இந்திய ஓபன் பேட்மிண்டன் போட்டி: காற்று மாசுபாடு குறித்து பி.டபிள்யூ.எப் முக்கிய விளக்கம்

டெல்லியில் நிலவும் காற்று மாசுபாட்டைக் கருத்தில் கொண்டு, இந்திய ஓபன் பேட்மிண்டன் போட்டியை மாற்றியமைப்பது குறித்து பரிசீலிப்பதாக உலக பேட்மிண்டன் கூட்டமைப்பு தெரிவித்துள்ளது.

தலைநகர் டெல்லியில் நிலவும் கடுமையான காற்று மாசுபாடு காரணமாக, அங்கு நடைபெறும் இந்திய ஓபன் பேட்மிண்டன் தொடரில் பங்கேற்கும் வீரர்கள் மற்றும் வீராங்கனைகள் தொடர்ந்து கவலை தெரிவித்து வருகின்றனர். குறிப்பாக, ஆட்டத்தின் போது வீரர்களின் ஆரோக்கியம் பாதிக்கப்படுவது குறித்து சர்வதேச அளவில் விவாதங்கள் எழுந்துள்ளன. இதனைத் தொடர்ந்து, பி.டபிள்யூ.எப் எனப்படும் உலக பேட்மிண்டன் கூட்டமைப்பு தனது 2027 மற்றும் 2028-ஆம் ஆண்டுகளுக்கான கால அட்டவணையை வெளியிட்டபோது, இந்திய ஓபன் தொடரை பிப்ரவரி மாதத்திற்கு (பிப்ரவரி 2 முதல் 7 வரை) தற்காலிகமாக மாற்றி அமைத்தது.

இருப்பினும், இந்த மாற்றமானது 2027-ஆம் ஆண்டு சீசனுக்கு மட்டுமே பொருந்தும் என்பதால், இது நிரந்தரத் தீர்வாக இருக்குமா என்ற கேள்வி எழுந்துள்ளது. இது தொடர்பாக பி.டபிள்யூ.எப் பொதுச் செயலாளர் தாமஸ் லண்ட் கூறுகையில், தற்போதைய சூழலில் கால அட்டவணையில் பெரிய மாற்றங்களைச் செய்வது கடினமான ஒன்று என்று தெரிவித்தார். டெல்லியில் நடைபெறும் தற்போதைய உலக சாம்பியன்ஷிப் தொடரின் போது செய்தியாளர்களிடம் பேசிய அவர், வரவிருக்கும் மாதங்களில் அனைத்து தரவுகளையும் விரிவாக ஆய்வு செய்து, எதிர்காலத்தில் கூடுதல் வாய்ப்புகளை பரிசீலிக்கத் தயாராக இருப்பதாக உறுதி அளித்தார்.

டென்மார்க் நாட்டைச் சேர்ந்த வீரர்களான ஆண்டர்ஸ் ஆன்டன்சென் மற்றும் மியா பிளிச்ஃபெல்ட் ஆகியோர் டெல்லியின் காற்று மாசுபாடு குறித்து தொடர்ச்சியாகத் தங்களது அதிருப்தியைப் பதிவு செய்து வருகின்றனர். குறிப்பாக, ஆன்டன்சென் காற்று மாசுபாடு குறித்த கவலை காரணமாக அபராதம் செலுத்தியும் கடந்த மூன்று தொடர்களைத் தவிர்த்துள்ளார். பிப்ரவரி மாதத்திற்குப் போட்டி மாற்றப்பட்டாலும், தனது பங்கேற்பு குறித்து அவர் இன்னமும் உறுதியான முடிவை எடுக்கவில்லை என்பது குறிப்பிடத்தக்கது. உள்ளூர் மற்றும் உள்நாட்டு விளையாட்டு நிகழ்வுகளின் சிக்கல்கள் காரணமாகவே போட்டியை முழுமையாக வேறு இடத்திற்கு மாற்றவோ அல்லது தேதியைத் தள்ளி வைக்கவோ இயலவில்லை என்று பி.டபிள்யூ.எப் தரப்பில் விளக்கம் அளிக்கப்பட்டுள்ளது.

தாமஸ் லண்ட் மேலும் குறிப்பிடுகையில், வீரர்கள் மற்றும் வீராங்கனைகளின் ஆரோக்கியம் மற்றும் நலனில் பி.டபிள்யூ.எப் மிகுந்த அக்கறை கொண்டுள்ளது என்று தெரிவித்தார். இந்தியாவின் பேட்மிண்டன் சந்தை மிகவும் முக்கியமானது என்பதால், இந்திய ஓபன் தொடரை மிக உயர்ந்த தரத்தில் தொடர்ந்து நடத்த விரும்புவதாகவும் அவர் கூறினார். வீரர்களின் கோரிக்கைகளை ஏற்று, வரும் ஆண்டுகளில் போட்டிக்கான கால அட்டவணையில் மேலும் சில முன்னேற்றங்களைச் செய்யத் திட்டமிட்டுள்ளதாகவும், விளையாட்டின் நலன் கருதி வீரர்கள் தொடர்ந்து ஒத்துழைப்பு வழங்க வேண்டும் என்றும் அவர் கேட்டுக்கொண்டார்.