ஜீவா - ரஜிஷா விஜயன் இணையும் தகப்பன்: விறுவிறுப்பாக நிறைவடைந்த படப்பிடிப்பு

நடிகர் ஜீவா நடிப்பில் உருவாகியுள்ள தகப்பன் திரைப்படத்தின் படப்பிடிப்பு நிறைவடைந்ததாக படக்குழு அதிகாரப்பூர்வமாக அறிவித்துள்ளது.

தமிழ் திரையுலகின் முன்னணி நட்சத்திரங்களில் ஒருவரான நடிகர் ஜீவா நடிப்பில் உருவாகி வரும் 'தகப்பன்' திரைப்படத்தின் படப்பிடிப்பு பணிகள் முழுமையாக நிறைவடைந்துள்ளதாக அதிகாரப்பூர்வ அறிவிப்பு வெளியாகியுள்ளது. இந்தத் திரைப்படத்தை, விமர்சன ரீதியாக பெரும் வரவேற்பைப் பெற்ற 'கிடா' திரைப்படத்தை இயக்கிய இயக்குநர் ரா வெங்கட் இயக்குகிறார். லார்்க் ஸ்டுடியோஸ் நிறுவனம் தயாரிக்கும் ஐந்தாவது படமான இது, குடும்ப உறவுகளின் முக்கியத்துவத்தை மையமாகக் கொண்ட கதையம்சத்துடன் உருவாகி வருவதாகக் கூறப்படுகிறது.

இந்தத் திரைப்படத்தில் ஜீவாவுடன் இணைந்து ரஜிஷா விஜயன் மற்றும் லக்ஷ்மி ராமகிருஷ்ணன் ஆகியோர் மிக முக்கிய கதாபாத்திரங்களில் நடித்துள்ளனர். அண்மையில் வெளியான இப்படத்தின் முதல் பார்வை போஸ்டரில், ஜீவா மற்றும் குழந்தை நட்சத்திரம் கேசவ் நீதிமன்றத்திற்கு முன்னால் அமர்ந்திருப்பது போன்ற காட்சி இடம்பெற்றிருந்தது. கேசவ் ஏற்கனவே 'தக் லைஃப்' மற்றும் 'சக்தி திருமகன்' போன்ற படங்களில் முக்கிய கதாபாத்திரங்களில் நடித்து ரசிகர்களின் கவனத்தை ஈர்த்தவர் என்பது குறிப்பிடத்தக்கது.

தொழில்நுட்ப ரீதியாக வலுவான கூட்டணியை இப்படத்திற்காக இயக்குநர் ரா வெங்கட் அமைத்துள்ளார். ஒளிப்பதிவாளராக எம். சுகுமார் பணியாற்ற, இசையமைப்பாளராக மார்ஷல் ராபின்சன் ஒப்பந்தம் செய்யப்பட்டுள்ளார். படத்தொகுப்பை நாகூரான் ராமச்சந்திரனும், கலை இயக்கத்தை கே.பி. நந்தபாலனும் கவனித்து வருகின்றனர். மேலும், சண்டைக் காட்சிகளை மகேஷ் மேத்யூ வடிவமைத்துள்ளார். இவர்களின் கூட்டணியில் உருவாகியுள்ள இந்தத் திரைப்படம், ரசிகர்களிடையே பெரும் எதிர்பார்ப்பை ஏற்படுத்தியுள்ளது.

கடந்த பொங்கல் பண்டிகையின் போது 'தலைவர் தம்பி தலைமையின்' திரைப்படம் மூலம் ரசிகர்களைச் சந்தித்த நடிகர் ஜீவா, அதனைத் தொடர்ந்து எம். ராஜேஷ் இயக்கத்தில் 'ஜாலியா இருந்த ஒருத்தன்' திரைப்படத்திலும் கவனம் செலுத்தி வருகிறார். தற்போது 'தகப்பன்' படப்பிடிப்பு நிறைவடைந்த நிலையில், இப்படம் இந்த ஆண்டு டிசம்பர் மாதம் திரையரங்குகளில் வெளியாகும் என படக்குழு அறிவித்துள்ளது. படத்தின் கதைக்களம் மற்றும் பிற நடிகர்கள் குறித்த கூடுதல் தகவல்கள் விரைவில் வெளியாகும் என்று எதிர்பார்க்கப்படுகிறது.