லாஸ் ஏஞ்சல்ஸ் மேயர் நித்யா ராமன்: சென்னை வீதிகளில் தொடங்கிய சமூக மாற்றத்திற்கான பயணம்

லாஸ் ஏஞ்சல்ஸ் மாநகராட்சி மேயராகப் பொறுப்பேற்கவுள்ள நித்யா ராமன், தனது பொதுப்பணி மற்றும் சமூகச் செயல்பாடுகளின் தொடக்கப் புள்ளியாக சென்னையை முன்வைக்கிறார்.

அமெரிக்காவின் இரண்டாவது மிகப்பெரிய நகரமான லாஸ் ஏஞ்சல்ஸ் மாநகராட்சியின் மேயராகத் தேர்ந்தெடுக்கப்பட்டுள்ள நித்யா ராமனின் அரசியல் மற்றும் சமூகச் செயல்பாடுகளுக்குப் பின்னால், சென்னை மாநகரின் முக்கியத் தொடர்புகள் இருப்பது தற்போது வெளிச்சத்திற்கு வந்துள்ளது. தேர்தல் அரசியலில் களமிறங்குவதற்கு முன்னரே, அவர் சென்னையில் வசிக்கும் சாமானிய மக்களின் அடிப்படை உரிமைகளுக்காகவும், குறிப்பாக விளிம்புநிலை மக்களின் அடிப்படைத் தேவைகளுக்காகவும் தீவிரமாகப் போராடியுள்ளார். பொதுக் கழிப்பிடங்கள் போன்ற அடிப்படை வசதிகள் கூட இல்லாத சூழலில், மக்கள் ஏன் போராட வேண்டியுள்ளது என்பதை சென்னை வீதிகளில் அவர் நேரடியாகக் களமிறங்கி ஆய்வு செய்துள்ளார்.

கடந்த 2010 ஆம் ஆண்டில், சென்னை ஐஐடி ஆராய்ச்சி பூங்காவில் உள்ள நிதி மேலாண்மை மற்றும் ஆராய்ச்சி நிறுவனத்தின் (IFMR) கீழ், 'ட்ரான்ஸ்பரண்ட் சென்னை' (Transparent Chennai) என்ற தரவு மற்றும் ஆராய்ச்சி அமைப்பை நித்யா ராமன் தொடங்கினார். பொதுச் சேவைகள் குறித்த தரவுகளைச் சேகரித்து, அவற்றை வரைபடமாக்குவதன் மூலம் அதிகாரிகளிடம் மக்கள் கேள்வி எழுப்ப ஆதாரங்களை உருவாக்குவதே இந்த அமைப்பின் முதன்மை நோக்கமாக இருந்தது. இந்த ஆய்வின் மூலம், நகரின் பல்வேறு பகுதிகளில், குறிப்பாக குடிசை மாற்று வாரிய குடியிருப்புகளில் அடிப்படை வசதிகள் பற்றாக்குறையாக இருப்பதை அவர் ஆவணப்படுத்தினார்.

அவருடன் பணியாற்றிய சக ஆய்வாளர்கள் மற்றும் வல்லுநர்கள், நித்யா ராமனின் அர்ப்பணிப்பு மற்றும் ஒழுக்கத்தை வெகுவாகப் பாராட்டுகின்றனர். பொதுக் கழிப்பிடங்களின் தேவை, குடிசைப் பகுதிகளில் வசிக்கும் மக்களின் இடப்பெயர்ச்சியின் போது வாழ்வாதாரம் பாதிக்கப்படாமல் இருப்பதை உறுதி செய்தல் மற்றும் அடிப்படை வசதிகளை மேம்படுத்துதல் போன்றவற்றில் அவர் மிகுந்த கவனம் செலுத்தினார். குடிசைப் பகுதிகளில் உள்ள தரவுகளை அரசாங்கத்தின் தரவுகளுடன் ஒப்பிட்டு, எந்தெந்த பகுதிகளில் போதிய கவனம் செலுத்தப்படவில்லை என்பதை வரைபடங்கள் மூலம் அவர் சுட்டிக்காட்டியது குறிப்பிடத்தக்கது. இது பொதுப் பணிகளைச் சரிவரக் கண்காணிக்க அரசுக்கு ஒரு சிறந்த கருவியாக அமைந்தது.

குறிப்பாக, 2010 ஆம் ஆண்டில் சென்னை மாநகர பேருந்து வழித்தடங்களுக்காக அவர் உருவாக்கிய எளிய வரைபடம் அப்போதைய மக்களிடையே மிகுந்த வரவேற்பைப் பெற்றது. கூகுள் மேப்ஸ் பயன்பாடு தற்போதைய அளவில் இல்லாத அந்த காலகட்டத்தில், ஒரு இடத்தில் இருந்து மற்றொரு இடத்திற்குச் செல்லும் பேருந்து எண்களை அறிய, ஜிபிஎஸ் கருவிகள் மற்றும் நேரடி கள ஆய்வுகள் மூலம் இந்த வரைபடம் உருவாக்கப்பட்டது. பேருந்து வழித்தடங்கள் மட்டுமின்றி, பொதுக் கழிப்பிடங்கள், விபத்து நடக்கும் இடங்கள் மற்றும் எம்ஆர்டிஎஸ் நிலையங்களை உள்ளடக்கிய இந்த வரைபடம் மக்களின் அன்றாடப் பயணத்தை எளிதாக்கியது. தற்போது லாஸ் ஏஞ்சல்ஸ் மேயராகத் தனது புதிய இன்னிங்ஸைத் தொடங்கியுள்ள நித்யா ராமனின் இந்த நீண்ட காலப் பணி அனுபவங்கள், அவர் சென்னையில் விதைத்த சமூக மாற்றத்திற்கான விதைகளாகவே பார்க்கப்படுகின்றன.