கவின் கொலை வழக்கு: குற்றம் சாட்டப்பட்டவர்களின் பெற்றோர் மீதான குற்றப்பத்திரிகை ரத்து - உச்சநீதிமன்றம் முக்கிய உத்தரவு

தலித் இளைஞர் கவின் கொலை வழக்கில், குற்றம் சாட்டப்பட்டவர்களின் பெற்றோர்களுக்கு எதிரான குற்றப்பத்திரிகையை ரத்து செய்த உயர்நீதிமன்ற உத்தரவை உச்சநீதிமன்றம் உறுதி செய்துள்ளது.

திருநெல்வேலியில் நடைபெற்ற தலித் மென்பொருள் பொறியாளர் சி.கவின் செல்விகணேஷ் கொலை வழக்கில், குற்றம் சாட்டப்பட்டவர்களின் பெற்றோர்களுக்கு எதிரான குற்றப்பத்திரிகையை ரத்து செய்த சென்னை உயர்நீதிமன்ற மதுரை கிளையின் உத்தரவை உச்சநீதிமன்றம் உறுதி செய்துள்ளது. இந்த வழக்கின் மேல்முறையீட்டு மனுவை விசாரித்த உச்சநீதிமன்ற நீதிபதிகள் பிரசாந்த் குமார் மிஷ்ரா மற்றும் ஸ்ரீ சந்திரசேகர் அடங்கிய அமர்வு, தமிழக அரசின் மனுவை தள்ளுபடி செய்து உத்தரவிட்டுள்ளது. வழக்கை விசாரித்த நீதிபதிகள், இந்த மேல்முறையீட்டு மனுக்களை பரிசீலிக்க நாங்கள் விரும்பவில்லை என்று கூறி மனுக்களை தள்ளுபடி செய்தனர்.

சென்னை சேர்ந்த மென்பொருள் பொறியாளரான கவின், கடந்த 2025-ஆம் ஆண்டு ஜூலை 27 அன்று திருநெல்வேலியில் படுகொலை செய்யப்பட்டார். இது சாதி ரீதியான கௌரவக் கொலை என்று குற்றம் சாட்டப்பட்டது. கவின், தனது காதலியின் சகோதரரான சுர்ஜித் என்பவரால் கொலை செய்யப்பட்டதாகக் கூறப்படுகிறது. இந்த கொலையில் சுர்ஜித்தின் குடும்பத்தினர் சதித்திட்டம் தீட்டியதாகவும், தூண்டுதல் அளித்து உதவியதாகவும் காவல்துறையினர் வழக்குப் பதிவு செய்திருந்தனர். சம்பவம் நடந்த அன்று கவின் தப்பியோட முயன்றபோது, அவரை விரட்டிச் சென்று சுர்ஜித் அரிவாளால் வெட்டிக் கொலை செய்ததாகக் காவல்துறை விசாரணையில் தெரியவந்தது.

இந்தக் கொலை வழக்கில் சுர்ஜித் முதன்மைக் குற்றவாளியாகக் கைது செய்யப்பட்டார். சுர்ஜித்தின் பெற்றோர்களான சரவணன் மற்றும் கிருஷ்ணகுமாரி, இருவரும் தமிழ்நாடு காவல்துறையில் உதவி ஆய்வாளர்களாகப் பணியாற்றி வருபவர்கள். இவர்கள் மீது சதி மற்றும் ஆதாரங்களை அழித்ததாகக் குற்றம் சுமத்தப்பட்டது. சிபி-சிஐடி விசாரணைக்குப் பிறகு தாக்கல் செய்யப்பட்ட குற்றப்பத்திரிகையில் சுர்ஜித், அவரது பெற்றோர் மற்றும் உறவினர் ஜெயபால் ஆகியோர் சேர்க்கப்பட்டிருந்தனர். இருப்பினும், கடந்த செப்டம்பர் மாதம், குற்றம் சாட்டப்பட்ட பெற்றோர்கள் நேரடியாகச் சதியில் ஈடுபட்டதற்கான ஆதாரங்கள் இல்லை என்று கூறி, அவர்களுக்கு எதிரான குற்றப்பத்திரிகையை சென்னை உயர்நீதிமன்ற மதுரை கிளை ரத்து செய்தது.

இந்த உத்தரவை எதிர்த்து தமிழக அரசு உச்சநீதிமன்றத்தில் மேல்முறையீடு செய்தது. கௌரவக் கொலைகள் என்பது குடும்பத்தின் ஒட்டுமொத்த முடிவாகவே இருக்கும் என்றும், ஆயுதங்கள் மீட்கப்படவில்லை என்பதற்காகக் குற்றப்பத்திரிகையை ரத்து செய்யக்கூடாது என்றும் அரசு தரப்பில் வாதிடப்பட்டது. ஆதாரங்களை மதிப்பீடு செய்வது விசாரணை நீதிமன்றத்தின் பணி என்றும், சாதி ரீதியான வன்முறை வழக்குகளில் உயர்நீதிமன்றம் ஆரம்ப கட்டத்திலேயே தலையிடுவது சட்டத்திற்கு எதிரானது என்றும் அரசு வாதங்களை முன்வைத்தது. ஆனால், உச்சநீதிமன்றம் தமிழக அரசின் கோரிக்கையை நிராகரித்து, உயர்நீதிமன்றத்தின் முடிவில் தலையிட மறுத்துவிட்டது.