குலசேகரன்பட்டினம் இஸ்ரோ ஏவுதளம்: தமிழக மாணவர்களுக்கு செயற்கைக்கோள் தொழில்நுட்பம் பயிற்றுவிக்க சிறப்பு திட்டம்

தூத்துக்குடி மற்றும் திருநெல்வேலி பகுதியில் அமையவுள்ள விண்வெளி ஆராய்ச்சி பூங்காவிற்காக, பொறியியல் மாணவர்களுக்கு செயற்கைக்கோள் தொழில்நுட்பத்தில் பயிற்சி அளிக்க தமிழக அரசு நிதி ஒதுக்கீடு செய்துள்ளது.

தூத்துக்குடி மற்றும் திருநெல்வேலி மாவட்டங்களில் அமையவுள்ள விண்வெளி தொழில்நுட்ப சிறப்பு முதலீட்டு மண்டலத்தை மையமாக கொண்டு, இஸ்ரோவின் புதிய ஏவுதளம் குலசேகரன்பட்டினத்தில் உருவாக்கப்பட்டு வருகிறது. இந்த பிரம்மாண்ட திட்டத்திற்குத் தேவையான திறமையான பணியாளர்களை உருவாக்கும் நோக்கில், தமிழக அரசு புதிய முயற்சியை முன்னெடுத்துள்ளது. இதற்காக தமிழ்நாடு மாநில அறிவியல் மற்றும் தொழில்நுட்ப மன்றம் (TNSCST) சார்பில், பொறியியல் கல்லூரி மாணவர்களுக்கு செயற்கைக்கோள் தொழில்நுட்பம் சார்ந்த பயிற்சிகளும், நிதி உதவிகளும் வழங்கப்பட உள்ளன.

இந்த திட்டத்தின் ஒரு பகுதியாக, செயற்கைக்கோள் வடிவமைப்பு தொடர்பான பத்து தனித்துவமான திட்டங்களுக்கு விண்ணப்பங்கள் வரவேற்கப்பட உள்ளன. தேர்வு செய்யப்படும் ஒவ்வொரு மாணவர் குழுவிற்கும் தலா ஐந்து லட்சம் ரூபாய் நிதி உதவி வழங்கப்படும். இதன் மூலம் மாணவர்கள் ஒரு வருட காலத்திற்குள் செயற்கைக்கோள் துணை அமைப்புகள், நவீன பேலோடுகள் அல்லது கியூப்சாட் (CubeSat) மாதிரிகளை உருவாக்குவதை இலக்காகக் கொண்டு செயல்படுவார்கள். தமிழக பட்ஜெட்டில் இந்த திட்டத்திற்காக ஐம்பது லட்சம் ரூபாய் நிதி ஒதுக்கப்பட்டுள்ளது என்பது குறிப்பிடத்தக்கது.

இறுதி ஆண்டு இளநிலை மற்றும் முதுநிலை பொறியியல் பயிலும் மாணவர்கள், பேலோட் வடிவமைப்பு, சென்சார் தொழில்நுட்பம், டெலிமெட்ரி, செயற்கை நுண்ணறிவு மூலம் தரவுகளைக் கையாளுதல், மின்சக்தி அமைப்புகள் மற்றும் வெப்பக் கட்டுப்பாடு போன்ற ஐந்து முக்கிய துறைகளில் தங்கள் திட்டங்களைச் சமர்ப்பிக்கலாம். இத்திட்டத்தின் மூலம் பெறப்படும் நிதியானது சென்சார்கள், டிரான்ஸீவர்கள், சோலார் செல்கள், பிசிபி பிரிண்டிங் மற்றும் சுற்றுச்சூழல் சோதனைகள் போன்ற பணிகளுக்குப் பயன்படுத்தப்படும். இது மாணவர்களின் தொழில்நுட்ப அறிவை மேம்படுத்தி, விண்வெளித் துறையில் சிறந்து விளங்க வழிவகுக்கும் என எதிர்பார்க்கப்படுகிறது.

மாணவர்களின் திட்டங்களை மதிப்பீடு செய்ய முன்னாள் இஸ்ரோ செயற்கைக்கோள் மைய இயக்குனர் மயில்சாமி அண்ணாதுரை, ஐஐடி மெட்ராஸ் மற்றும் அண்ணா பல்கலைக்கழக விண்வெளி ஆராய்ச்சி மையத்தின் வல்லுநர்கள், இஸ்ரோ விஞ்ஞானிகள் மற்றும் சென்னையைச் சேர்ந்த விண்வெளி ஸ்டார்ட்அப் நிறுவனங்களின் நிறுவனர்கள் அடங்கிய நிபுணர் குழு அமைக்கப்பட்டுள்ளது. இவர்கள் மாணவர்களுக்கு வழிகாட்டியாகச் செயல்படுவார்கள். இத்தகைய முன்னெடுப்புகள் எதிர்காலத்தில் தமிழகத்தை விண்வெளித் தொழில்நுட்பத்தில் ஒரு முக்கிய மையமாக மாற்ற உதவும் என்பதில் மாற்றுக் கருத்து இல்லை.