அக்டோபர் 23-ல் வெளியாகிறது லியோ சிவகுமார் - ராதிகா சரத்குமாரின் டெலிவரி பாய்

லியோ சிவகுமார் மற்றும் ராதிகா சரத்குமார் நடிப்பில் உருவாகியுள்ள 'டெலிவரி பாய்' திரைப்படம் அக்டோபர் 23-ஆம் தேதி திரையரங்குகளில் வெளியாகிறது.

நடிகர் லியோ சிவகுமார் முதன்மைக் கதாபாத்திரத்தில் நடிக்கும் 'டெலிவரி பாய்' திரைப்படம், திரையரங்குகளில் வெளியாகும் தேதியை அதிகாரப்பூர்வமாக படக்குழுவினர் அறிவித்துள்ளனர். நீண்ட எதிர்பார்ப்புகளுக்கு மத்தியில் உருவாகியுள்ள இப்படம், வரும் அக்டோபர் 23-ஆம் தேதி திரைக்கு வரத் தயாராக உள்ளது. இந்த அறிவிப்பு படத்தின் மீதான ஆர்வத்தை ரசிகர்களிடையே அதிகரித்துள்ளது.

நானி எழுதி இயக்கும் இந்தத் திரைப்படத்தில், லியோ சிவகுமார் ஒரு டெலிவரி பணியாளராக முக்கிய கதாபாத்திரத்தில் அறிமுகமாகிறார். ஏற்கனவே அழகிய கண்ணே, சாமானியன் மற்றும் கோழிப்பண்ணை செல்லதுரை போன்ற படங்களில் குணச்சித்திர வேடங்களில் நடித்துத் தனது திறமையை நிரூபித்த லியோ, இந்தப் படத்தின் மூலம் கதாநாயகனாகக் களமிறங்குவது குறிப்பிடத்தக்கது. இவருடன் இணைந்து மூத்த நடிகை ராதிகா சரத்குமார் முக்கியக் கதாபாத்திரத்தில் நடித்துள்ளார்.

படத்தின் மற்ற நட்சத்திரப் பட்டாளத்தில் காளி வெங்கட், பிரிஜிடா சகா, ஜென்சன் திவாகர் மற்றும் துஷ்யந்த் ஜெயப்பிரகாஷ் ஆகியோர் முக்கிய வேடங்களில் நடித்துள்ளனர். ஆசசி கிரியேஷன்ஸ் சார்பில் அமுதா லியோனி மற்றும் லெனின் மாதவேஸ்வரன் தயாரித்துள்ள இப்படம், தொழில்நுட்ப ரீதியாகவும் வலுவாக அமைந்துள்ளது. அசோக்குமார் ராஜ் மற்றும் பிரசன்னா எஸ்.குமார் ஒளிப்பதிவு செய்ய, சுந்தரமூர்த்தி கே.எஸ். இசையமைத்துள்ளார். மேலும் ஆர்.வசந்தகுமார் படத்தொகுப்பிலும், பீனிக்ஸ் பிரபு சண்டைப் பயிற்சியிலும் பணியாற்றியுள்ளனர்.

நடப்பாண்டு ராதிகா சரத்குமாருக்கு மிகவும் பரபரப்பான ஆண்டாக அமைந்திருக்கிறது. ஏற்கனவே தாய் கிழவி, விஸ்வநாத் அண்ட் சன்ஸ், பியார் பிரேமா கல்யாணம் மற்றும் ஹாய் என நான்கு படங்களில் நடித்துத் தனது நடிப்புப் பயணத்தைத் தொடர்ந்து வருகிறார். லியோ சிவகுமார் நடிப்பில் ஏற்கனவே மாண்புமிகு பறை மற்றும் சாமானியன் படங்கள் வெளியாகியுள்ள நிலையில், தற்போது டெலிவரி பாய் திரைப்படம் ரசிகர்களின் எதிர்பார்ப்பைப் பெற்றுள்ளது.