எம்.எல்.எஸ் கால்பந்து: மாண்ட்ரியல் அணியை 7-1 என்ற கோல் கணக்கில் வீழ்த்தி மிரட்டிய லயோனல் மெஸ்ஸி

எம்.எல்.எஸ் கால்பந்து போட்டியில் மாண்ட்ரியல் அணிக்கு எதிரான ஆட்டத்தில் லயோனல் மெஸ்ஸி 4 கோல்கள் அடித்து அதிரடி வெற்றி தேடித்தந்துள்ளார்.

அமெரிக்காவின் எம்.எல்.எஸ் (MLS) கால்பந்து லீக் தொடரில் நடைபெற்ற விறுவிறுப்பான ஆட்டத்தில், லயோனல் மெஸ்ஸி தலைமையிலான இன்டர் மியாமி அணி 7-1 என்ற கோல் கணக்கில் சி.எஃப் மாண்ட்ரியல் அணியை வீழ்த்தி அபார வெற்றி பெற்றது. இந்த ஆட்டத்தில் லயோனல் மெஸ்ஸி தனது அபாரமான ஆட்டத்தை வெளிப்படுத்தி, ஒரே ஆட்டத்தில் நான்கு கோல்களை அடித்து அசத்தினார். இது அவரது எம்.எல்.எஸ் தொழில் வாழ்க்கையில் முதல் முறையாக ஒரு ஆட்டத்தில் நான்கு கோல்கள் அடித்த சாதனையாகும். இதனுடன் ஒரு கோல் அடிக்க உதவியாகவும் இருந்து அணியின் வெற்றிக்கு வித்திட்டார்.

ஆட்டத்தின் தொடக்கத்திலேயே இன்டர் மியாமி வீரர்கள் சிறப்பான ஒருங்கிணைப்பை வெளிப்படுத்தினர். ஆட்டத்தின் 20-வது நிமிடத்தில் டெலாஸ்கோ செகோவியாவின் கார்னர் கிக் வாய்ப்பைப் பயன்படுத்தி கார்லோஸ் காசிமிரோ தலையால் முட்டி கோல் அடித்தார். இது அவரது ஆறாவது லீக் ஆட்டத்தில் அமைந்த முதல் கோலாகும். தொடர்ந்து 37-வது நிமிடத்தில் மாண்ட்ரியல் வீரர் ஃபேபியன் ஹெர்பர்ஸ் கோல் அடித்து சமநிலையை ஏற்படுத்தினாலும், அதற்குப் பிறகு இன்டர் மியாமி அணி தனது முழு பலத்தையும் காட்டியது.

லியோனல் மெஸ்ஸி 40-வது நிமிடத்தில் ஒரு அபாரமான ஃப்ரீ கிக் மூலம் கோல் அடித்து அணியை முன்னிலைப்படுத்தினார். பின்னர் 52-வது நிமிடத்தில் தனது இரண்டாவது கோலையும், 83-வது நிமிடத்தில் மூன்றாவது கோலையும் பதிவு செய்தார். ஆட்டத்தின் கூடுதல் நேரத்தில் ஒரு ஃப்ரீ கிக் மூலம் தனது நான்காவது கோலை மெஸ்ஸி அடித்தது மைதானத்தில் இருந்த ரசிகர்களை உற்சாகத்தில் ஆழ்த்தியது. இந்த சீசனில் மட்டும் மெஸ்ஸி இதுவரை 18 கோல்களை அடித்து கோல்டன் பூட் விருதுக்கான போட்டியில் முன்னிலை வகிக்கிறார்.

இன்டர் மியாமி அணியின் வெற்றிக்கு லூயிஸ் சுவாரஸ் மற்றும் அலெக்சாண்டர் ஷா ஆகியோரும் வலு சேர்த்தனர். சுவாரஸ் 80-வது நிமிடத்தில் தனது 11-வது கோலை மெஸ்ஸியின் உதவியுடன் பதிவு செய்தார். இளம் வீரரான 18 வயது அலெக்சாண்டர் ஷா 89-வது நிமிடத்தில் தனது முதல் கோலை அடித்தார். இன்டர் மியாமி அணி இந்த வெற்றியைத் தொடர்ந்து தனது வெற்றிப் பயணத்தைத் தொடர்கிறது. மாண்ட்ரியல் அணி தரப்பில் கோல்கீப்பர் தாமஸ் கில்லர் ஐந்து தடுப்புகளைச் செய்தாலும், மெஸ்ஸியின் அதிரடி தாக்குதலைத் தடுக்க முடியவில்லை.