பொருளாதார நிபுணர் கலையரசன் கைது விவகாரம்: தமிழக அரசுக்கு சென்னை உயர் நீதிமன்றம் சரமாரி விமர்சனம்

பொருளாதார நிபுணர் கலையரசன் சட்டவிரோதமாக தடுத்து வைக்கப்பட்ட விவகாரத்தில் தமிழக அரசுக்கு சென்னை உயர் நீதிமன்றம் கடும் கண்டனம் தெரிவித்துள்ளது.

சென்னை உயர் நீதிமன்றம், பொருளாதார நிபுணர் மற்றும் மெட்ராஸ் வளர்ச்சி ஆராய்ச்சி நிறுவனத்தின் (MIDS) இணைப் பேராசிரியர் ஏ.கலையரசன் சட்டவிரோதமாக தடுத்து வைக்கப்பட்ட விவகாரத்தில், தமிழ்நாடு அரசுக்கு எதிராக மிகக் கடுமையான கருத்துக்களைப் பதிவு செய்துள்ளது. சமூக வலைதளத்தில் பெண் சட்டமன்ற உறுப்பினர் ஒருவரைப் பற்றி அவதூறான கருத்துக்கள் வெளியானதாகக் கூறி, பேராசிரியரின் படம் இருந்த சமூக வலைதளக் கணக்கை அடிப்படையாகக் கொண்டு காவல் துறையினர் அவரை விசாரணை என்ற பெயரில் அழைத்துச் சென்றது பெரும் சர்ச்சையை ஏற்படுத்தியது. இந்த நடவடிக்கை அரசியல் கட்சிகள் மற்றும் சமூக ஆர்வலர்களிடையே கடும் கண்டனங்களை எழுப்பியது.

இந்த வழக்கில் கருத்துத் தெரிவித்த நீதிபதி என். ரமேஷ், முதல்வர் சி. ஜோசப் விஜய் நேரில் சந்தித்ததோ அல்லது அமைச்சர்கள் வருத்தம் தெரிவித்ததோ மனித உரிமை மீறலுக்கு தீர்வாகாது என்று திட்டவட்டமாகக் குறிப்பிட்டுள்ளார். காவல்துறையினர் அதிகாலையில் பேராசிரியரின் இல்லத்திற்குச் சென்ற விதம் மற்றும் அவர் தவறாக அடையாளம் காணப்பட்டதைச் சுட்டிக்காட்டிய நீதிபதி, சட்டத்திற்குப் புறம்பான இந்த நடவடிக்கைக்குப் பொறுப்பேற்க வேண்டியவர்கள் யார் என்று கேள்வி எழுப்பியுள்ளார். ஒரு சாதாரண குடிமகனாக இருந்திருந்தால், இத்தகைய சட்டவிரோதக் கைது மற்றும் விசாரணைகளை எதிர்கொள்ள எவ்வளவு இன்னல்களைச் சந்தித்திருப்பார் என்பதை நீதிபதி சுட்டிக்காட்டினார்.

திமுக கவுன்சிலர் டி. சுதா மீதான முன்ஜாமீன் வழக்கை விசாரித்தபோது நீதிபதி இந்த அவதானிப்புகளை முன்வைத்தார். ஜனநாயகத்தில் உயர் பதவியில் இருப்பவர்கள் விமர்சனங்களையும், கிண்டல்களையும் தாங்கிக் கொள்ளும் மனப்பக்குவத்தைக் கொண்டிருக்க வேண்டும் என்றும், தனிநபர் விமர்சனங்களுக்காகக் காவல் இயந்திரத்தைப் பயன்படுத்துவது அரசின் தரத்தைக் குறைப்பதாக அமையும் என்றும் அவர் எச்சரித்தார். ஒரு அரசு விமர்சனங்களை விவாதங்கள் மூலமாகவும், தனது செயல்பாடுகள் மூலமாகவும் எதிர்கொள்ள வேண்டுமே தவிர, கைது நடவடிக்கைகளை ஆயுதமாகப் பயன்படுத்தக் கூடாது என்று அவர் அறிவுறுத்தினார்.

மேலும், காவல்துறை என்பது ஆளும் கட்சிக்குச் சேவகம் செய்பவர்கள் அல்ல, அது அரசுக்குச் சேவையாற்றும் அமைப்பு என்பதை நீதிபதி நினைவுபடுத்தினார். காவல்துறையினர் ஆளும் கட்சி மற்றும் எதிர்க்கட்சியினரைச் சமமாக நடத்த வேண்டும் என்பது அரசியலமைப்புச் சட்டத்தின் அடிப்படை விதி என்றும், இதில் பாரபட்சம் காட்டுவது காவல்துறையின் நம்பகத்தன்மையைச் சிதைக்கும் என்றும் அவர் கூறினார். அரசியல் பேச்சுக்களுக்குத் தரப்படும் சகிப்புத்தன்மை என்பது அரசு தானாக அளிக்கும் கருணை அல்ல, அது அரசியலமைப்புச் சட்டம் வழங்கியுள்ள அடிப்படை உரிமை என்பதை உறுதிபடத் தெரிவித்துள்ளார்.