ஓசிஐ (OCI) அட்டைதாரர்களுக்கு கடும் எச்சரிக்கை விடுத்த சென்னை உயர்நீதிமன்றம்

முன் அனுமதி பெறாமல் மத போதனைகளில் ஈடுபட்ட அமெரிக்க குடிமகனின் ஓசிஐ (OCI) பதிவை ரத்து செய்ததை சென்னை உயர்நீதிமன்றம் உறுதி செய்துள்ளது.

வெளிநாட்டு வாழ் இந்தியர்களுக்கான ஓசிஐ (OCI) அந்தஸ்து பெற்ற நபர்கள் இந்தியாவில் மதப் பிரச்சாரங்களில் ஈடுபடுவதற்கு முறையான அனுமதி பெற வேண்டியது கட்டாயம் என சென்னை உயர்நீதிமன்றம் முக்கிய தீர்ப்பினை வழங்கியுள்ளது. அமெரிக்க குடிமகனும், ஓசிஐ அட்டைதாரருமான ஜான் டேனியல் என்பவர், தனது ஓசிஐ பதிவை வெளிநாட்டவர் பிராந்திய பதிவு அதிகாரி ரத்து செய்ததை எதிர்த்து தொடர்ந்த வழக்கை நீதிபதி டி.பரத சக்ரவர்த்தி தள்ளுபடி செய்து இந்த உத்தரவைப் பிறப்பித்தார்.

நீதிமன்றத்தின் விசாரணையில், மத்திய அரசு 1955-ஆம் ஆண்டு குடியுரிமைச் சட்டத்தின் கீழ் பிறப்பித்துள்ள அறிவிப்பாணையின்படி, ஓசிஐ அட்டைதாரர்கள் தங்களுக்கு வழங்கப்பட்டுள்ள விதிமுறைகளை மீறினால், அந்தப் பதிவை ரத்து செய்ய சட்டப்படி அதிகாரம் உண்டு என்பது தெளிவுபடுத்தப்பட்டுள்ளது. குறிப்பாக, மத போதனை மற்றும் இறைத்தொண்டு தொடர்பான பணிகளில் ஈடுபடுபவர்கள், அதற்குரிய சிறப்புக் அனுமதியைப் பெற்றிருக்க வேண்டும். ஜான் டேனியல் இத்தகைய அனுமதிகளைப் பெறாமல், மதப் பணிகளில் ஈடுபட்டது உறுதி செய்யப்பட்டுள்ளதால், அவரது பதிவை ரத்து செய்தது சரியானது என நீதிபதி தனது தீர்ப்பில் குறிப்பிட்டுள்ளார்.

தனிப்பட்ட முறையிலான வாதத்தில், ஜான் டேனியல் தான் தனது தாயாரையும் உறவினர்களையும் சந்திப்பதற்காக மட்டுமே இந்தியா வருவதாகத் தெரிவித்திருந்தார். இருப்பினும், அவர் தமிழ்நாட்டின் பல்வேறு பகுதிகளிலும், ஆந்திரப் பிரதேசத்திலும் மதக் கூட்டங்களில் பங்கேற்று சொற்பொழிவுகளை நிகழ்த்தியதற்கான வலுவான ஆதாரங்கள் நீதிமன்றத்தில் சமர்ப்பிக்கப்பட்டன. இவை அனைத்தும் மத போதனை சார்ந்த செயல்பாடுகள் என்பதாலும், இதற்குத் தகுந்த முன் அனுமதி பெறாதது விதிமீறல் என்பதாலும், அவரது மனுவை நீதிமன்றம் நிராகரித்துள்ளது.

இந்த உத்தரவின் மூலம், ஓசிஐ அட்டை வைத்திருப்பவர்கள் இந்தியாவில் தாங்கள் மேற்கொள்ளும் எந்தவொரு செயல்பாட்டிற்கும் அரசின் வழிகாட்டுதல்களைப் பின்பற்ற வேண்டியது அவசியம் என்பதை நீதிமன்றம் சுட்டிக்காட்டியுள்ளது. ஜான் டேனியல் தனது தாயாரைச் சந்திப்பதற்கோ அல்லது மத நிகழ்வுகளில் பங்கேற்பதற்கோ விரும்பினால், முறையாக விண்ணப்பித்து சாதாரண விசா பெற்று வரலாம் என்றும், அதற்கான சட்டரீதியான வழிமுறைகளைப் பின்பற்றுமாறு நீதிபதி அறிவுறுத்தியுள்ளார்.