உலக தடகளப் போட்டி: இந்தியாவின் ஒடிசாவில் நடக்கவுள்ள பிரம்மாண்டமான காண்டினென்டல் டூர் சில்வர் மெய்

ஒடிசா மாநிலம் புவனேஷ்வரில் ஆகஸ்ட் 22-ம் தேதி உலக தடகள காண்டினென்டல் டூர் சில்வர் மெய் போட்டியினை நடத்த உள்ளது.

இந்தியாவின் விளையாட்டுத் துறையில் முன்னோடி மாநிலமாகத் திகழும் ஒடிசா, தனது விளையாட்டு வரலாற்றில் மற்றுமொரு முக்கிய மைல்கல்லை எட்டத் தயாராகி வருகிறது. வருகிற ஆகஸ்ட் 22-ம் தேதி, புவனேஷ்வரில் உள்ள புகழ்பெற்ற கலிங்கா மைதானத்தில், இந்தியன் ஓபன் உலக தடகள காண்டினென்டல் டூர் சில்வர் மெய் (World Athletics Continental Tour Silver Meet) போட்டி மிக விமரிசையாக நடைபெற உள்ளது. ஒடிசா மாநில அரசின் விளையாட்டு மற்றும் இளைஞர் நலத்துறை, இந்திய தடகள கூட்டமைப்புடன் இணைந்து இந்த சர்வதேச விளையாட்டு நிகழ்வை முன்னெடுக்கிறது.

கடந்த ஆண்டு ஆகஸ்ட் மாதம் இதே மைதானத்தில் வெண்கல நிலை (Bronze Level) தடகளப் போட்டிகள் நடத்தப்பட்ட நிலையில், இந்த ஆண்டு அது சில்வர் நிலைக்கு உயர்த்தப்பட்டுள்ளது என்பது குறிப்பிடத்தக்கது. இந்த ஒருநாள் தடகளப் போட்டியில் உலகம் முழுவதிலுமிருந்து 27 நாடுகளைச் சேர்ந்த 187 முன்னணி வீரர், வீராங்கனைகள் பங்கேற்கின்றனர். இதில் 12 ஆசிய நாடுகளைச் சேர்ந்த 143 விளையாட்டு வீரர்கள் களம் காண்கிறார்கள். சர்வதேச வீரர்களுடன் இணைந்து 88 இந்திய தடகள வீரர்களும் தங்களது திறமையை வெளிப்படுத்த உள்ளனர். முக்கியமாக இலங்கை, தென்னாப்பிரிக்கா மற்றும் பிரேசில் நாட்டு அணியினர் இந்தத் தொடரில் அதிக எண்ணிக்கையிலான வீரர்களைக் களமிறக்குகின்றனர்.

இந்த சர்வதேச நிகழ்வு குறித்து ஒடிசா மாநில விளையாட்டுத்துறை இயக்குநர் விஜய் யெடுல்லா கூறுகையில், சில்வர் நிலைக்கு இப்போட்டியை தரம் உயர்த்தியது ஒடிசாவின் தடகள உள்கட்டமைப்பிற்கு கிடைத்த மிகப்பெரிய அங்கீகாரம் என்று தெரிவித்தார். மேலும், இளம் தலைமுறையினரை ஊக்குவிக்கும் வகையிலும், விளையாட்டு ரசிகர்களுக்கு உலகத்தரம் வாய்ந்த போட்டிகளை நேரடியாகக் காணும் வாய்ப்பை வழங்கும் விதமாகவும், கலிங்கா மைதானத்தில் போட்டிகளைக் காண பொதுமக்களுக்கு இலவச அனுமதி வழங்கப்பட்டுள்ளதாக அவர் குறிப்பிட்டார். இது விளையாட்டுப் பிரியர்களிடையே பெரும் வரவேற்பைப் பெற்றுள்ளது.

இந்தத் தொடரில் பங்கேற்கும் வீரர்களில் 36 பேர் உலக தடகள தரவரிசையில் முதல் 50 இடங்களுக்குள் உள்ளனர் என்பது இதன் சிறப்பம்சமாகும். பாரிஸ் 2024 ஒலிம்பிக் போட்டியில் 400 மீட்டர் ஓட்டத்தில் வெண்கலப் பதக்கம் வென்ற முசாலா சமுகோங்கா, நைஜீரியாவின் புகழ்பெற்ற குண்டு எறிதல் வீரர் சுக்வேபுகா எனெக்வெச்சி உள்ளிட்ட உலகத்தரம் வாய்ந்த நட்சத்திரங்கள் பங்கேற்கின்றனர். ஆண்கள் பிரிவில் 100மீ, 400மீ, 800மீ, 5000மீ, 110மீ தடைகளைத் தாண்டி ஓடுதல், உயரம் தாண்டுதல், நீளம் தாண்டுதல், குண்டு எறிதல் மற்றும் ஈட்டி எறிதல் ஆகிய ஒன்பது பிரிவுகளிலும், பெண்கள் பிரிவில் 100மீ, 400மீ, 1500மீ, 5000மீ, 100மீ தடைகளைத் தாண்டி ஓடுதல், உயரம் தாண்டுதல், நீளம் தாண்டுதல், வட்டு எறிதல் மற்றும் ஈட்டி எறிதல் ஆகிய ஒன்பது பிரிவுகளிலும் போட்டிகள் நடைபெறும்.