிகள், பணி தொடர்பான மோசடிகள், டிஜிட்டல் பரிவர்த்தனை மோசடிகள், மால்வேர் தாக்குதல்கள் மற்றும் டிஜிட்டல் கைது என்ற புதிய வகை மிரட்டல்கள் மூலம் இந்த மோசடிகள் அரங்கேற்றப்படுகின்றன. குறிப்பாக, ஆதார் மற்றும் யுபிஐ பரிவர்த்தனைகளைப் பயன்படுத்தி இந்தியாவில் நடைபெறும் தனித்துவமான மோசடி உத்திகளை இந்த ஆய்வு சுட்டிக்காட்டியுள்ளது.

இந்திய சைபர் குற்ற ஒருங்கிணைப்பு மையத்தின் தரவுகள் பெரும்பாலும் நிதி இழப்புகளை மட்டுமே ஆவணப்படுத்துகின்றன. ஆனால், இந்த நிதி இழப்பு பாதிக்கப்பட்ட மனிதர்களின் மனநிலையில் ஏற்படுத்தும் பாதிப்புகளைப் பற்றி விரிவாகப் பேசவில்லை என்பதை ஆராய்ச்சியாளர்கள் சுட்டிக்காட்டுகின்றனர். படித்தவர்கள் மற்றும் உயர் பதவிகளில் இருப்பவர்கள் கூட இந்த மோசடிகளில் சிக்கித் தவிப்பது, சைபர் பாதுகாப்பு குறித்த நமது அணுகுமுறையை மாற்ற வேண்டியதன் அவசியத்தை உணர்த்துகிறது. டிஜிட்டல் யுகத்தில் நிதிப் பாதுகாப்பை உறுதி செய்யத் தொழில்நுட்ப அறிவு மட்டும் போதாது, இத்தகைய நவீன மோசடி உத்திகள் குறித்த விழிப்புணர்வு மிக அவசியம் என்பதை இந்த ஆய்வு வலியுறுத்துகிறது.