கள்ளக்குறிச்சி கள்ளச்சாராய விவகாரம்: அதிகாரிகளின் அலட்சியத்தால் நிகழ்ந்த துயரம் - விசாரணை ஆணையம் பகீர் அறிக்கை

கள்ளக்குறிச்சி கள்ளச்சாராய மரணங்களுக்கு அதிகாரிகளின் அலட்சியம் மற்றும் முறையான கண்காணிப்பு குறைபாடே காரணம் என நீதிபதி கோகுல்தாஸ் ஆணையம் அறிக்கை சமர்ப்பித்துள்ளது.

கடந்த 2024-ஆம் ஆண்டு கள்ளக்குறிச்சியில் மெத்தனால் கலந்த சாராயம் குடித்ததன் விளைவாக நிகழ்ந்த கோர விபத்தில் 70 பேர் பரிதாபமாக உயிரிழந்தனர். இந்தச் சம்பவம் குறித்து விசாரணை மேற்கொள்வதற்காக நீதிபதி பி. கோகுல்தாஸ் தலைமையில் ஒருநபர் ஆணையம் அமைக்கப்பட்டது. இந்த ஆணையம் தனது விரிவான 650 பக்க அறிக்கையைச் சட்டப்பேரவையில் தாக்கல் செய்துள்ளது. இந்த அறிக்கையில், கள்ளக்குறிச்சி மற்றும் அதனைச் சுற்றியுள்ள பகுதிகளில் நிகழ்ந்த இந்தத் துயரத்திற்கு காவல்துறை, மதுவிலக்கு மற்றும் ஆயத்தீர்வை துறை, மற்றும் வருவாய்த்துறையினரின் கடுமையான அலட்சியமே முதன்மைக் காரணம் எனத் தெரிவிக்கப்பட்டுள்ளது.

விசாரணையில், சேஷசமுத்திரம் மற்றும் மாதவச்சேரி உள்ளிட்ட சில கிராமங்களில் சட்டவிரோதமான முறையில் ஏலங்கள் நடத்தப்பட்டு, அதன் மூலம் சாராயம் விற்பனை செய்ய ஆட்கள் தேர்வு செய்யப்பட்ட அதிர்ச்சிகரமான தகவல் வெளியாகியுள்ளது. ஏலத்தில் வெற்றி பெறுபவர்கள் சுமார் 5 லட்சம் ரூபாய் வரை செலுத்திவிட்டு, எந்தவிதத் தடையுமின்றி கள்ளச்சாராயத்தை விற்பனை செய்துள்ளனர். இந்தச் செயலை எதிர்த்த உள்ளூர் மக்களைச் சமூகப் புறக்கணிப்பு செய்வதாக மிரட்டியதாகவும் ஆணையம் தனது அறிக்கையில் சுட்டிக்காட்டியுள்ளது. மெத்தனால் கையிருப்பு, போக்குவரத்து மற்றும் விற்பனை ஆகியவற்றைக் கண்காணிக்க வேண்டிய பொறுப்பில் இருந்த அதிகாரிகள் முறையாகச் செயல்பட்டிருந்தால், இத்தகையதொரு பேரழிவு நடந்திருக்காது என்பது ஆணையத்தின் முக்கிய அவதானிப்பாக உள்ளது.

சுமார் 400-க்கும் மேற்பட்ட நபர்களிடம் விசாரணை நடத்தித் தயாரிக்கப்பட்ட இந்த அறிக்கையில், கள்வராயன் மலைப் பகுதிகளில் சட்டவிரோதமாகச் சாராயம் காய்ச்சப்படுவதைத் தடுக்கப் போதிய பணியாளர்கள் இல்லை என்பது உறுதி செய்யப்பட்டுள்ளது. 2023-ஆம் ஆண்டு மாரக்காணம் சாராய விபத்திற்குப் பிறகும், காவல்துறை உயரதிகாரிகள் பிறப்பித்த சுற்றறிக்கைகள் கள அளவில் முறையாகப் பின்பற்றப்படவில்லை என்பது இந்த அறிக்கையின் மூலம் அம்பலமாகியுள்ளது. குற்றவாளிகள் மெத்தனால் இறக்குமதி செய்வதற்கும், அதனைக் கையாளுவதற்கும் எந்தவித உரிமமும் வைத்திருக்கவில்லை என்பது விசாரணையில் தெரியவந்துள்ளது. இந்த சட்டவிரோதச் செயல்களில் உள்ளூர் காவல்துறை மற்றும் வருவாய்த்துறை அதிகாரிகள் மறைமுக உடந்தையாக இருந்திருக்கலாம் என்றும் சந்தேகம் எழுப்பப்பட்டுள்ளது.

இந்தத் துயரத்தால் 161 பேர் பல்வேறு உடல் உபாதைகளுக்கு ஆளாகியுள்ள நிலையில், பாதிக்கப்பட்ட குடும்பங்களுக்குத் தேவையான உதவிகளைச் செய்ய வேண்டும் என ஆணையம் அரசுக்குப் பரிந்துரைத்துள்ளது. குறிப்பாக, சாராய விபத்தால் பெற்றோரை இழந்த குழந்தைகளுக்குத் தேவையான கல்வி, உணவு மற்றும் தங்குமிட வசதிகளை அரசு உறுதி செய்ய வேண்டும் என்றும், பாதிக்கப்பட்ட குடும்பங்களில் தகுதியுள்ள நபர்களுக்கு அரசுப் பணிகளில் முன்னுரிமை வழங்க வேண்டும் என்றும் அந்த அறிக்கையில் வலியுறுத்தப்பட்டுள்ளது. கள்வராயன் மலைப் பகுதிக்கு எனத் தனி மதுவிலக்கு அமலாக்கப் பிரிவை உருவாக்க வேண்டும் என்ற கோரிக்கையும் முன்வைக்கப்பட்டுள்ளது.