அக்டோபர் 23-ல் வெளியாகும் ஜாக்கி ஷெராஃபின் 'காளி கேத்தி': திகில் அனுபவத்திற்கு தயாராகும் ரசிகர்கள்

ஜாக்ப் ஷெராஃப் மற்றும் சரத் கெல்கர் நடித்துள்ள காளி கேத்தி திரைப்படம் அக்டோபர் 23-ஆம் தேதி திரைக்கு வருகிறது.

பிரபல பாலிவுட் நடிகர் ஜாக்கி ஷெராஃப் மற்றும் சரத் கெல்கர் முதன்மை கதாபாத்திரங்களில் நடித்துள்ள 'காளி கேத்தி' திரைப்படத்தின் வெளியீட்டுத் தேதி அதிகாரப்பூர்வமாக அறிவிக்கப்பட்டுள்ளது. ஹரிஸ் இம்தியாஸ் கான் இயக்கத்தில் உருவாகியுள்ள இப்படம் வரும் அக்டோபர் 23-ஆம் தேதி உலகம் முழுவதும் உள்ள திரையரங்குகளில் வெளியாக உள்ளது. இது குறித்து ஜாக்கி ஷெராஃப் தனது சமூக வலைதள பக்கத்தில் பகிர்ந்துள்ள பதிவு மற்றும் படத்தின் போஸ்டர் ரசிகர்களிடையே பெரும் எதிர்பார்ப்பை ஏற்படுத்தியுள்ளது. படத்தின் விளம்பரத்திற்காக அவர் பகிர்ந்துள்ள 'ஒளியை அணைய விடாதீர்கள், கேத்தி விழித்துக்கொள்ளப் போகிறது' என்ற வாசகம், படத்தில் இடம்பெறப் போகும் திகில் காட்சிகளின் தீவிரத்தை உணர்த்தும் வகையில் அமைந்துள்ளது.

இந்தத் திரைப்படத்தை பிளாக் கேன்வாஸ் ஸ்டுடியோ சார்பில் சனா கான் தயாரித்துள்ளார். மேலும் ஜீரோலேண்ட் புரொடக்ஷன்ஸ் நிறுவனமும் இந்தப் படத்தின் உருவாக்கத்தில் இணைந்துள்ளது. ஆரம்பத்தில் 'கேத்தி' என்று பெயரிடப்பட்டிருந்த இந்தப் படம், பின்னர் 'காளி கேத்தி' எனப் பெயர் மாற்றம் செய்யப்பட்டு தற்போது திரைக்கு வரத் தயாராகியுள்ளது. படத்தில் ஜாக்கி ஷெராஃப் மற்றும் சரத் கெல்கர் ஆகியோருடன் நேஹா சர்கம், ஷாஜி சவுத்ரி, குழந்தை நட்சத்திரம் ஸ்பந்தன் மற்றும் வீரேந்திர சக்சேனா உள்ளிட்ட பல முன்னணி நட்சத்திரங்கள் முக்கியமான கதாபாத்திரங்களில் நடித்துள்ளனர்.

திரைப்படத்தின் கதைக்களம் குறித்து தயாரிப்பு தரப்பு பெரிய அளவில் தகவல்களை வெளியிடாமல் மர்மத்தை பாதுகாத்து வருகிறது. இருப்பினும், இயக்குநர் ஹரிஸ் இம்தியாஸ் கான் அளித்த பேட்டியின்படி, விவசாயத்தை மையமாகக் கொண்டு திகில் கலந்த ஒரு கதைக்களத்தை இந்தப் படம் கொண்டிருக்க வாய்ப்புள்ளது. ஒரு கிராமத்து பின்னணியில், குடும்பம், பாரம்பரியம் மற்றும் நீண்ட நாட்களாக புதைக்கப்பட்ட உண்மைகள் ஆகியவற்றைச் சுற்றி இந்த திகில் பயணம் நகர்வதாக படக்குழுவினர் தெரிவித்துள்ளனர். விவசாயம் சார்ந்த திகில் திரைப்படம் என்ற புதிய முயற்சியை ரசிகர்கள் திரையில் காண ஆவலுடன் காத்திருக்கின்றனர்.

தொழில்நுட்ப ரீதியாக இப்படம் வலுவான கூட்டணியைக் கொண்டுள்ளது. ஒளிப்பதிவை கிரண் தியோஹான்ஸ் மேற்கொள்ள, படத்தொகுப்பை சம்யுக்தா காசா கையாண்டுள்ளார். பின்னணி இசை மற்றும் இசை அமைப்பிற்கு அலோகாநந்தா தாஸ்குப்தா பொறுப்பேற்றுள்ளார். கலை இயக்கத்தை ராகேஷ் யாதவ் கவனித்துள்ளார். இதற்கு முன்னதாக திகில் மற்றும் நகைச்சுவை கலந்த படங்களில் ஜாக்கி ஷெராஃப் நடித்திருந்தாலும், முழுமையான திகில் படமாக 'காளி கேத்தி' அவருக்கு ஒரு முக்கியமான மைல்கல்லாக அமையும் என்று எதிர்பார்க்கப்படுகிறது.