கொசஸ்தலை ஆற்றில் கழிவுநீர் கலப்பு: வல்லூர் அனல்மின் நிலையத்திற்கு தேசிய பசுமைத் தீர்ப்பாயம் நோட்டீஸ்

கொசஸ்தலை ஆற்றில் சூடான கழிவுநீரை வெளியேற்றுவதாக எழுந்த புகாரில் வல்லூர் அனல்மின் நிலையத்திற்கு தேசிய பசுமைத் தீர்ப்பாயம் நோட்டீஸ் அனுப்பியுள்ளது.

சென்னை எண்ணூர் பகுதியில் செயல்பட்டு வரும் 1,500 மெகாவாட் திறன் கொண்ட வல்லூர் அனல்மின் நிலையம், விதிகளை மீறி கொசஸ்தலை ஆற்றில் சூடான கழிவுநீரை வெளியேற்றுவதாகப் புகார் எழுந்துள்ளது. இது தொடர்பாக தேசிய பசுமைத் தீர்ப்பாயத்தின் தென்னிந்திய அமர்வு விசாரணை மேற்கொண்டு, சம்பந்தப்பட்ட நிறுவனத்திற்கும் அதிகாரிகளுக்கும் நோட்டீஸ் அனுப்பியுள்ளது. என்.டி.பி.சி தமிழ்நாடு எரிசக்தி நிறுவனம் (NTECL) மூலம் இயக்கப்படும் இந்த அனல்மின் நிலையம், சுற்றுச்சூழல் மற்றும் கடலோர ஒழுங்குமுறை மண்டல விதிகளை மீறுவதாக உள்ளூர் மீனவர் செல்வராஜ் துரைசாமி என்பவர் தாக்கல் செய்த மனுவில் தெரிவிக்கப்பட்டுள்ளது.

கடந்த ஆகஸ்ட் மாதம் 15 மற்றும் 16 ஆகிய தேதிகளில் கொசஸ்தலை ஆற்றில் பெருமளவில் மீன்கள் செத்து மிதந்த நிகழ்வு பெரும் அதிர்ச்சியை ஏற்படுத்தியது. இந்த சம்பவத்தை தொடர்ந்து மீனவர்கள் தரப்பில் இந்த மனு தாக்கல் செய்யப்பட்டுள்ளது. மனுதாரர் மேற்கொண்ட கள ஆய்வின்படி, கடந்த ஆகஸ்ட் 9-ஆம் தேதி கழிவுநீர் வெளியேறும் இடத்திலிருந்து சுமார் 585 மீட்டர் தொலைவில் நீரின் வெப்பநிலை 40.8 டிகிரி செல்சியஸாக இருந்தது கண்டறியப்பட்டுள்ளது. இது சுற்றுச்சூழல் சமநிலைக்கு பெரும் அச்சுறுத்தலாக அமைவதாக மனுவில் குறிப்பிடப்பட்டுள்ளது.

சுற்றுச்சூழல் அனுமதி வழங்கப்பட்ட 2007-ஆம் ஆண்டிலேயே, மின்நிலையம் மீள்சுழற்சி குளிரூட்டும் நீர் அமைப்பையும், இயற்கை வரைவு குளிரூட்டும் கோபுரங்களையும் அமைக்க வேண்டும் என உத்தரவிடப்பட்டிருந்தது. ஆனால், அவை இன்றுவரை முறையாகக் கட்டப்படவில்லை என்பது மனுதாரரின் குற்றச்சாட்டாகும். மேலும், சுத்திகரிக்கப்பட்ட கழிவுநீரை என்.சி.டி.பி.எஸ் (NCTPS) ஏரிக்குக் கொண்டு சென்று, அங்கு நீரின் வெப்பநிலையைச் சூழலுக்கு ஏற்பக் குறைத்து வெளியேற்ற வேண்டும் என்ற நிபந்தனையும் முறையாகப் பின்பற்றப்படவில்லை எனத் தெரிவிக்கப்பட்டுள்ளது.

நிலக்கரி சேமிப்பு கிடங்கு மற்றும் கடல்நீர் சுத்திகரிப்பு ஆலை ஆகியவற்றிலிருந்து வரும் கழிவுநீரும், முறையான சுத்திகரிப்பு இன்றி நேரடியாகக் கால்வாய் வழியாக கொசஸ்தலை ஆற்றில் கலப்பதாக ஆதாரங்களுடன் புகார் கூறப்பட்டுள்ளது. கடந்த 2018-ஆம் ஆண்டிலேயே மத்திய சுற்றுச்சூழல் அமைச்சகத்தின் ஆய்வின்போது, கட்டாயமாக்கப்பட்ட குளிரூட்டும் கோபுரங்கள் இல்லாததும், வளாகத்திற்கு வெளியே கழிவுநீர் வெளியேற்றப்படுவதும் உறுதி செய்யப்பட்டதாகக் கூறப்படுகிறது. தற்போது சமர்ப்பிக்கப்பட்டுள்ள செயற்கைக்கோள் புகைப்படங்கள் மற்றும் இதர ஆதாரங்களை ஆய்வு செய்த தேசிய பசுமைத் தீர்ப்பாயம், கொசஸ்தலை ஆற்றில் கழிவுநீர் கலப்பதைத் தடுப்பது குறித்தும், சுற்றுச்சூழல் விதிகளை முழுமையாகப் பின்பற்றுவது குறித்தும் விரிவான பதிலளிக்க உத்தரவிட்டுள்ளது.