இந்தியாவின் முதல் டெங்கு தடுப்பூசி திட்டம்: தென்காசியில் தமிழக அரசு முன்னெடுப்பு

டென்காசி மாவட்டம் கடையநல்லூரில் இந்தியாவின் முதல் டெங்கு தடுப்பூசி செலுத்தும் பணி முன்னோடித் திட்டமாகத் தொடங்கப்பட்டுள்ளது.

டெங்கு காய்ச்சலைத் தடுப்பதற்கான இந்தியாவின் முதல் தடுப்பூசி செலுத்தும் பணி தமிழகத்தின் தென்காசி மாவட்டத்தில் உள்ள கடையநல்லூரில் முன்னோடித் திட்டமாக அதிகாரப்பூர்வமாகத் தொடங்கப்பட்டுள்ளது. டெங்கு பாதிப்பு அதிகம் உள்ள பகுதியாகக் கண்டறியப்பட்டதையடுத்து, கடையநல்லூர் பகுதியில் இந்தத் தடுப்பூசி முகாம் நடத்தப்படுகிறது. தமிழக மக்கள் நல்வாழ்வுத்துறை அமைச்சர் கே.ஜி. அருண்ராஜ் இந்தத் தடுப்பூசித் திட்டத்தைத் தொடங்கி வைத்தார். இது குறித்து செய்தியாளர்களிடம் பேசிய அவர், இந்த தடுப்பூசி திட்டத்தின் செயல்திறனை ஆய்வு செய்த பின்னரே மற்ற மாநிலங்களிலும், தமிழகத்தின் பிற மாவட்டங்களிலும் விரிவுபடுத்தப்படும் என்று தெரிவித்தார்.

ஜப்பானைச் சேர்ந்த டகேடா (Takeda) மருந்து நிறுவனத்தால் தயாரிக்கப்பட்ட 'க்யூடெங்கா' (Qdenga) என்ற தடுப்பூசி, தற்போது பயன்பாட்டுக்குக் கொண்டு வரப்பட்டுள்ளது. இந்த தடுப்பூசியை மூன்று மாத இடைவெளியில் இரண்டு தவணைகளாகச் செலுத்தினால், டெங்கு காய்ச்சலுக்கு எதிராக சுமார் 80 சதவீதம் வரை பாதுகாப்பு கிடைக்கும் என்று மருத்துவ நிபுணர்கள் தெரிவிக்கின்றனர். நான்கு வகையான டெங்கு வைரஸ்களுக்கும் எதிராகச் செயல்படும் இந்தத் தடுப்பூசிக்கு உலக சுகாதார நிறுவனம் ஏற்கனவே முன் தகுதிச் சான்றிதழை வழங்கியுள்ளதுடன், பிரேசில் போன்ற நாடுகள் இதனைத் தங்கள் பொது சுகாதாரத் தடுப்பூசி அட்டவணையில் இணைத்துள்ளன.

இந்தத் தடுப்பூசித் திட்டத்தின் தாக்கத்தை ஆய்வு செய்ய இந்திய மருத்துவ ஆராய்ச்சி கவுன்சிலைச் (ICMR) சேர்ந்த இரண்டு விஞ்ஞானிகள் அடங்கிய குழுவினர் நியமிக்கப்பட்டுள்ளனர். கடையநல்லூர் பகுதியில் இந்த ஆய்வு நடத்தப்படும். இந்திய மருந்துக் கட்டுப்பாட்டு ஆணையம், 4 வயது முதல் 60 வயது வரையிலான நபர்களுக்கு இந்தத் தடுப்பூசியைச் செலுத்த ஒப்புதல் அளித்துள்ளது. டெங்கு காய்ச்சலால் ஏற்படும் உயிரிழப்புகளைத் தடுக்கவும், வைரஸ் பரவலைக் கட்டுப்படுத்தவும் இந்த தடுப்பூசி மிக முக்கியமான ஒரு மைல்கல்லாகக் கருதப்படுகிறது.

இந்தியாவில் இதுவரை எந்த மாநிலமும் டெங்கு தடுப்பூசியைப் பயன்படுத்தாத நிலையில், முதன்முறையாகத் தமிழகம் இந்த முன்னோடி முயற்சியை மேற்கொண்டிருப்பது குறிப்பிடத்தக்கது. கடையநல்லூர் பகுதியில் நடத்தப்படும் ஆய்வின் முடிவுகள் இந்தியா முழுமைக்குமான டெங்கு ஒழிப்பு நடவடிக்கைகளுக்கு ஒரு வழிகாட்டியாக அமையும். இந்த ஆய்வு அறிக்கையை அதிகாரிகள் சமர்ப்பித்த பிறகு, தமிழகத்தின் பிற மாவட்டங்களிலும் டெங்கு தடுப்பூசி செலுத்தும் பணிகளை விரிவுபடுத்துவது குறித்து அரசு முறையான அறிவிப்பை வெளியிடும் என்று அமைச்சர் கே.ஜி. அருண்ராஜ் உறுதி அளித்துள்ளார்.