மதுரை அருகே சோகம்: சிறுவன் உயிரிழந்த விவகாரத்தில் தாய் கைது - பின்னணி என்ன?

மதுரை மாவட்டம் மேலூர் அருகே சிறுவன் விளையாட்டாக கழுத்து நெரிக்கப்பட்டு உயிரிழந்த விவகாரத்தில், உடலை மறைக்க முயன்ற பெண்ணை போலீசார் கைது செய்தனர்.

மதுரை மாவட்டம் மேலூர் அருகே உள்ள தானியமங்கலம் பகுதியில் ஏழு வயது சிறுவன் மர்மமான முறையில் உயிரிழந்த சம்பவம் அந்தப் பகுதியில் பெரும் அதிர்ச்சியை ஏற்படுத்தியுள்ளது. உயிரிழந்த சிறுவன் முத்துவேல், கடந்த ஞாயிற்றுக்கிழமை முதல் காணாமல் போயிருந்த நிலையில், மறுநாள் திங்கட்கிழமை காலை அப்பகுதியில் உள்ள கைவிடப்பட்ட பழைய வீடு ஒன்றில் சடலமாகக் கண்டெடுக்கப்பட்டது. இந்த சம்பவம் குறித்து காவல்துறை தீவிர விசாரணை மேற்கொண்டதில் திடுக்கிடும் தகவல்கள் வெளியாகியுள்ளன.

மதுரை மாவட்ட காவல் கண்காணிப்பாளர் என். தேவநாதன் செய்தியாளர்களிடம் தெரிவித்த தகவல்படி, சம்பவம் நடந்த அன்று அந்த சிறுவன் தனது பத்து வயது நண்பனுடன் விளையாடிக்கொண்டிருந்தபோது, விளையாட்டாக கழுத்தில் கயிறு சுற்றப்பட்டதில் மூச்சுத்திணறி சிறுவன் மயக்கமடைந்ததாகக் கூறப்படுகிறது. அச்சிறுவன் அங்கிருந்து தப்பிக்க ஓடும்போது சுவரில் மோதியதில் அவனது பற்களில் காயம் ஏற்பட்டுள்ளது. அதன்பிறகு அந்த பத்து வயது சிறுவனின் தாயாரான சந்தியா என்பவரின் வீட்டிற்குச் சென்று தண்ணீர் கேட்ட சிறுவன், சிறிது நேரத்தில் மயங்கி விழுந்து உயிரிழந்துள்ளான்.

சிறுவன் உயிரிழந்ததை அறிந்த சந்தியா (32), பயத்தின் காரணமாக அந்தச் சிறுவனின் உடலைத் தூக்கிச் சென்று அருகில் உள்ள கைவிடப்பட்ட வீட்டில் போட்டு மறைக்க முயன்றதாகக் காவல்துறை விசாரணையில் தெரியவந்துள்ளது. ஆதாரங்களை அழிக்க முயன்ற குற்றச்சாட்டின் பேரில் சந்தியா கைது செய்யப்பட்டுள்ளார். பாதிக்கப்பட்ட குடும்பத்தினர் சிறுவனின் உடலில் காயங்களும் இரத்தக் கறைகளும் இருந்ததாகக் குற்றம் சாட்டியிருந்த நிலையில், காவல்துறை இந்த விவகாரத்தை முறையாக விசாரித்து வருகிறது.

சந்தியா மீது ஆதாரங்களை அழித்தல் உள்ளிட்ட பல்வேறு பிரிவுகளின் கீழ் வழக்குப்பதிவு செய்யப்பட்டுள்ளது. அவர் நீதிமன்றத்தில் ஆஜர்படுத்தப்பட்டு சிறையில் அடைக்கப்படவுள்ளார். இந்தச் சம்பவத்தில் சம்பந்தப்பட்ட பத்து வயது சிறுவன், தற்போது சிறுவர் சீர்திருத்தப் பள்ளியில் ஒப்படைக்கப்பட்டுள்ளான். சிறுவர் நீதி வாரியத்தின் ஆலோசனையின் பேரில் அவனுக்கான சட்ட நடைமுறைகள் மேற்கொள்ளப்படும் என்று காவல்துறை தரப்பில் தெரிவிக்கப்பட்டுள்ளது. இச்சம்பவம் அப்பகுதி மக்களிடையே பெரும் சோகத்தையும் பரபரப்பையும் ஏற்படுத்தியுள்ளது.