மதுரை - குருவாயூர் ரயில் பயணம்: பயணிகளை கவரும் அதிநவீன விஸ்டா டோம் பெட்டி அறிமுகம்

மதுரை - குருவாயூர் விரைவு ரயிலில் கண்ணாடி கூரையுடன் கூடிய நவீன விஸ்டா டோம் பெட்டி அறிமுகம் செய்யப்பட்டுள்ளது.

தென்னக ரயில்வே நிர்வாகம், பயணிகளின் வசதிக்காகவும், சுற்றுலா அனுபவத்தை மேம்படுத்தும் நோக்கத்திலும் மதுரை - குருவாயூர் - மதுரை விரைவு ரயிலில் முதன்முறையாக விஸ்டா டோம் (Vistadome) ஏசி பெட்டியை அறிமுகப்படுத்தியுள்ளது. இந்த புதிய வசதி, மேற்குத் தொடர்ச்சி மலையின் அழகிய இயற்கை காட்சிகளைப் பயணிகள் தடையின்றி ரசிப்பதற்கு ஏதுவாக வடிவமைக்கப்பட்டுள்ளது. இதற்காக அக்டோபர் 22 முதல் ஜனவரி 15, 2027 வரை மதுரை - குருவாயூர் (ரயில் எண் 16327) ரயிலிலும், அக்டோபர் 23 முதல் ஜனவரி 16, 2027 வரை குருவாயூர் - மதுரை (ரயில் எண் 16328) ரயிலிலும் இந்த விஸ்டா டோம் பெட்டி இணைக்கப்பட்டுள்ளது.

இந்த அதிநவீன பெட்டியில் ஒரே நேரத்தில் 42 பயணிகள் பயணம் செய்யும் வகையில் இருக்கை வசதிகள் செய்யப்பட்டுள்ளன. இதன் மிக முக்கிய சிறப்பம்சமாக, அகலமான கண்ணாடி ஜன்னல்கள் மற்றும் மின்சார வசதியுடன் இயக்கப்படும் கண்ணாடி கூரை ஆகியவை அமைக்கப்பட்டுள்ளன. பயணிகளின் தேவைக்கேற்ப இந்த கண்ணாடி கூரையின் வெளிப்படைத்தன்மையை மாற்றியமைத்துக் கொள்ள முடியும் என்பது குறிப்பிடத்தக்கது. மேலும், இருக்கைகளை 360 டிகிரி சுழற்றும் வகையிலும், சாய்வு வசதியுடனும் (reclining seats) நவீன முறையில் வடிவமைத்துள்ளனர். தூய்மையான கழிப்பறை வசதிகளும் இந்த பெட்டியில் இணைக்கப்பட்டுள்ளன.

சுற்றுலாப் பயணிகளுக்கு இந்த பயணம் ஒரு மறக்க முடியாத அனுபவமாக அமையும். குறிப்பாக செங்கோட்டை - புனலூர் இடையிலான மலைப்பாதை பயணம், அடர்ந்த காடுகள், நீர்வீழ்ச்சிகள், பள்ளத்தாக்குகள் மற்றும் மலைகளின் அழகை கண்முன் கொண்டு வரும். தென்காசி அருகிலுள்ள குற்றாலம் நீர்வீழ்ச்சி, பாலருவி, கழுத்துருட்டி நீர்வீழ்ச்சி மற்றும் தெന്மலை சூழல் சுற்றுலா மையம் ஆகியவற்றை ரசிக்க இது சிறந்த வாய்ப்பாகும். வரலாற்று சிறப்புமிக்க 13 வளைவுகளைக் கொண்ட 'பதிமூணு கண்ணாரா' பாலம் இந்த வழித்தடத்தில் மற்றொரு பொறியியல் அதிசயமாகக் கருதப்படுகிறது.

இந்த ரயில் சேவை மதுரை மீனாட்சி சுந்தரேஸ்வரர் கோவில் மற்றும் குருவாயூர் ஸ்ரீ கிருஷ்ணர் கோவில் ஆகிய இரண்டு முக்கிய ஆன்மீகத் தலங்களை இணைக்கும் வகையில் அமைந்துள்ளது. இந்த விஸ்டா டோம் பெட்டியின் தொடக்க விழாவில் மதுரை கோட்ட ரயில்வே மேலாளர் ஓம் பிரகாஷ் மீனா மற்றும் மதுரை நாடாளுமன்ற உறுப்பினர் சு. வெங்கடேசன் உள்ளிட்ட அதிகாரிகள் கலந்து கொண்டனர். வாரத்தின் குறிப்பிட்ட நாட்களில் இயக்கப்படும் இந்த சிறப்பு பெட்டி, மேற்குத் தொடர்ச்சி மலையின் இயற்கை அழகை ரசிக்க விரும்பும் பயணிகளுக்குப் புதிய உற்சாகத்தை அளித்துள்ளது.