மதுரை கப்பலூர் அருகே கோர விபத்து: ஆம்புலன்ஸ் மீது கார் மோதி கல்லூரி மாணவர் உட்பட 3 பேர் பலி

மதுரை கப்பலூர் பைபாஸ் சாலையில் ஆம்புலன்ஸ் மீது கார் மோதிய விபத்தில் இதய நோயாளி உட்பட 3 பேர் உயிரிழந்தனர்.

மதுரை மாவட்டம், திருமங்கலம் அருகே ஞாயிற்றுக்கிழமை பிற்பகல் நிகழ்ந்த ஒரு துயரமான சாலை விபத்தில் இதய நோயாளி உள்ளிட்ட மூன்று பேர் சம்பவ இடத்திலேயே உயிரிழந்தனர். இந்தச் சம்பவம் கப்பலூர் பைபாஸ் சாலையில் உள்ள சொக்கநாதம்பட்டி பகுதியில் நடந்துள்ளது. திருமங்கலத்திலுள்ள ஒரு தனியார் மருத்துவமனையிலிருந்து மதுரை நகருக்கு மேல் சிகிச்சைக்காக இதய நோயாளி ஒருவரை ஏற்றிக்கொண்டு ஆம்புலன்ஸ் புறப்பட்டது. இந்த ஆம்புலன்ஸில் நோயாளி கே. சரவண கணேஷ் (32) மற்றும் அவருடன் துணையாக அவரது நண்பர் ஜி. பிரதீப் (37) ஆகியோர் பயணம் செய்தனர்.

ஆம்புலன்ஸ் கப்பலூர் பைபாஸ் சாலையில் சென்றுகொண்டிருந்தபோது, எதிர்பாராதவிதமாக ஓட்டுநரின் கட்டுப்பாட்டை இழந்து, சாலையின் நடுவே இருந்த தடுப்புச் சுவரைத் தாண்டி மறுபக்கத்தில் கவிழ்ந்தது. அந்த நேரத்தில் எதிரே தூத்துக்குடியிலிருந்து வந்து கொண்டிருந்த கார், கவிழ்ந்து கிடந்த ஆம்புலன்ஸ் மீது பலத்த வேகத்துடன் மோதியது. இந்த விபத்தில் ஆம்புலன்ஸில் இருந்த நோயாளி சரவண கணேஷ் மற்றும் அவரது நண்பர் பிரதீப் ஆகிய இருவரும் பரிதாபமாக உயிரிழந்தனர்.

காரில் தூத்துக்குடியைச் சேர்ந்த கல்லூரி மாணவர் எஸ். அதியா (19) என்பவர் தனது குடும்பத்தினருடன் ஈரோட்டில் உள்ள அவரது கல்லூரிக்குச் சென்று கொண்டிருந்தார். ஆம்புலன்ஸ் மீது கார் மோதியதில், காரில் இருந்த கல்லூரி மாணவர் அதியா சம்பவ இடத்திலேயே உயிரிழந்தார். இவருடன் காரில் பயணம் செய்த அவரது தாயார் சொர்ணலட்சுமி மற்றும் கார் ஓட்டுநர் எஸ். மூர்த்தி ஆகிய இருவரும் பலத்த காயங்களுடன் மீட்கப்பட்டு, மதுரையில் உள்ள தனியார் மருத்துவமனையில் தீவிர சிகிச்சைக்காக அனுமதிக்கப்பட்டுள்ளனர்.

விபத்து குறித்து தகவல் அறிந்து சம்பவ இடத்திற்கு விரைந்து வந்த திருமங்கலம் நகர காவல் துறையினர், காயமடைந்தவர்களை மீட்டு மருத்துவமனைக்கு அனுப்பி வைத்தனர். உயிரிழந்தவர்களின் உடல்கள் உடற்கூறாய்வுக்காக மதுரை அரசு ராஜாஜி மருத்துவமனைக்கு அனுப்பி வைக்கப்பட்டன. இந்த விபத்தில் ஆம்புலன்ஸ் ஓட்டுநர் ஆனந்தகுமார் லேசான காயங்களுடன் உயிர் தப்பினார். இச்சம்பவம் குறித்து வழக்குப்பதிவு செய்துள்ள திருமங்கலம் நகர காவல்துறையினர், விபத்துக்கான காரணம் குறித்து தீவிர விசாரணை மேற்கொண்டு வருகின்றனர்.