SC/ST வன்கொடுமை பாதிக்கப்பட்டோருக்கு உரிய நிவாரணம்: தமிழக அரசுக்கு சென்னை உயர் நீதிமன்றம் அதிரடி உத்தரவு

வன்கொடுமையால் பாதிக்கப்பட்ட ஆதிதிராவிடர் மற்றும் பழங்குடியின குடும்பங்களுக்கு உரிய நிவாரணம் வழங்க தமிழக அரசுக்கு சென்னை உயர் நீதிமன்றம் உத்தரவிட்டுள்ளது.
தாழ்த்தப்பட்டோர் மற்றும் பழங்குடியினருக்கு எதிரான வன்கொடுமை தடுப்புச் சட்டத்தின் கீழ் பாதிக்கப்பட்டவர்களின் குடும்பங்களுக்கு வழங்கப்பட வேண்டிய நிவாரணம் மற்றும் மறுவாழ்வு உதவிகள் முறையாகச் சென்றடைவதை உறுதி செய்ய வேண்டும் என்று தமிழக அரசுக்கு சென்னை உயர் நீதிமன்ற மதுரை கிளை அதிரடி உத்தரவு பிறப்பித்துள்ளது. நீதிபதிகள் பி.வேல்முருகன் மற்றும் கே.கே.ராமகிருஷ்ணன் ஆகியோர் அடங்கிய அமர்வு, மதுரையைச் சேர்ந்த மனித உரிமை ஆர்வலர் கதிர் என்கிற ஏ.வின்சென்ட் ராஜ் என்பவர் தாக்கல் செய்த பொதுநல மனுவை விசாரித்தபோது இந்த அறிவுறுத்தலை வழங்கியது.
வன்கொடுமை தடுப்புச் சட்டத்தின் கீழ், பாதிக்கப்பட்ட குடும்பங்களுக்குத் தேவையான நிதியுதவி, மூன்று மாத காலத்திற்குத் தேவையான அத்தியாவசியப் பொருட்கள், வேலைவாய்ப்பு மற்றும் வீடு போன்ற மறுவாழ்வு நடவடிக்கைகளை அரசாங்கம் உறுதி செய்ய வேண்டும் என்பது சட்டத்தின் நோக்கமாகும். மனுதாரர் தனது மனுவில், வன்கொடுமையால் பாதிக்கப்பட்ட 30 குடும்பங்களின் விவரங்களை ஆய்வு அறிக்கையாகச் சமர்ப்பித்திருந்தார். இந்த ஆய்வில் அதிர்ச்சிகரமான தகவல்கள் வெளியாகியுள்ளன. பாதிக்கப்பட்ட எந்தவொரு குடும்பத்திற்கும் முறையான வீட்டுவசதி வழங்கப்படவில்லை என்பதும், பெரும்பாலான குடும்பங்களுக்குக் கல்வி உதவித் தொகை கிடைக்கவில்லை என்பதும் தெரியவந்துள்ளது.
மேலும், பத்துக்கும் மேற்பட்ட குடும்பங்களுக்கு வேலைவாய்ப்பு மறுக்கப்பட்டுள்ளதாகவும், இருபத்தி ஆறு குடும்பங்களுக்குச் சட்டப்படி வழங்கப்பட வேண்டிய மூன்று மாத கால அத்தியாவசியப் பொருட்கள் வழங்கப்படவில்லை என்றும் மனுதாரர் சுட்டிக்காட்டியுள்ளார். பாதிக்கப்பட்டவர்களின் வாழ்வாதாரம் மற்றும் உரிமைகளைப் பாதுகாப்பதில் அரசு இயந்திரம் காட்டும் மெத்தனப் போக்கை மனுதாரர் கடுமையாக விமர்சித்தார். இதைக் கவனத்தில் கொண்ட நீதிமன்றம், சம்பந்தப்பட்ட மாவட்டங்களில் தகுதியுள்ள அனைத்து பயனாளிகளின் பட்டியலைத் தயார் செய்து, அவர்களுக்கு வழங்கப்பட வேண்டிய சலுகைகளை உடனே வழங்க நடவடிக்கை எடுக்க வேண்டும் என்று உத்தரவிட்டது.
வழக்கின் தீவிரத்தைக் கருத்தில் கொண்டு, இது குறித்து அரசு விரிவான அறிக்கை ஒன்றைத் தாக்கல் செய்ய வேண்டும் என்று நீதிபதிகள் உத்தரவிட்டுள்ளனர். வன்கொடுமையால் உயிரிழந்த அல்லது பாதிக்கப்பட்டவர்களின் குடும்பங்கள் தங்களது வாழ்வாதாரத்தை இழந்து நிற்கும் சூழலில், அரசு விரைந்து செயல்பட வேண்டியது அவசியம் என்பதை நீதிபதிகள் வலியுறுத்தினர். இந்த வழக்கின் அடுத்தகட்ட விசாரணை வருகின்ற நவம்பர் 25-ஆம் தேதிக்கு ஒத்திவைக்கப்பட்டுள்ளது. தமிழக அரசின் சார்பில் இந்த விவகாரத்தில் என்ன மாதிரியான நடவடிக்கைகள் எடுக்கப்பட்டுள்ளன என்பது அன்றைய தினம் தெரியவரும்.









