நடிகை கரீனா கபூருக்கு சட்ட நோட்டீஸ்: இஸ்லாமிய மத வாசகம் பொறித்த பதக்கத்தால் சர்ச்சை

நடிகை கரீனா கபூர் அணிந்திருந்த பழங்கால பதக்கம் குறித்து மத ரீதியான சர்ச்சை எழுந்துள்ள நிலையில், அவருக்கு சட்ட நோட்டீஸ் அனுப்பப்பட்டுள்ளது.
பிரபல பாலிவுட் நடிகை கரீனா கபூர் கான், தீபாவளி பண்டிகையின் போது வெளியிட்ட புகைப்படம் ஒன்று தற்போது சமூக வலைதளங்களில் பெரும் விவாதத்தை ஏற்படுத்தியுள்ளது. இந்தப் புகைப்படத்தில் அவர் அணிந்திருந்த பழங்கால மரபுவழி பதக்கம், மத உணர்வுகளைப் புண்படுத்தும் வகையில் இருப்பதாகக் கூறி, காங்கிரஸ் கட்சியின் போபால் நகர ஊடக ஒருங்கிணைப்பாளர் அப்பாஸ் ஹபீஸ், நடிகை கரீனா கபூர் மற்றும் அவரது ஸ்டைலிஸ்ட் ரியா கபூர் ஆகியோருக்கு எதிராக சட்டப்பூர்வமான நோட்டீஸ் அனுப்பியுள்ளார்.
இந்த சட்ட நோட்டீஸில், அந்தப் பதக்கத்தில் குர்ஆனின் புனித வசனமான 'ஆயத்-உல்-குர்சி' பொறிக்கப்பட்டுள்ளதாகக் குறிப்பிடப்பட்டுள்ளது. சுமார் 200 ஆண்டுகள் பழமையான இந்த ஆபரணம், போபால் பேகம்களின் குடும்பத்திற்குச் சொந்தமான பாரம்பரிய சொத்தாகும். சயீஃப் அலி கானுடனான திருமணத்திற்குப் பிறகு, இந்த குடும்ப வாரிசு சொத்து கரீனா கபூரின் கைக்கு வந்ததாகக் கூறப்படுகிறது. இந்த புனிதமான வசனத்தை ஒரு பேஷன் ஆக்சஸரியாகக் கருதி, சமூக வலைதளத்தில் பகிரப்பட்ட விதம் மத நம்பிக்கையை அவமதிப்பதாக ஹபீஸ் தனது நோட்டீஸில் குற்றம் சாட்டியுள்ளார்.
இந்த நோட்டீஸில் அவர் குறிப்பிட்டுள்ள முக்கியக் கோரிக்கைகளின்படி, அந்தப் புகைப்படங்கள் மற்றும் காணொளிகளைச் சமூக வலைதளங்களில் இருந்து உடனடியாக நீக்க வேண்டும் என்றும், முஸ்லிம் சமூகத்திடம் பகிரங்கமாக மன்னிப்பு கேட்க வேண்டும் என்றும் வலியுறுத்தப்பட்டுள்ளது. கரீனா கபூர் என்ன உடை உடுத்த வேண்டும் அல்லது என்ன ஆபரணங்களை அணிய வேண்டும் என்பதில் தனக்கு எந்தப் பிரச்சனையும் இல்லை என்றும், ஆனால் புனிதமான ஒரு மத வசனத்தை ஃபேஷன் பொருளாகக் காட்டிய விதம் மட்டுமே தனது வருத்தத்திற்குரிய காரணம் என்றும் அப்பாஸ் ஹபீஸ் விளக்கமளித்துள்ளார்.
இந்த விவகாரம் குறித்து நடிகை கரீனா கபூர் அல்லது அவரது குழுவினர் இதுவரை எந்தவொரு அதிகாரப்பூர்வமான பதிலும் அளிக்கவில்லை. அதேசமயம், போபாலைச் சேர்ந்த இந்து உத்சவ் சமிதி என்ற அமைப்பு கரீனா கபூருக்கு ஆதரவாகக் குரல் கொடுத்துள்ளது, இதனால் இந்த விவகாரம் தற்போது சமூக வலைதளங்களில் ஒரு பரவலான விவாதமாக மாறியுள்ளது. இஸ்லாமிய அறிஞர்களின் கருத்துப்படி, குர்ஆன் வசனங்களை நகைகளாக அணிவது தொடர்பாக வெவ்வேறு கருத்துகள் நிலவி வரும் நிலையில், இந்தச் சம்பவம் பொது வெளியில் பெரிய தாக்கத்தை ஏற்படுத்தியுள்ளது.









