மதுரை தனிஷ்க் நகைக்கடையில் துணிகர கொள்ளை: 15 கிலோ நகைகள் திருட்டு - தீவிர விசாரணை

மதுரை பைபாஸ் சாலையில் உள்ள தனிஷ்க் நகைக்கடையில் புகுந்த மர்ம நபர் 15 கிலோ தங்க நகைகளை திருடிச் சென்ற சம்பவம் பெரும் பரபரப்பை ஏற்படுத்தியுள்ளது.
மதுரை பைபாஸ் சாலையில் புதிதாக திறக்கப்பட்ட பிரபல டாட்டா குழுமத்தின் தனிஷ்க் நகைக்கடையில், நள்ளிரவில் மர்ம நபர் ஒருவர் புகுந்து பல கோடி ரூபாய் மதிப்பிலான தங்க மற்றும் வைர நகைகளை கொள்ளையடித்துச் சென்ற சம்பவம் பெரும் அதிர்ச்சியை ஏற்படுத்தியுள்ளது. இந்தத் துணிகரக் கொள்ளைச் சம்பவம் குறித்து தகவல் அறிந்ததும் மதுரை மாநகர காவல் துறையினர் மற்றும் தடயவியல் நிபுணர்கள் சம்பவ இடத்திற்கு விரைந்து வந்து தீவிர விசாரணையைத் தொடங்கியுள்ளனர்.
ஆரம்பகட்ட விசாரணையில், இந்தச் சம்பவம் வியாழக்கிழமை அதிகாலை சுமார் 3 மணி அளவில் நடைபெற்றிருக்கலாம் என்று காவல் துறையினர் சந்தேகிக்கின்றனர். நகைக்கடை அமைந்துள்ள நான்கு அடுக்குமாடி கட்டிடத்தில் சில தளங்கள் இன்னும் கட்டுமானப் பணிகளில் இருப்பதால், கட்டிடத்தின் பின்புறம் அமைக்கப்பட்டிருந்த சாரத்தை (scaffolding) பயன்படுத்தியே மர்ம நபர் கட்டிடத்தின் உச்சிக்குச் சென்றிருக்கலாம் எனத் தெரிய வருகிறது. அங்கிருந்து லிஃப்ட் தண்டு (lift shaft) வழியாக முதல் தளத்திற்குள் இறங்கி, கொள்ளையன் தனது கைவரிசையைக் காட்டியிருப்பது விசாரணையில் தெரியவந்துள்ளது.
காலை 10 மணிக்கு ஊழியர்கள் கடைக்கு வந்து பார்த்தபோது, முதல் தளத்தில் இருந்த நகைகள் கொள்ளையடிக்கப்பட்டிருப்பது தெரியவந்தது. சுமார் 15 கிலோ வரையிலான நகைகள் காணாமல் போயிருக்கலாம் என்று முதற்கட்ட மதிப்பீடுகள் தெரிவிக்கின்றன. கடை ஊழியர்கள் வழங்கிய தகவலின்படி, கடையில் சுமார் 30 கிலோ நகைகள் கையிருப்பில் இருந்த நிலையில், கொள்ளையன் அனைத்து நகைகளையும் திருடாமல் சிலவற்றை விட்டுச் சென்றுள்ளான். கொள்ளைக்குப் பிறகு மர்ம நபர் அதே வழியில் தப்பித்து, இரண்டு தெருக்கள் வழியாக நடந்தே சென்றுள்ளது சிசிடிவி காட்சிகள் மூலம் உறுதி செய்யப்பட்டுள்ளது.
சம்பவ இடத்திற்கு நேரில் சென்று ஆய்வு செய்த மாநகர காவல் ஆணையர் எஸ்.ராஜேந்திரன், தெற்கு மண்டல துணை ஆணையர் ஏ.ஜி.இனிகோ திவ்யன் தலைமையில் கொள்ளையாளிகளைப் பிடிக்க தனிப்படை அமைத்துள்ளார். கொள்ளைச் சம்பவத்தில் உள்நபர்களுக்குத் தொடர்பு உள்ளதா என்ற கோணத்தில், கட்டுமானப் பணியில் ஈடுபட்ட தொழிலாளர்கள் மற்றும் கடையின் ஊழியர்களிடம் காவல் துறையினர் துருவித்துருவி விசாரணை நடத்தி வருகின்றனர். மீதமுள்ள நகைகளின் மதிப்பீட்டை உறுதிப்படுத்தும் பணி தொடர்ந்து நடைபெற்று வருவதாகவும், குற்றவாளிகளை விரைவில் பிடிப்போம் என்றும் காவல் துறை தரப்பில் உறுதி அளிக்கப்பட்டுள்ளது.









