கச்சத்தீவு விவகாரம்: இந்திய மீனவர்களுக்கு விழிப்புணர்வு தேவை - உச்ச நீதிமன்றம் கருத்து

கச்சத்தீவு தொடர்பான வழக்கில், இந்திய மீனவர்கள் இலங்கை எல்லைக்குள் நுழைவதைத் தவிர்க்க விழிப்புணர்வு ஏற்படுத்த வேண்டும் என உச்ச நீதிமன்றம் கருத்து தெரிவித்துள்ளது.

கச்சத்தீவு தீவு இலங்கைக்கு தாரைவார்க்கப்பட்டதை எதிர்த்து தொடரப்பட்ட வழக்குகளை விசாரித்த உச்ச நீதிமன்றம், முக்கியமான அவதானிப்பு ஒன்றை முன்வைத்துள்ளது. நீதிபதிகள் சஞ்சய் குமார் மற்றும் சஞ்சீவ் சச்தேவா ஆகியோர் அடங்கிய அமர்வு முன்னிலையில் இந்த வழக்கு விசாரணைக்கு வந்தது. அப்போது, இந்திய மீனவர்கள் எல்லை தாண்டி இலங்கை கடற்பகுதிக்குள் நுழைவதைத் தவிர்ப்பது குறித்து அவர்களுக்கு உரிய விழிப்புணர்வு ஏற்படுத்தப்பட வேண்டும் என்று நீதிமன்றம் வலியுறுத்தியுள்ளது. இந்த வழக்கை நீதிபதிகள் பிப்ரவரி 2027-ஆம் ஆண்டிற்கு ஒத்திவைத்தனர்.

விசாரணையின்போது 1974 மற்றும் 1976-ஆம் ஆண்டு கையெழுத்திடப்பட்ட இந்திய-இலங்கை கடல் எல்லை ஒப்பந்தங்கள் குறித்து நீதிபதி சஞ்சய் குமார், மத்திய அரசின் தலைமை வழக்கறிஞர் ஆர். வெங்கடரமணியிடம் கேள்வி எழுப்பினார். இதற்கு பதிலளித்த வழக்கறிஞர், இலங்கைடனான உறவு மிகச் சிறப்பாக இருப்பதாகவும், அதைச் சிதைக்கும் வகையில் அரசு செயல்பட விரும்பவில்லை என்றும் குறிப்பிட்டார். கடல் மாசுபாடு காரணமாக இந்தியக் கடற்பகுதிகளில் மீன் வளம் குறைந்துள்ளதால், மீனவர்கள் வாழ்வாதாரத்திற்காகத் தொடர்ந்து இலங்கை எல்லைகளை நோக்கிச் செல்வதாக அவர் சுட்டிக்காட்டினார்.

தமிழ்நாடு அரசின் சார்பில் ஆஜரான கூடுதல் தலைமை வழக்கறிஞர் ஹரிப்பிரியா, இந்த விவகாரத்தில் மத்திய அரசு உறுதியான நடவடிக்கைகளை எடுக்க வேண்டும் என்று வாதிட்டார். அண்மையில் முதலமைச்சர் சி. ஜோசப் விஜய் எழுதிய கடிதத்தையும் அவர் சுட்டிக்காட்டினார். இலங்கை சிறையில் அடைக்கப்பட்டுள்ள 20 தமிழக மீனவர்களை விரைவாக விடுவிக்கத் தேவையான தூதரக நடவடிக்கைகளை மேற்கொள்ள வேண்டும் என்று அவர் வலியுறுத்தினார். அதேபோல், மூத்த வழக்கறிஞர் பி. வில்சன், இந்த ஒப்பந்தங்களை உறுதிப்படுத்த இந்திய அரசியலமைப்பின் முதல் அட்டவணையில் திருத்தம் கொண்டு வருவது அவசியம் என்று தனது வாதத்தை முன்வைத்தார்.

தமிழக மீனவர்கள் எல்லை தாண்டி மீன்பிடிக்கும் விவகாரத்தில் மத்திய அரசு தரப்பில் ஆஜரான வழக்கறிஞர், மீனவர்களுக்குத் தொடர்ச்சியாக எச்சரிக்கை விடுக்கப்பட்டும், அவர்கள் எல்லை தாண்டவே செய்கின்றனர் என்று தனது தரப்பு விளக்கத்தை அளித்தார். இதற்குப் பதிலளித்த உச்ச நீதிமன்றம், மீனவர்களின் கைது நடவடிக்கைகளைக் குறைக்க ஏதேனும் ஒரு தீர்வு காணப்பட வேண்டும் என்று வலியுறுத்தியது. மீனவர்கள் எல்லைப் பகுதியைத் தாண்டிச் செல்லாமல் இருக்கத் தேவையான விழிப்புணர்வு பணிகளை அரசு மேற்கொள்ள வேண்டும் என அறிவுறுத்திய நீதிமன்றம், வழக்கை ஒத்திவைத்தது.