தமிழ்நாட்டிற்கு கடத்தப்பட்ட லார் கிப்பன் குரங்குகள்: மணிப்பூர் வனத்துறை அதிர்ச்சி தகவல்

மணிப்பூரில் இருந்து தமிழ்நாட்டிற்கு கொண்டுவரப்பட்ட லார் கிப்பன் குரங்குகள் மீதான அனுமதியை அம்மாநில வனத்துறை மறுத்துள்ளது.

நடிகர் விக்ரம் லார் கிப்பன் குரங்குடன் இருக்கும் புகைப்படம் சமூக வலைதளங்களில் வைரலாகி சர்ச்சையை ஏற்படுத்திய நிலையில், இந்த விவகாரத்தில் தற்போது முக்கிய திருப்பம் ஏற்பட்டுள்ளது. ஈரோட்டைச் சேர்ந்த வனவிலங்கு வர்த்தகர் எஸ்.கே. கேசவநாதன், இந்த லார் கிப்பன் குரங்குகளை மணிப்பூரில் இருந்து சட்டப்பூர்வமாகப் பெற்றதாகத் தெரிவித்திருந்தார். ஆனால், இந்தத் தகவல் தவறானது என்பதை மணிப்பூர் மாநில வனத்துறை தற்போது உறுதிப்படுத்தியுள்ளது. லார் கிப்பன் குரங்குகளை இடமாற்றம் செய்ய தாங்கள் எந்தவிதமான சான்றிதழ்களையும் வழங்கவில்லை என்றும், இதற்கான அனுமதியை அளிக்கவில்லை என்றும் மணிப்பூர் வனத்துறை அதிகாரப்பூர்வமாகத் தெரிவித்துள்ளது.

லார் கிப்பன் வகை குரங்குகள் 'CITES' எனப்படும் அழிந்து வரும் வனவிலங்குகள் பாதுகாப்புப் பிரிவின் கீழ் மிக முக்கியமான பட்டியலில் இடம்பெற்றுள்ளன. இவற்றைக் கையாள சர்வதேச அளவிலான வர்த்தக அனுமதி, மத்திய வெளியுறவு வர்த்தக இயக்குநரகத்தின் ஆவணங்கள் மற்றும் மாநிலங்களுக்கு இடையேயான இடமாற்றத்திற்கான வனவிலங்கு காப்பாளர் அனுமதி ஆகியவை கட்டாயமாகும். ஆனால், கேசவநாதன் வழங்கிய ஆவணங்கள் போலி எனத் தெரியவந்துள்ளதால், இந்த விலங்குகள் எப்படி மணிப்பூரில் இருந்து தமிழ்நாட்டிற்குள் கொண்டு வரப்பட்டன என்பது குறித்து ஈரோடு வனத்துறையினர் தீவிர விசாரணை நடத்தி வருகின்றனர்.

ஈரோடு வனத்துறை அதிகாரி கே.வி. அப்பளா நாயுடு இது குறித்துக் கூறுகையில், மணிப்பூர் வனத்துறையிடமிருந்து தங்களுக்குக் கிடைத்த தகவல் இந்த வழக்கிற்குப் பெரும் வலுசேர்ப்பதாக உள்ளது என்றார். குறிப்பாக, கேசவநாதன் 'பரிவேஷ்' இணையதளத்தில் பதிவேற்றியிருந்த ஆவணங்கள் அந்த விலங்குகளுடன் தொடர்புடையவை அல்ல என்பது கண்டறியப்பட்டுள்ளது. மணிப்பூர் வனத்துறை காப்பாளர், கேசவநாதன் தாக்கல் செய்த விண்ணப்பங்கள் வேறு சில காரணங்களுக்காகத் தொடரப்பட்டவை என்று உறுதிப்படுத்தியுள்ளார். தற்போது, ஈரோடு வனத்துறையினர் சம்பந்தப்பட்ட வர்த்தகரிடம் தொடர்ந்து விசாரணை நடத்த முயற்சித்து வருகின்றனர்.

இந்த வழக்கில் சிக்கியுள்ள தொழிலதிபர் சி.கே. ரங்கநாதனின் மேலாளரிடம் வனத்துறையினர் விசாரணை மேற்கொண்டனர். அந்த மேலாளர் அளித்த வாக்குமூலத்தில், தாங்கள் அந்தக் குரங்குகளை விலைக்கு வாங்கத் திட்டமிட்டிருந்ததாகவும், ஆனால் அவற்றின் ஆரோக்கியம் மற்றும் ஆவணங்கள் சரியாக இல்லாததால் மீண்டும் வர்த்தகரிடமே ஒப்படைத்துவிட்டதாகவும் கூறியுள்ளார். இதற்கிடையே, ஈரோட்டில் உள்ள அந்தப் பண்ணையில் இருந்த ஒரு ஆண் செர்வால் பூனை உயிரிழந்துள்ள சம்பவம் சோகத்தை ஏற்படுத்தியுள்ளது. அதன் உடல் உறுப்புகளில் அடைப்பு இருந்ததாகத் தொடக்கக்கட்ட ஆய்வில் தெரியவந்துள்ளது. இந்தச் சம்பவங்கள் தமிழகத்தில் வனவிலங்கு கடத்தல் மற்றும் சட்டவிரோத வளர்ப்பு விவகாரங்களில் பெரும் அதிர்வுகளை ஏற்படுத்தியுள்ளது.