தேசிய நெடுஞ்சாலை ஆக்கிரமிப்பு: கோவில் அறக்கட்டளை தாக்கல் செய்த மனுவை தள்ளுபடி செய்த சென்னை உயர் நீதிமன்றம்

கோவை ஜோதிபுரம் பகுதியில் தேசிய நெடுஞ்சாலை நிலத்தில் அமைந்துள்ள கோவிலை அகற்றக்கோரிய அறிவிப்பை ரத்து செய்ய மறுத்து சென்னை உயர் நீதிமன்றம் உத்தரவிட்டுள்ளது.

கோயம்புத்தூர் மாவட்டம், பெரியநாயக்கன்பாளையம் மேம்பாலத்திற்கு அடியில் ஜோதிபுரம் பகுதியில் அமைந்துள்ள ஒரு கோவில், தேசிய நெடுஞ்சாலைத் துறைக்குச் சொந்தமான நிலத்தை ஆக்கிரமித்துள்ளதாகக் கூறி, அந்த நிலத்தை அகற்ற சம்பந்தப்பட்ட அதிகாரிகளால் நோட்டீஸ் வழங்கப்பட்டது. இந்த நடவடிக்கையை எதிர்த்து கோவில் அறக்கட்டளையின் தலைவர் ஆர். ரங்கராஜ் என்பவர் சென்னை உயர் நீதிமன்றத்தில் மனு ஒன்றைத் தாக்கல் செய்திருந்தார். இந்த வழக்கினை விசாரித்த சென்னை உயர் நீதிமன்றத்தின் இரு நீதிபதிகள் அடங்கிய அமர்வு, ஆக்கிரமிப்புகளை அகற்றும் நடவடிக்கைக்கு ஆதரவாகத் தீர்ப்பளித்து, சம்பந்தப்பட்ட அறக்கட்டளையின் மனுவைத் தள்ளுபடி செய்துள்ளது.

நீதிபதிகள் எஸ்.எம். சுப்பிரமணியம் மற்றும் ஆர். ராஜேஷ் விவேகானந்தன் ஆகியோர் அடங்கிய இந்த அமர்வு, அக்டோபர் 6-ம் தேதி வழங்கிய தீர்ப்பில், குறிப்பிட்ட அந்த கோவில் தேசிய நெடுஞ்சாலை நிலத்தில் அமைந்திருப்பதை அதிகாரிகள் கடந்த 2020-ம் ஆண்டிலேயே கண்டறிந்துள்ளனர் என்பதை உறுதிப்படுத்தியுள்ளது. தேசிய நெடுஞ்சாலையில் அமையும் சேவைப் பாதை (Service Road) பணிகளுக்காக இந்த நிலத்தை மீட்க வேண்டியது அவசியமானது என்றும் நீதிமன்றம் சுட்டிக்காட்டியுள்ளது.

வழக்கின் விசாரணையின் போது, மனுதாரர் தரப்பில் ஆஜரான வழக்கறிஞர், அரசு கடந்த 2022-ம் ஆண்டு வெளியிட்ட அரசாணையின்படி, கோவில் ஆக்கிரமிப்பு விவகாரங்களை கண்காணிக்க அமைக்கப்பட்ட குழுவின் மூலம் பரிசீலிக்க வேண்டும் என்று வாதிட்டார். இருப்பினும், இந்த வாதத்தை நிராகரித்த நீதிபதிகள், கோவில் அமைந்துள்ள இடம் அரசு நிலமாகக் கருதப்பட்டாலும், அது தேசிய நெடுஞ்சாலைத் துறையின் எல்லைக்கு உட்பட்டது என்பதை விளக்கினர்.

நீதிமன்றம் தனது தீர்ப்பில், 2002-ம் ஆண்டு இயற்றப்பட்ட தேசிய நெடுஞ்சாலைகள் (நிலம் மற்றும் போக்குவரத்து) சட்டத்தின் கீழ் இந்த வெளியேற்ற அறிவிப்பு வழங்கப்பட்டுள்ளதால், மாநில அரசு பிறப்பித்த அரசாணை இங்கு பொருந்தாது என்று தெளிவுபடுத்தியுள்ளது. நெடுஞ்சாலைப் பணிகள் பொதுமக்களின் பாதுகாப்பு மற்றும் போக்குவரத்து நெரிசலைக் குறைக்கும் முக்கிய நோக்கத்தைக் கொண்டவை என்பதால், இத்தகைய ஆக்கிரமிப்புகளை அகற்ற அதிகாரிகள் எடுத்துள்ள முடிவில் குறுக்கிட முடியாது எனத் தெரிவித்து மனுவைத் தள்ளுபடி செய்து உத்தரவிட்டனர்.