முறையற்ற பட்டா மாற்றங்களை ரத்து செய்ய வருவாய்த்துறை அதிகாரிகளுக்கு அதிகாரம் உண்டு - சென்னை உயர் நீதிமன்றம் அதிரடி

முறையற்ற வகையில் மாற்றப்பட்ட பட்டாவை ரத்து செய்து, உண்மையான உரிமையாளரின் பெயரில் பட்டாவை வழங்க சென்னை உயர் நீதிமன்றம் உத்தரவிட்டுள்ளது.

நில உரிமை தொடர்பான ஆவணங்களில் தவறான தகவல்கள் அல்லது உரிய ஆவணங்கள் இன்றி பட்டா மாற்றம் செய்யப்பட்டால், அதைச் சரிசெய்து பழைய நிலைக்கே கொண்டு வர வருவாய்த்துறை அதிகாரிகளுக்கு முழு அதிகாரம் உள்ளதாக சென்னை உயர் நீதிமன்றம் தீர்ப்பளித்துள்ளது. தமிழ்நாடு பட்டா புத்தகச் சட்டத்தின்படி, தவறான முறையில் பதிவு செய்யப்பட்ட பட்டா விவரங்களை திருத்துவது அதிகாரிகளின் கடமை என்று நீதிபதி கிருஷ்ணன் ராமசாமி தனது உத்தரவில் திட்டவட்டமாகக் குறிப்பிட்டுள்ளார். வேலூர் மாவட்டத்தைச் சேர்ந்த எஸ். வாசுதேவன் என்பவர் தொடர்ந்த வழக்கின் பின்னணியில் இந்த முக்கியத் தீர்ப்பு வழங்கப்பட்டுள்ளது.

மனுதாரர் எஸ். வாசுதேவன், கண்ணமங்கலம் கிராமத்தில் உள்ள தனது தந்தை வழி சொத்து குறித்து முறையீடு செய்திருந்தார். அவரது தந்தை, கடந்த 1971 ஆம் ஆண்டு நடைபெற்ற பாகப்பிரிவினைப் பத்திரம் மூலம் சுமார் 1.83 ஏக்கர் நிலத்தைப் பெற்றிருந்தார். அந்த நிலம் பல ஆண்டுகளாகக் குடும்பத்தின் அனுபவத்தில் இருந்து வந்த நிலையில், மனுதாரர் தனது பங்கினை 2012 ஆம் ஆண்டில் செட்டில்மெண்ட் பத்திரம் மூலம் தனது குழந்தைகளுக்கு மாற்றிக் கொடுத்துள்ளார். இந்நிலையில், போதிய சட்டப்பூர்வ உரிமையின்றி கே. குணசேகரன், கே. ராஜன் மற்றும் கே. கண்ணன் ஆகிய மூன்று நபர்கள் 2018 ஆம் ஆண்டு அந்த நிலத்திற்குப் பட்டா பெற்றுள்ளதாகக் கண்டறியப்பட்டது.

இந்த முறைகேடான பட்டா பதிவை நீக்கக் கோரி மனுதாரர் ஆரணி வட்டாட்சியரிடம் மனு அளித்திருந்தார். ஆனால், வட்டாட்சியர் அதை விசாரிக்காமல், சிவில் நீதிமன்றத்தை அணுகுமாறு மனுதாரரிடம் தெரிவித்து அந்த மனுவைத் தள்ளுபடி செய்திருந்தார். இதனை எதிர்த்து மனுதாரர் சென்னை உயர் நீதிமன்றத்தில் மேல்முறையீடு செய்தார். இந்த வழக்கை விசாரித்த நீதிபதி, வருவாய் ஆவணங்களில் முறையற்ற மாற்றங்கள் செய்யப்பட்டிருந்தால் அதைச் சரிசெய்வது அதிகாரிகளின் சட்டபூர்வ கடமை என்று சுட்டிக்காட்டினார். வாய்மொழிப் பாகப்பிரிவினை செய்துள்ளதாகத் தங்களுக்குச் சாதகமாகத் தரப்பினர்கள் வாதிட்டாலும், பதிவு செய்யப்பட்ட ஆவணங்களின் அடிப்படையில் உரிமை கொண்டாடுபவர்களின் நிலம் பாதிக்கப்படக்கூடாது என்று நீதிபதி தெளிவுபடுத்தினார்.

இந்த வழக்கில், முறையற்ற வகையில் வழங்கப்பட்ட பட்டாவை ரத்து செய்ய உத்தரவிட்ட நீதிமன்றம், மனுதாரரின் பெயரில் மீண்டும் அசல் பட்டாவைப் பதிவேற்ற நடவடிக்கை எடுக்குமாறு அதிகாரிகளுக்குப் பணித்தது. அதேசமயம், பட்டா நீக்கம் செய்யப்பட்ட தரப்பினர் தங்களுக்கு உரிமை இருப்பதாகக் கருதினால், சிவில் நீதிமன்றத்தை அணுகி தங்களது உரிமையை நிரூபித்துக்கொள்ளலாம் என்றும் நீதிபதி தனது தீர்ப்பில் குறிப்பிட்டுள்ளார். இந்தத் தீர்ப்பு, முறையான ஆவணங்கள் இன்றி பட்டா மாற்றங்களைச் செய்யும் போக்குக்கு முற்றுப்புள்ளி வைக்கும் வகையில் அமைந்துள்ளதாகச் சட்ட வல்லுநர்கள் கருத்து தெரிவித்துள்ளனர்.