வாரிசு வேலை கோரிய காவலரின் மகள் மனு தள்ளுபடி: சென்னை உயர் நீதிமன்றம் அதிரடி உத்தரவு

தூத்துக்குடியில் பணியின் போது உயிரிழந்த காவலரின் மகளுக்கு வாரிசு வேலை வழங்க சென்னை உயர் நீதிமன்ற மதுரைக் கிளை மறுப்பு தெரிவித்துள்ளது.

தூத்துக்குடி மாவட்டத்தில் பணியின் போது உயிரிழந்த உதவி ஆய்வாளர் வி.பாலு என்பவரது மகள் பி.ஜெயதுர்காவேணி, தனக்கு கருணை அடிப்படையில் அரசு வேலை வழங்கக் கோரி சென்னை உயர் நீதிமன்ற மதுரை கிளையில் மேல்முறையீடு செய்திருந்தார். இந்த மனுவை நீதிபதிகள் சி.வி.கார்த்திகேயன் மற்றும் ஆர்.சக்திவேல் அடங்கிய அமர்வு விசாரித்தது. ஏற்கனவே தனி நீதிபதி பிறப்பித்த உத்தரவை உறுதி செய்த நீதிபதிகள், மனுதாரரின் கோரிக்கையை நிராகரித்து தீர்ப்பளித்தனர்.

நீதிபதிகள் தங்களது உத்தரவில் கருணை அடிப்படையிலான வேலைவாய்ப்பின் அடிப்படை நோக்கத்தை மிகத் தெளிவாக விளக்கியுள்ளனர். ஒரு அரசு ஊழியர் பணியின் போது உயிரிழக்கும் போது, அவரது குடும்பம் வறுமையின் பிடியில் சிக்கி விடக்கூடாது என்பதற்காகவே இந்த சலுகை வழங்கப்படுகிறது. ஆனால், மனுதாரரின் குடும்பச் சூழலை ஆய்வு செய்ததில், அவர்கள் தங்களைத் தாங்களே பராமரித்துக் கொள்ளும் வசதி படைத்தவர்களாக இருப்பது கண்டறியப்பட்டுள்ளது.

மனுதாரரின் சகோதரர் ஏற்கனவே ஒரு தேசியமயமாக்கப்பட்ட வங்கியில் பணிபுரிந்து வருவதையும், குடும்பத்திற்குச் சொந்தமாக ஐந்து லட்சம் ரூபாய் மதிப்புள்ள வீடு இருப்பதையும் நீதிமன்றம் சுட்டிக்காட்டியுள்ளது. 2023-ஆம் ஆண்டின் தமிழ்நாடு அரசுப் பணிகள் (கருணை அடிப்படையில் பணி நியமனம்) விதிகளின் கீழ், மனுதாரர் தகுதியானவர் என்று கருதப்பட முடியாது என நீதிபதிகள் தங்கள் தீர்ப்பில் குறிப்பிட்டுள்ளனர்.

குடும்பம் வறுமையில் வாடாத நிலையில், கருணை அடிப்படையில் வேலை கோருவது ஏற்புடையதல்ல என்று நீதிமன்றம் கருத்து தெரிவித்துள்ளது. இதேபோன்ற இக்கட்டான சூழலில் இருக்கும் பிற குடும்பங்களுக்கு இந்த வாய்ப்பு சென்றடைய வேண்டும் என்பதே கருணை அடிப்படையிலான நியமனங்களின் நோக்கம் என்று நீதிபதிகள் விளக்கமளித்தனர். எனவே, தனி நீதிபதியின் உத்தரவில் தலையிட மறுத்த நீதிமன்றம், இந்த வழக்கின் மேல்முறையீட்டு மனுவைத் தள்ளுபடி செய்து உத்தரவிட்டது.