எம்.எல்.ஏ-க்கள் ராஜினாமா செய்துவிட்டு போட்டியிடுவதை தடுக்க முடியாது: சென்னை உயர் நீதிமன்றம் திட்டவட்டம்

மதுராந்தகம் மற்றும் தாராபுரம் இடைத்தேர்தலை ரத்து செய்யக்கோரிய மனுவை சென்னை உயர் நீதிமன்றம் தள்ளுபடி செய்துள்ளது.

சட்டமன்ற உறுப்பினர்கள் பதவியை ராஜினாமா செய்துவிட்டு, மீண்டும் அதே தொகுதிகளில் இடைத்தேர்தலில் போட்டியிடுவதைத் தடுக்கும் வகையில் எந்தவொரு சட்டத்தையும் நீதிமன்றத்தால் இயற்ற முடியாது என்று சென்னை உயர் நீதிமன்றம் தெளிவுபடுத்தியுள்ளது. மதுராந்தகம் மற்றும் தாராபுரம் ஆகிய சட்டமன்றத் தொகுதிகளுக்கு அக்டோபர் 6-ம் தேதி நடைபெறவிருக்கும் இடைத்தேர்தலை நிறுத்தி வைக்கக் கோரி தாக்கல் செய்யப்பட்ட பொதுநல மனுவை, தலைமை நீதிபதி சுஷ்ருத் அரவிந்த் தர்மாதிகாரி மற்றும் நீதிபதி ஜி. அருள் முருகன் அடங்கிய முதல் அமர்வு தள்ளுபடி செய்து உத்தரவிட்டுள்ளது.

கடந்த 2026-ம் ஆண்டு நடைபெற்ற சட்டமன்றத் தேர்தலில் வெற்றி பெற்ற அதிமுகவைச் சேர்ந்த மரகதம் குமரவேல் மற்றும் பி. சத்தியபாமா ஆகியோர், பதவியேற்ற சில காலத்திலேயே ராஜினாமா செய்துவிட்டு தவெக கட்சியில் இணைந்தனர். இதனைத் தொடர்ந்து, அந்த இடங்கள் காலியானதாக அறிவிக்கப்பட்டு இடைத்தேர்தல் அறிவிக்கப்பட்டது. இந்தச் சூழலில், சைதாப்பேட்டையைச் சேர்ந்த வழக்கறிஞர் கே. சுதன் என்பவர் உயர் நீதிமன்றத்தில் பொதுநல மனு ஒன்றைத் தாக்கல் செய்திருந்தார். அதில், மக்கள் பிரதிநிதிகள் பதவியை ராஜினாமா செய்வதால் ஏற்படும் இடைத்தேர்தலுக்கான செலவுகளை சம்பந்தப்பட்ட நபர்களே ஏற்க வேண்டும் என்றும், அடுத்த ஐந்து ஆண்டுகளுக்கு அவர்கள் தேர்தலில் போட்டியிடத் தடை விதிக்கப்பட வேண்டும் என்றும் கோரியிருந்தார்.

இந்த மனுவை விசாரித்த நீதிபதிகள், சட்டமன்ற உறுப்பினர்களின் ராஜினாமா விவகாரத்தில் ஒரு தண்டனை மற்றும் நிதி சார்ந்த கட்டுப்பாட்டு அமைப்பை உருவாக்குமாறு கோருவது, நீதிமன்றத்தின் அதிகார வரம்பிற்கு அப்பாற்பட்டது என்று கருத்து தெரிவித்தனர். சட்டத்தின் அடிப்படையில் ஒருவரைத் தேர்தலில் போட்டியிடவிடாமல் தடுக்கும் இத்தகைய விதிகளை உருவாக்குவது, நீதித்துறை சார்ந்த கட்டளை அல்ல, அது முற்றிலும் சட்டமன்றம் மற்றும் நிர்வாகம் சார்ந்த கொள்கை முடிவாகும் என்று நீதிபதிகள் சுட்டிக்காட்டினர். இந்திய அரசியலமைப்புச் சட்டத்திலோ அல்லது 1951-ம் ஆண்டு மக்கள் பிரதிநிதித்துவ சட்டத்திலோ இத்தகைய நிபந்தனைகளுக்கு எந்தவிதமான ஆதாரமும் இல்லை என்று அமர்வு கூறியுள்ளது.

ராஜினாமா செய்யும் சட்டமன்ற உறுப்பினர்கள் மீது மட்டும் இத்தகைய கட்டுப்பாடுகளை விதிப்பது, அரசியல் சாசனத்தின் 14-வது பிரிவுக்கு எதிரானதாக அமையும் என்றும் நீதிமன்றம் எச்சரித்தது. சட்டப்பேரவை உறுப்பினர் பதவியை ராஜினாமா செய்வது என்பது அரசியலமைப்புச் சட்டத்தின் ஒரு அங்கமாகும், அதற்கு கூடுதல் சுமையையோ அல்லது சட்டத்திற்குப் புறம்பான நிபந்தனைகளையோ நீதிமன்ற உத்தரவின் மூலம் விதிக்க முடியாது என்றும் நீதிபதிகள் விளக்கமளித்தனர். எனவே, இந்த இடைத்தேர்தலைத் தடுக்க கோரிய மனுவை சட்டப்படி ஏற்க முடியாது எனத் தள்ளுபடி செய்து நீதிமன்றம் உத்தரவிட்டது.