தமிழ்நாட்டில் பயிர்க்கடன் வசூல் நடவடிக்கைகளுக்கு இடைக்காலத் தடை: கூட்டுறவுத்துறை அதிரடி உத்தரவு

தமிழ்நாட்டில் கூட்டுறவு வங்கிகள் மூலம் விவசாயிகளிடம் மேற்கொள்ளப்பட்டு வந்த பயிர்க்கடன் வசூல் நடவடிக்கைகளை தற்காலிகமாக நிறுத்தி வைக்க கூட்டுறவுச் சங்கங்களின் பதிவாளர் உத்தரவிட்டுள்ளார்.

தமிழ்நாடு அரசு கூட்டுறவுச் சங்கங்களின் மூலம் வழங்கப்பட்ட பயிர்க்கடன்களைத் திரும்பப் பெறுவதற்கான நடவடிக்கைகளைத் தற்காலிகமாக நிறுத்தி வைக்குமாறு கூட்டுறவுச் சங்கங்களின் பதிவாளர் ஜி. லதா உத்தரவிட்டுள்ளார். பயிர்க்கடன் தள்ளுபடி திட்டம் 2026 தொடர்பான நடைமுறைகளில் பல்வேறு மாவட்டங்களில் உள்ள கூட்டுறவு வங்கிகள் மற்றும் சங்கங்கள் விவசாயிகளிடம் கடுமையான முறையில் கடன் வசூலிப்பதாகப் புகார்கள் எழுந்தன. குறிப்பாக, தள்ளுபடி திட்டத்தின் கீழ் பகுதி பலன்களைப் பெற்றும், எஞ்சிய தொகையைச் செலுத்தத் தவறிய விவசாயிகளிடம் வற்புறுத்தி பணம் வசூலிப்பது நிறுத்தப்பட வேண்டும் என்று அறிவுறுத்தப்பட்டுள்ளது.

கடந்த 2025-ம் ஆண்டு டிசம்பர் 31-ம் தேதி வரை மொத்தம் 15,108 கோடி ரூபாய் மதிப்பிலான பயிர்க்கடன்கள் வழங்கப்பட்டுள்ளன. இதில், 2025 மே 1 முதல் 2026 பிப்ரவரி 28 வரையிலான காலக்கட்டத்தில் வழங்கப்பட்ட கடன்களில், 5,932.23 கோடி ரூபாய் மதிப்பிலான கடன்கள் இந்த தள்ளுபடி திட்டத்தின் கீழ் தகுதியானவை என கண்டறியப்பட்டது. நிலத்தின் அளவைப் பொருட்படுத்தாமல் 75,000 ரூபாய் வரையிலான பயிர்க்கடன்கள் தள்ளுபடி செய்யப்படும் என அறிவிக்கப்பட்டு, தற்போது வரை சுமார் 13.34 லட்சம் விவசாயிகளின் 5,267 கோடி ரூபாய் கடன் தொகை தள்ளுபடி செய்யப்பட்டுள்ளது.

பயிர்க்கடன் தள்ளுபடி தொடர்பான அரசின் வழிகாட்டுதல்களைச் சரியாகப் பின்பற்றாமல், சில சங்கங்கள் விவசாயிகளுக்கு நெருக்கடி கொடுப்பதாக அரசின் கவனத்திற்கு கொண்டு செல்லப்பட்டதைத் தொடர்ந்து, இந்த இடைக்காலத் தடையை அமல்படுத்த பதிவாளர் நடவடிக்கை எடுத்துள்ளார். இனிவரும் காலங்களில் அடுத்தக்கட்ட அறிவுறுத்தல்கள் வரும் வரை, எவ்விதமான கடன் வசூல் நடவடிக்கைகளையும் மேற்கொள்ளக் கூடாது என மண்டல இணைப் பதிவாளர்கள் மற்றும் மாவட்ட மத்திய கூட்டுறவு வங்கிகளின் மேலாண் இயக்குநர்களுக்குக் கடுமையான உத்தரவுகள் பிறப்பிக்கப்பட்டுள்ளன.

இத்துடன், தங்களுடைய பழைய பயிர்க்கடன்களை முழுமையாகச் செலுத்தி முடித்த விவசாயிகளுக்கு, புதிய பயிர்க்கடன்களைத் தடையின்றி வழங்க வேண்டும் என்பதையும் அரசு உறுதிப்படுத்தியுள்ளது. வரும் செப்டம்பர் 30-ம் தேதிக்குள் தகுதியுள்ள அனைத்து விவசாயிகளுக்கும் புதிய பயிர்க்கடன் கிடைப்பதை உறுதி செய்யுமாறு அனைத்து மண்டல ஒருங்கிணைப்பாளர்களுக்கும் அறிவுறுத்தப்பட்டுள்ளது. விவசாயிகள் பயிர்க்கடன் பெறுவதில் உள்ள சிக்கல்களைக் களைந்து, விவசாய உற்பத்தி பாதிக்காத வண்ணம் இந்தப் புதிய உத்தரவுகள் அமல்படுத்தப்படும் என அரசு தரப்பில் தெரிவிக்கப்பட்டுள்ளது.