தென் மாவட்டங்களை நோக்கித் திரும்பும் தொழில் முதலீடுகள்: தூத்துக்குடி, திருநெல்வேலிக்கு ரூ. 28,337 கோடி ஒதுக்கீடு

வெற்றி தமிழ்நாடு முதலீட்டாளர் மாநாட்டில் தூத்துக்குடி மற்றும் திருநெல்வேலி மாவட்டங்களுக்கு ரூ. 28,337 கோடி மதிப்பிலான முதலீடுகள் ஈர்க்கப்பட்டுள்ளன.

சென்னையில் நடைபெற்ற 'வெற்றி தமிழ்நாடு' முதலீட்டாளர் மாநாட்டில், மாநிலத்தின் தொழில் வளர்ச்சி மற்றும் முதலீட்டு பரவலாக்கத்தை உறுதிப்படுத்தும் வகையில் முக்கிய அறிவிப்புகள் வெளியாகியுள்ளன. இதில் குறிப்பாக, தென் தமிழகத்தின் தொழில் மையங்களாக விளங்கும் தூத்துக்குடி மற்றும் திருநெல்வேலி மாவட்டங்கள் அதிக கவனம் பெற்றுள்ளன. இந்த இரண்டு மாவட்டங்களிலும் மொத்தம் 11 புதிய தொழில் திட்டங்கள் மேற்கொள்ளப்பட உள்ளன. இதன் மூலம் சுமார் ரூ. 28,337 கோடி மதிப்பிலான முதலீடுகள் தமிழகத்திற்கு கிடைப்பதுடன், 9,420 பேருக்கு நேரடி வேலைவாய்ப்புகள் உருவாகும் என எதிர்பார்க்கப்படுகிறது.

இந்த முதலீட்டுப் பட்டியலில் காஞ்சிபுரம் மாவட்டம் ரூ. 31,004 கோடி முதலீடுகளுடன் முதலிடத்தில் இருந்தாலும், தொழில் வளர்ச்சி தென் மாவட்டங்களை நோக்கி விரிவடைந்து வருவது குறிப்பிடத்தக்க மாற்றமாகப் பார்க்கப்படுகிறது. தூத்துக்குடி மாவட்டத்தில் மட்டும் 10 முக்கிய திட்டங்கள் செயல்படுத்தப்பட உள்ளன. இதில் லைட்ஹவுஸ் கிரீன் டேட்டா சென்டர் நிறுவனம் ரூ. 10,000 கோடி முதலீட்டில் செயற்கை நுண்ணறிவு திறன் கொண்ட அதிநவீன தரவு மையத்தை அமைக்க உள்ளது. இந்த நிறுவனம் சமீபத்தில் தொடங்கப்பட்டிருந்தாலும், திட்டத்திற்கான நிலம் மற்றும் நிதி ஆதாரங்களுக்கான உறுதிமொழிகள் பெற்றுள்ளதாக அரசு தரப்பில் தெரிவிக்கப்பட்டுள்ளது.

விண்வெளி மற்றும் மேம்பட்ட உற்பத்தித் துறைகளிலும் தூத்துக்குடி முக்கிய மையமாக உருவெடுத்துள்ளது. ஸ்கைரூட் ஏரோஸ்பேஸ் நிறுவனம் ரூ. 250 கோடி முதலீட்டில் ஏவுகணைகளைச் சோதிக்கும் மற்றும் ஒருங்கிணைக்கும் வசதியை ஏற்படுத்த உள்ளது. அக்னிகுல் காஸ்மோஸ் நிறுவனம் ரூ. 400 கோடி முதலீட்டில் மறுபயன்பாடு செய்யக்கூடிய திரவ ஏவுகணைத் தயாரிப்பு மையத்தை உருவாக்கத் திட்டமிட்டுள்ளது. மேலும், யூரோடெக் பிவோட் சொல்யூஷன்ஸ் நிறுவனம் ரூ. 150 கோடியில் ஹோவர்கிராஃப்ட் தயாரிப்பு ஆலையை நிறுவ உள்ளது. இது இந்தியாவில் அரிதான ஒரு தொழில் முயற்சியாகும். இது தவிர, கண்ணாடி இழை மற்றும் கண்டெய்னர் தயாரிப்பு தொடர்பான திட்டங்களும் இப்பகுதியில் மேற்கொள்ளப்பட உள்ளன.

திருநெல்வேலி மாவட்டத்தைப் பொறுத்தவரை, கங்கை கொண்டான் சிப்காட் வளாகத்தில் விக்ரம் சோலார் நிறுவனம் பேட்டரி ஆற்றல் சேமிப்பு அமைப்பு தயாரிப்பு ஆலையை நிறுவ ரூ. 15,037 கோடி முதலீடு செய்ய உள்ளது. இந்தத் திட்டம் சுமார் 2,670 பேருக்கு வேலைவாய்ப்பை உருவாக்கும் என மதிப்பிடப்பட்டுள்ளது. தரவு மையங்கள், விண்வெளித் துறை மற்றும் பசுமை ஆற்றல் சார்ந்த இந்த முதலீடுகள், சென்னையைச் சுற்றியுள்ள பகுதிகளில் மட்டுமே குவிந்திருந்த தொழில்துறை வளர்ச்சியானது, மாநிலத்தின் மற்ற பகுதிகளுக்கும் சமமாகப் பரவுவதை உறுதி செய்கிறது. இது தமிழகத்தின் ஒட்டுமொத்த பொருளாதார வளர்ச்சியை அடுத்த கட்டத்திற்கு எடுத்துச் செல்லும் முயற்சியாகக் கருதப்படுகிறது.