தமிழகத்தில் மதுபான விலை உயர்வு? சுற்றுச்சூழல் மற்றும் சமூக நல வரி விதிப்பு அமலுக்கு வருகிறது

தமிழகத்தில் மதுபானங்கள் மீதான புதிய சுற்றுச்சூழல் மற்றும் சமூக நல வரி விதிப்பு அமலுக்கு வருவதால், மது பாட்டில் விலையை உயர்த்துவதற்கான வாய்ப்புகள் அதிகரித்துள்ளன.

தமிழகத்தில் மதுபானங்களின் விலை மீண்டும் உயரும் சூழல் உருவாகியுள்ளது. மாநில அரசு மதுபான விற்பனை மீதான புதிய சுற்றுச்சூழல் மற்றும் சமூக நல வரியை அமல்படுத்தத் திட்டமிட்டுள்ளது. இதன்படி, விற்கப்படும் ஒவ்வொரு மதுபான பாட்டில் அல்லது டின் ஆகியவற்றின் மீது அதிகபட்சம் 20 ரூபாய் வரை புதிய வரி வசூலிக்கப்பட உள்ளது. இந்த வரி மூலம் கிடைக்கும் வருவாயானது மாநிலத்தின் சுற்றுச்சூழல் பாதுகாப்பு மற்றும் பல்வேறு சமூக நலத் திட்டங்களைச் செயல்படுத்துவதற்காகப் பயன்படுத்தப்பட உள்ளதாக அரசு தரப்பில் தெரிவிக்கப்பட்டுள்ளது.

இந்த புதிய வரி விதிப்பு தொடர்பான அறிவிப்பு, தமிழ்நாடு மதிப்பு கூட்டு வரி சட்டத் திருத்தத்தின் கீழ் மேற்கொள்ளப்பட்டுள்ளது. வணிக வரி மற்றும் பதிவுத்துறை அமைச்சரான டி. லோகேஷ் தமிழ்செல்வன் அவர்களால், கடந்த ஆகஸ்ட் 7 ஆம் தேதி சட்டப்பேரவையில் இந்த சட்டத் திருத்த மசோதா தாக்கல் செய்யப்பட்டது. தொடர்ந்து, கடந்த செப்டம்பர் 2 ஆம் தேதி ஆளுநரின் ஒப்புதலும் இதற்குப் பெறப்பட்டுள்ளது. இதனால், அரசின் முறையான அறிவிப்பு வெளியான பிறகு, மதுபானங்களுக்கான சில்லறை விற்பனை விலையில் மாற்றம் ஏற்படும் என எதிர்பார்க்கப்படுகிறது.

தமிழக அரசு இன்னும் இந்த வரிக்கான சரியான விகிதத்தை அதிகாரப்பூர்வமாக அறிவிக்கவில்லை என்றாலும், விரைவில் இதற்கான அறிவிப்பு வெளியாகும் எனத் தெரிகிறது. இந்த அறிவிப்பு வெளியான பிறகு, டாஸ்மாக் கடைகளில் விற்பனை செய்யப்படும் மதுபானங்களின் விலையை உயர்த்த அரசு நடவடிக்கை எடுக்கும் என்று கூறப்படுகிறது. இது நடைமுறைக்கு வரும் பட்சத்தில், மாநிலம் முழுவதும் மதுபானங்களின் விலையில் குறிப்பிடத்தக்க மாற்றம் இருக்கும்.

கடந்த 2024 ஆம் ஆண்டு பிப்ரவரி 1 ஆம் தேதி மதுபானங்களின் விலை கடைசியாக உயர்த்தப்பட்டது. அப்போது பல்வேறு மதுபான வகைகளின் விலைகள் 10 ரூபாய் முதல் 80 ரூபாய் வரை அதிகரிக்கப்பட்டன. அந்த விலையேற்றத்திற்குப் பிறகு தற்போதுதான் மீண்டும் ஒரு விலை உயர்வுக்கான சூழல் உருவாகியுள்ளது. இந்த புதிய வரி அமல்படுத்தப்பட்டால், இரண்டு ஆண்டுகளுக்கும் மேலாக நீடித்த விலைக்குப் பிறகு மேற்கொள்ளப்படும் முதல் திருத்தமாக இது அமையும்.