ஆசிய விளையாட்டுப் போட்டிக்கு முன்பாக இந்திய மல்யுத்த அணிக்கு ஊக்கமருந்து சோதனை அதிர்ச்சி

2026 ஆசிய விளையாட்டுப் போட்டியில் பங்கேற்க இருந்த இந்திய மல்யுத்த வீரர் முகுல் தஹியா, ஊக்கமருந்து சோதனையில் சிக்கியதால் இடைநீக்கம் செய்யப்பட்டுள்ளார்.

ஜப்பான் நாட்டில் நடைபெறவுள்ள 2026 ஆசிய விளையாட்டுப் போட்டிகளுக்குத் தயாராகி வரும் இந்திய மல்யுத்த அணிக்கு, ஊக்கமருந்து விவகாரம் பெரும் பின்னடைவை ஏற்படுத்தியுள்ளது. 86 கிலோ எடைப்பிரிவில் இந்தியாவிற்காகப் பதக்கம் வெல்வார் என்று எதிர்பார்க்கப்பட்ட மல்யுத்த வீரர் முகுல் தஹியா, ஊக்கமருந்து சோதனையில் சிக்கியுள்ளார். மெஃபென்டெர்மின் (Mephentermine) எனும் ஊக்கமருந்து உட்கொண்டதாகக் கண்டறியப்பட்டதை அடுத்து, அவரை தேசிய ஊக்கமருந்து தடுப்பு முகமை (NADA) உடனடியாக இடைநீக்கம் செய்து உத்தரவிட்டுள்ளது. இச்சம்பவம் விளையாட்டு வட்டாரங்களில் பெரும் அதிர்ச்சியை ஏற்படுத்தியுள்ளது.

தற்போது ஆர்மீனியாவில் உள்ள யெரெவன் நகரில், ஆசிய விளையாட்டுப் போட்டிகளுக்காக இந்திய மல்யுத்த அணியினர் தீவிர பயிற்சியில் ஈடுபட்டு வருகின்றனர். முகுல் தஹியாவும் இந்தப் பயிற்சி முகாமில் பங்கேற்றிருந்த நிலையில், இந்தத் தகவல் வெளியாகியுள்ளது. ஏற்கனவே 2026 ஆசிய சாம்பியன்ஷிப் தொடரில் வெள்ளிப் பதக்கம் வென்று சிறந்து விளங்கிய முகுல் தஹியாவின் இந்த இடைநீக்கம், இந்திய மல்யுத்தக் குழுவின் பதக்க எதிர்பார்ப்புகளைப் பாதிக்கும் என்று கருதப்படுகிறது. குறிப்பாக, இந்திய மல்யுத்த கூட்டமைப்பிற்கு (WFI) முன்கூட்டியே தகவல் அளிக்கப்படாதது குழப்பத்தை உருவாக்கியுள்ளது.

இந்திய மல்யுத்த கூட்டமைப்பின் தகவல்படி, கடந்த ஆகஸ்ட் 4-ம் தேதியே ஊக்கமருந்து சோதனை முடிவுகள் குறித்த பட்டியல் புதுப்பிக்கப்பட்டிருந்தும், கூட்டமைப்பிற்கு உரிய நேரத்தில் தகவல் தெரிவிக்கப்படவில்லை. முகுல் தஹியாவின் இடைநீக்கத்தால், ஆசிய விளையாட்டுப் போட்டியில் 86 கிலோ எடைப்பிரிவில் இந்தியாவைப் பிரதிநிதித்துவப்படுத்த எந்த வீரரும் இல்லாத சூழல் உருவாகியுள்ளது. இதற்கு முன்பு இதே பிரிவில் தேர்வாகியிருந்த தீபான்ஷு என்பவரும் ஊக்கமருந்து சோதனையில் சிக்கியதால், அவருக்குப் பதிலாக ரோனக் தஹியா சேர்க்கப்பட்டிருந்தது குறிப்பிடத்தக்கது. ஆனால், இறுதிப்பட்டியல் ஏற்கனவே இந்திய ஒலிம்பிக் சங்கத்திடம் ஒப்படைக்கப்பட்டுவிட்டதால், முகுலுக்குப் பதிலாக மாற்று வீரரை அனுப்புவது தற்போது சாத்தியமற்றதாக மாறியுள்ளது.

மெஃபென்டெர்மின் என்பது குறைந்த இரத்த அழுத்தத்தைச் சீரமைக்க மருத்துவ ரீதியாகப் பயன்படுத்தப்படும் ஒரு மருந்தாகும். இது இதயத் துடிப்பைத் தூண்டி இரத்த நாளங்களைச் சுருக்கி இரத்த அழுத்தத்தை நிலைப்படுத்துகிறது. பயிற்சியாளர்கள் தெரிவிக்கும் தகவலின்படி, முகுல் தஹியா கடந்த சில நாட்களாகப் பயிற்சியில் ஈடுபடாமல் உடல்நலக் குறைவுடனும் சோர்வுடனும் காணப்பட்டுள்ளார். ஊக்கமருந்து சோதனையின் முடிவு அவருக்கு முன்னரே தெரிந்திருக்கலாம் என்று கருதப்படுகிறது. முன்னதாக, பொதுநலவாய விளையாட்டுப் போட்டிகளின் போதும் இதே போன்று தகுதியிழப்பு ஏற்பட்டு இந்திய அணியின் பிரதிநிதித்துவப் பங்கு குறைக்கப்பட்டிருந்தது, தற்போது அதே போன்றதொரு இக்கட்டான நிலை மீண்டும் ஏற்பட்டுள்ளது.