நவம்பர் 20-ல் திரைக்கு வரும் கிரண் ராஜின் ஜாக்கி 42 - அதிகாரப்பூர்வ அறிவிப்பு

திரைப்பட நடிகர் கிரண் ராஜ் நடிப்பில் உருவாகியுள்ள ஜாக்கி 42 திரைப்படம் நவம்பர் 20-ஆம் தேதி திரைக்கு வருகிறது.

தமிழ் மற்றும் கன்னட திரையுலகில் கவனம் ஈர்த்து வரும் நடிகர் கிரண் ராஜ் நடிப்பில் உருவாகியுள்ள திரைப்படம் ஜாக்கி 42. இந்தத் திரைப்படத்தின் வெளியீட்டுத் தேதியை படக்குழுவினர் தற்போது அதிகாரப்பூர்வமாக அறிவித்துள்ளனர். அதன்படி, குருதேஜ் ஷெட்டி இயக்கத்தில் உருவாகியுள்ள இப்படம் வரும் நவம்பர் 20-ஆம் தேதி கர்நாடகா முழுவதும் உள்ள திரையரங்குகளில் பிரம்மாண்டமாக வெளியாகிறது. ஆரம்பக்கட்டமாக சுமார் 200-க்கும் மேற்பட்ட திரையரங்குகளில் இந்தப் படம் திரையிடப்பட உள்ளதாகத் தகவல்கள் தெரிவிக்கின்றன.

குதிரைப் பந்தயம் மற்றும் சூதாட்டத்தின் பின்னணியில் குடும்ப உறவுகளின் உணர்வுகளை மையப்படுத்தி இந்தப் படம் உருவாக்கப்பட்டுள்ளது. படத்தின் இயக்குநரான குருதேஜ் ஷெட்டி மற்றும் நடிகர் கிரண் ராஜ் ஏற்கனவே ரோனி: தி ரூலர் திரைப்படத்தில் இணைந்து பணியாற்றியுள்ளனர். அந்த வெற்றிக் கூட்டணி தற்போது இரண்டாவது முறையாக இணைந்துள்ளதால், ரசிகர்கள் மத்தியில் இப்படம் பெரும் எதிர்பார்ப்பை ஏற்படுத்தியுள்ளது. கோல்டன் கேட் ஸ்டுடியோஸ் பேனரின் கீழ் பாரதி சத்யநாராயணா இந்தப் படத்தைத் தயாரித்துள்ளார்.

படம் குறித்து இயக்குநர் கூறுகையில், ஜாக்கி 42 திரைப்படம் ஒரு முழுமையான கமர்ஷியல் பொழுதுபோக்கு அம்சங்களைக் கொண்டிருப்பதாகத் தெரிவித்துள்ளார். படத்தில் மூன்று பாடல்கள், அதிரடி சண்டைக் காட்சிகள் மற்றும் நகைச்சுவை என அனைத்து ரசனைகளுக்கும் ஏற்ற அம்சங்கள் இடம் பெற்றுள்ளன. ஏற்கனவே இரண்டு பாடல்கள் வெளியாகி வரவேற்பைப் பெற்றுள்ள நிலையில், அடுத்த பாடல் தசரா பண்டிகையின் போது வெளியிடத் திட்டமிடப்பட்டுள்ளது. இந்தப் படத்திற்கான விநியோக உரிமையை ஜெயண்ணா ஃபிலிம்ஸ் நிறுவனம் பெற்றுள்ளது.

நடிகர் கிரண் ராஜுடன் இணைந்து ரித்திகா ஸ்ரீனிவாஸ் கதாநாயகியாக நடித்துள்ளார். மேலும் யுக்தா பெர்வி, ராஜேந்திர கரந்த், பாலா ராஜ்வாடி, கிரீஷ் ஹெக்டே, அருண் ஆச்சார், யாஷ் ஷெட்டி, தீபக் ராய் பனஜே மற்றும் சாந்தலா காமத் உள்ளிட்ட பல முன்னணி நட்சத்திரங்கள் முக்கிய கதாபாத்திரங்களில் நடித்துள்ளனர். வினோத் யஜமன்யா இசையமைத்துள்ள இந்தப் படத்திற்கு ராகவேந்திரா பி. கோலார் ஒளிப்பதிவு செய்துள்ளார். படத்தின் நடன அமைப்பினை பூஷனும், படத்தொகுப்பினை உமேஷ் ஆர்.பி.யும் மேற்கொண்டுள்ளனர்.