காரைக்காலில் போதைப்பொருள் கடத்தல் வேட்டை: ஆபரேஷன் தண்டர்ஸ்டிரைக் மூலம் 11 பேர் கைது

காரைக்காலில் 'ஆபரேஷன் தண்டர்ஸ்டிரைக்' மூலம் 7.6 கிலோ மெத்தாம்பெட்டமைன் மற்றும் 12 கிலோ கஞ்சா பறிமுதல் செய்யப்பட்டு 11 பேர் கைது செய்யப்பட்டுள்ளனர்.

புதுச்சேரி மாநிலம் காரைக்கால் பகுதியில் போதைப்பொருள் புழக்கத்தைக் கட்டுப்படுத்தும் நோக்கில் காவல்துறை தீவிரமான நடவடிக்கைகளை மேற்கொண்டு வருகிறது. இதன் ஒரு பகுதியாக 'ஆபரேஷன் தண்டர்ஸ்டிரைக்' என்ற பெயரில் முன்னெடுக்கப்பட்ட சிறப்பு வேட்டையில், சுமார் 7.6 கிலோ எடையுள்ள மெத்தாம்பெட்டமைன் மற்றும் 12 கிலோ கஞ்சா பறிமுதல் செய்யப்பட்டுள்ளது. இந்த அதிரடி நடவடிக்கையில் வெளிநாட்டவர் ஒருவர் உட்பட மொத்தம் 11 பேர் கைது செய்யப்பட்டு சிறையில் அடைக்கப்பட்டுள்ளனர். செப்டம்பர் 5-ஆம் தேதி முதல் தொடங்கப்பட்ட இந்தத் தொடர் சோதனைகள், போதைப்பொருள் கடத்தல் கும்பலுக்குப் பெரும் பின்னடைவை ஏற்படுத்தியுள்ளதாக காவல்துறை தரப்பில் தெரிவிக்கப்பட்டுள்ளது.

பறிமுதல் செய்யப்பட்ட மெத்தாம்பெட்டமைனின் சர்வதேச சந்தை மதிப்பு சுமார் 6.08 கோடி ரூபாய் என்று மதிப்பிடப்பட்டுள்ளது. இந்த வழக்கில் கைதான நிஜந்தன் என்பவரிடம் நடத்தப்பட்ட விசாரணையின் அடிப்படையில், கடத்தல் கும்பலின் பின்னணி குறித்த முக்கிய தகவல்கள் வெளியாகின. நிஜந்தன், அவரது மைத்துனர் ராஜேஷ் மற்றும் பாக்யராஜ் ஆகியோருடன் இணைந்து போதைப்பொருட்களை இலங்கைக்குக் கடத்தத் திட்டமிட்டது தெரியவந்தது. இதில் தொடர்புடைய இலங்கை நாட்டைச் சேர்ந்த அலெக்ஸ் ராபர்ட் ஜெராமி என்பவரும் கைது செய்யப்பட்டுள்ளார். இவர்களிடமிருந்து மூன்று செல்போன்கள் மற்றும் மூன்று இருசக்கர வாகனங்களும் பறிமுதல் செய்யப்பட்டுள்ளன.

இதற்கிடையில், மற்றொரு தனிப்படை நடத்திய சோதனையில் கீழவஞ்சூர் பேருந்து நிறுத்தம் அருகே சுமார் 10.84 கிலோ கஞ்சா கைப்பற்றப்பட்டது. ஆந்திர மாநிலத்தைச் சேர்ந்த மூவர் மற்றும் சேலம் மாவட்டத்தைச் சேர்ந்த சடையன் என மொத்தம் நான்கு பேர் இந்த வழக்கில் கைது செய்யப்பட்டுள்ளனர். இவர்கள் கடத்தி வந்த கஞ்சாவை மெத்தாம்பெட்டமைன் வழக்கில் முக்கியக் குற்றவாளியாகக் கருதப்படும் பாக்யராஜிடம் ஒப்படைக்கத் திட்டமிட்டிருந்தது விசாரணையில் உறுதியானது. இதையடுத்து திரு.பட்டிணம் காவல் நிலையத்தில் இவர்கள் மீது வழக்குப்பதிவு செய்யப்பட்டுள்ளது.

மூன்றாவது நடவடிக்கையாக கொட்டுச்சேரியில் நடைபெற்ற சோதனையில் 1.3 கிலோ கஞ்சா பறிமுதல் செய்யப்பட்டது. மகேந்திரன் மாந்தங்கி, நன்முகன் மற்றும் ஒரு சிறுவன் என மூவர் கைது செய்யப்பட்டனர். போதைப்பொருள் தடுப்புப் பிரிவு மற்றும் சைபர் செல் காவல்துறையினர் இணைந்து சுமார் 30 நாட்களாகத் திட்டமிட்டு இந்த நடவடிக்கைகளை மேற்கொண்டனர். சுமார் 25 காவலர்கள் அடங்கிய ஆறு தனிப்படைகள் இந்தச் சிறப்பு வேட்டையில் ஈடுபட்டதாக காரைக்கால் மாவட்ட மூத்த காவல் கண்காணிப்பாளர் வினய்குமார் காட்கே தெரிவித்தார். கைதானவர்கள் அனைவரும் போதைப்பொருள் மற்றும் மனோவியல் தடுப்புச் சட்டத்தின் (NDPS Act) கீழ் வழக்குப்பதிவு செய்யப்பட்டு விசாரணைக்கு உட்படுத்தப்பட்டுள்ளனர்.