கொளத்தூர் தொகுதி தேர்தல் வெற்றி வழக்கு: மு.க.ஸ்டாலின் தொடர்ந்த மனு தள்ளுபடி - சென்னை உயர் நீதிமன்றம் அதிரடி

கொளத்தூர் தொகுதியில் டி.வி.கே எம்.எல்.ஏ வி.எஸ்.பாபுவின் வெற்றியை ரத்து செய்யக் கோரி மு.க.ஸ்டாலின் தாக்கல் செய்த மனுவை சென்னை உயர் நீதிமன்றம் தள்ளுபடி செய்தது.

சென்னை கொளத்தூர் சட்டமன்றத் தொகுதியில் கடந்த 2026-ஆம் ஆண்டு நடைபெற்ற தேர்தலில், தி.மு.க தலைவர் மு.க.ஸ்டாலின் தோல்வியடைந்ததை எதிர்த்து சென்னை உயர் நீதிமன்றத்தில் தாக்கல் செய்யப்பட்டிருந்த வழக்கு முக்கியத் திருப்பத்தை எட்டியுள்ளது. கொளத்தூர் தொகுதியில் வெற்றி பெற்ற த.வெ.க (டி.வி.கே) எம்.எல்.ஏ வி.எஸ்.பாபுவின் வெற்றியை ரத்து செய்யக் கோரி மு.க.ஸ்டாலின் தொடர்ந்த ரிட் மனுவை, சென்னை உயர் நீதிமன்றத்தின் தலைமை நீதிபதி சுஷ்ருத் அரவிந்த் தர்மாதிகாரி மற்றும் நீதிபதி ஜி. அருள்முருகன் அடங்கிய முதன்மை அமர்வு தள்ளுபடி செய்து உத்தரவிட்டுள்ளது. இந்த மனு விசாரணைக்கு ஏற்புடையதல்ல என்று நீதிமன்றம் திட்டவட்டமாகத் தெரிவித்துள்ளது.

இந்த வழக்கில் வாதாடிய மு.க.ஸ்டாலினின் மூத்த வழக்கறிஞர் கபில் சிபல், தேர்தல் வாக்கு எண்ணிக்கை முடிந்த பிறகு மின்னணு வாக்குப்பதிவு இயந்திரங்களில் (EVM) குளறுபடிகள் மற்றும் முரண்பாடுகள் இருந்ததாகக் குறிப்பிட்டார். குறிப்பாக, 286 மின்னணு வாக்குப்பதிவு இயந்திரங்களைச் சரிபார்க்க வேண்டும் என்றும், வி.வி.பி.ஏ.டி (VVPAT) இயந்திரங்களில் நூறு சதவீதம் சரிபார்ப்பு செய்யப்பட வேண்டும் என்றும் கோரப்பட்டது. கடந்த மே மாதம் 7-ஆம் தேதியே இதற்கான விண்ணப்பம் அளிக்கப்பட்ட போதிலும், இந்தியத் தேர்தல் ஆணையம் 45 நாட்கள் தாமதத்திற்குப் பிறகு, ஜூலை 29-ஆம் தேதிதான் சரிபார்ப்புப் பணிகளைத் தொடங்கியது என்று அவர் வாதிட்டார்.

வாக்குப்பதிவு இயந்திரங்களின் செயல்பாட்டில் இருந்த தொழில்நுட்பக் கோளாறுகள் குறித்து கபில் சிபல் நீதிமன்றத்தில் சுட்டிக்காட்டினார். குறிப்பாக, 208-வது வாக்குச்சாவடியில் மின்னணு வாக்குப்பதிவு இயந்திரத்தில் மு.க.ஸ்டாலினின் பெயர் பதிவாகவில்லை என்பது அதிர்ச்சியளிப்பதாக அவர் வாதிட்டார். தேர்தல் ஆணையத்தின் நடைமுறைகளில் இருந்த இந்தத் தாமதம் மற்றும் குளறுபடிகளைச் சுட்டிக்காட்டி, தேர்தல் முடிவை ரத்து செய்து, தன்னை வெற்றி பெற்றவராக அறிவிக்க வேண்டும் என்று மனுதாரர் தரப்பில் கோரப்பட்டது. தேர்தல் மனு தாக்கல் செய்ய முடியாத சூழல் இருந்ததால், அரசியல் சாசனத்தின் 329-வது பிரிவின் கீழ் உள்ள தடை இதில் பொருந்தாது என்றும் அவர் வாதிட்டார்.

இதற்குப் பதிலளித்த இந்தியத் தேர்தல் ஆணையத்தின் மூத்த வழக்கறிஞர்கள் ஜி. ராஜகோபாலன் மற்றும் தாமா சேஷாத்ரி நாயுடு, இந்த மனு சட்டப்படி செல்லாது என்று வாதிட்டனர். மக்கள் பிரதிநிதித்துவச் சட்டத்தின் பிரிவு 80-ன் கீழ் தேர்தல் மனு தாக்கல் செய்வதே சரியான தீர்வாகும் என்றும், அரசியல் சாசனத்தின் 226-வது பிரிவின் கீழ் ரிட் மனு தாக்கல் செய்வது சட்ட விதிமுறைகளுக்கு எதிரானது என்றும் அவர்கள் வலியுறுத்தினர். மேலும், இத்தகைய மனுக்களை அனுமதிப்பது தேவையற்ற சட்டச் சிக்கல்களுக்கு வழிவகுக்கும் என்று எச்சரித்த நீதிபதிகள், மனுவை தள்ளுபடி செய்து தீர்ப்பளித்தனர். இந்தத் தீர்ப்பு தமிழக அரசியல் களத்தில் பெரும் பேசுபொருளாகியுள்ளது.