தமிழகத்தில் மூடப்பட்ட 717 டாஸ்மாக் கடைகளின் பட்டியல் மீண்டும் வெளியீடு: அமைச்சர் விக்னேஷ் விளக்கம்

தமிழகத்தில் மூடப்பட்ட 717 டாஸ்மாக் கடைகளின் விவரப்பட்டியலை அமைச்சர் கே.விக்னேஷ் மீண்டும் வெளியிட்டுள்ளார்.

தமிழக சட்டப்பேரவைக் கூட்டத்தொடரின் போது, எதிர்க்கட்சி மற்றும் ஆளும் கட்சி உறுப்பினர்களின் தொடர் கோரிக்கைகளைத் தொடர்ந்து, மாநிலத்தில் ஏற்கனவே மூடப்பட்ட 717 டாஸ்மாக் கடைகளின் விவரப்பட்டியலை மதுவிலக்கு மற்றும் ஆயத்தீர்வைத்துறை அமைச்சர் கே.விக்னேஷ் மீண்டும் வெளியிட்டுள்ளார். தலைமைச் செயலகத்தில் செய்தியாளர்களைச் சந்தித்த அமைச்சர், இக்கடைகள் தொடர்பான முழுமையான விவரங்கள் ஏற்கனவே சமூக வலைதளங்களில் பகிரப்பட்டிருந்தாலும், பல உறுப்பினர்களுக்கு அது குறித்த தெளிவான தகவல் சென்றடையாத காரணத்தினால் மீண்டும் பொதுவெளியில் சமர்ப்பிக்கப்படுவதாகத் தெரிவித்தார்.

தமிழகத்தில் டாஸ்மாக் கடைகளை மூடுவது மற்றும் இடமாற்றம் செய்வது குறித்த அரசின் கொள்கை முடிவுகளை அமைச்சர் விக்னேஷ் தெளிவுபடுத்தினார். சில சட்டப்பேரவை உறுப்பினர்கள் கடைகளை ஓரிடத்தில் இருந்து மற்றொரு இடத்திற்கு மாற்றாமல் நிரந்தரமாக மூட வேண்டும் என்று வலியுறுத்தியிருந்தனர். இதற்கு பதிலளித்த அமைச்சர், ஒரு கடையை முழுமையாக மூடும் போது, அந்தப் பகுதியில் உள்ள மதுப்பிரியர்கள் அருகிலுள்ள மற்ற கடைகளுக்குச் செல்வதால் கூட்டம் அதிகரிப்பதாகவும், அந்தந்த பகுதிகளில் உள்ள பணியாளர்களுக்கு கூட்டத்தைக் கட்டுப்படுத்துவதில் சிரமங்கள் ஏற்படுவதாகவும் குறிப்பிட்டார். இதனால், கடைகளை மூடுவதற்குப் பதிலாகச் சூழலுக்கு ஏற்ப இடமாற்றம் செய்யும் முறையையே அரசு தற்போது பின்பற்றி வருவதாக அவர் தெரிவித்தார்.

டாஸ்மாக் கடைகளுக்கு அருகிலேயே மதுக்கூடங்கள் அமைப்பது தொடர்பான புதிய விதிமுறைகள் குறித்துப் பேசிய அமைச்சர், தற்போதுள்ள நடைமுறையில் குறிப்பிட்ட நபர்கள் மட்டுமே தொடர்ந்து டெண்டர்களைப் பெற்று வருவதைச் சுட்டிக்காட்டினார். ஜனநாயக நாட்டில் அனைவருக்கும் வாய்ப்பு கிடைக்க வேண்டும் என்ற அடிப்படையில், சில்லறை விற்பனைக் கடைகளுக்கு அருகிலேயே மதுக்கூடங்களை அமைக்க அனுமதி வழங்கப்பட்டுள்ளது. இதன் மூலம் அதிகப்படியான நபர்கள் டெண்டர் நடைமுறைகளில் பங்கேற்க வழிவகை செய்யப்பட்டுள்ளது என்று அவர் விளக்கம் அளித்தார். மேலும், நுகர்வோர்களின் விருப்பத்திற்கேற்ப பிரீமியம் ரக மதுபானங்கள் மற்றும் பீர் வகைகளை அறிமுகம் செய்யும் பணிகள் நடைபெற்று வருவதாகவும் அவர் குறிப்பிட்டார்.

திருவள்ளூர் மாவட்டம் பூந்தமல்லியைச் சேர்ந்த என்ரிகா என்டர்பிரைசஸ் நிறுவனத்தின் 11 மதுபான ரகங்களுக்கு விதிக்கப்பட்ட தடை மற்றும் அதனை அடுத்த நாளே திரும்பப் பெற்றது குறித்த கேள்விக்கு, அமைச்சர் விக்னேஷ் மத்திய அரசின் வழிகாட்டுதலின் படியே நடவடிக்கை எடுக்கப்பட்டதாகத் தெரிவித்தார். மத்திய அரசின் உத்தரவுப்படி விற்பனை நிறுத்தப்பட்டதாகவும், பின்னர் அதே மத்திய அரசின் அறிவுறுத்தலின் பேரில் தடை திரும்பப் பெறப்பட்டதாகவும் அவர் தெரிவித்தார். இந்த விவகாரத்தில் மாநில அரசு எந்தவொரு தனிப்பட்ட முடிவையும் எடுக்கவில்லை என்றும், மத்திய அரசின் நடைமுறைகளை மட்டுமே பின்பற்றியதாகவும் அவர் திட்டவட்டமாகக் கூறினார்.