ஹாலிவுட் படத்தில் களமிறங்கும் மனிஷா கொய்ராலா: 'கௌபாய்ஸ் அண்ட் இந்தியன்ஸ்' படத்தின் முக்கிய அப்டேட்கள்

பிரபல நடிகை மனிஷா கொய்ராலா ஹாலிவுட்டின் 'கௌபாய்ஸ் அண்ட் இந்தியன்ஸ்' என்ற சுயாதீன திரைப்படத்தில் முதன்மை கதாபாத்திரத்தில் நடிக்க உள்ளார்.

திரையுலகில் தனது தனித்துவமான நடிப்பால் பல தசாப்தங்களாக ரசிகர்களை கவர்ந்து வரும் முன்னணி நடிகை மனிஷா கொய்ராலா, தற்போது புதிய ஹாலிவுட் திரைப்படம் ஒன்றில் நடிக்க ஒப்பந்தமாகியுள்ளார். தேஜல் தேசாய் எழுதி இயக்கும் 'கௌபாய்ஸ் அண்ட் இந்தியன்ஸ்' (Cowgirls & Indians) என்ற சுயாதீன திரைப்படத்தில் மனிஷா கொய்ராலா கதாநாயகியாக நடிக்கிறார். சஞ்சய் லீலா பன்சாலியின் நெட்ஃபிளிக்ஸ் தொடரான 'ஹீராமண்டி'யில் சிறப்பான நடிப்பை வெளிப்படுத்தியதைத் தொடர்ந்து, இந்த சர்வதேச வாய்ப்பு அவருக்குக் கிடைத்துள்ளது.

இந்தத் திரைப்படம் அமெரிக்காவின் டெக்சாஸ் மாகாணத்தில் உள்ள ஆஸ்டின் நகரில் வரும் நவம்பர் மாதம் படப்பிடிப்பு தொடங்கப்பட உள்ளது. இது இயக்குநரின் விருது பெற்ற குறும்படமான 'கௌபாய்ஸ் அண்ட் இந்துஸ்' (Cowboys and Hindus) படத்தின் விரிவுபடுத்தப்பட்ட பதிப்பாகும். கதையின் நாயகியான ஆஷா என்ற நடுத்தர வயது இந்தியப் பெண், அமெரிக்காவின் தென்மேற்கு பகுதியில் தனது சுய அடையாளத்தைத் தேடிப் பயணிப்பதே இந்தத் திரைப்படத்தின் மையக்கருவாகும். கலாச்சார மோதல்கள், அந்நியமான சூழலில் உருவாகும் நட்புகள் மற்றும் தனிமனித மன உறுதி ஆகியவற்றை மையமாகக் கொண்டு இந்தத் திரைப்படம் உருவாக்கப்பட உள்ளது.

இயக்குநர் தேஜல் தேசாய், மனிஷா கொய்ராலாவை இந்தத் திரைப்படத்தில் ஒப்பந்தம் செய்தது குறித்து கூறுகையில், அவருடைய நடிப்புத் திறன் மிக ஆழமானது என்று குறிப்பிட்டுள்ளார். தில் சே, ஹீராமண்டி போன்ற படங்களில் மனிஷா வெளிப்படுத்திய மெளனமான உணர்ச்சிகளும், கண்களின் வழியே பேசும் நடிப்புத் திறனும் இந்த கதாபாத்திரத்திற்கு மிகச் சரியாகப் பொருந்தும் என்று அவர் நம்பிக்கை தெரிவித்துள்ளார். நிஜ வாழ்க்கையில் பல சவால்களைக் கடந்து வந்துள்ள மனிஷாவின் முதிர்ச்சியும், ஆளுமையும் இந்த கதாபாத்திரத்திற்கு கூடுதல் வலு சேர்க்கும் என்றும் இயக்குநர் கூறியுள்ளார்.

தமிழ் மற்றும் இந்தியத் திரையுலகில் தனது 35 ஆண்டுகால கலைப்பயணத்தை நிறைவு செய்துள்ள மனிஷா கொய்ராலா, 1991 ஆம் ஆண்டு தனது நடிப்புப் பயணத்தைத் தொடங்கினார். பம்பாய், காமோஷி, தில் சே உள்ளிட்ட பல காவியத் திரைப்படங்களின் மூலம் அவர் தனது திறமையை நிரூபித்துள்ளார். சமீபத்தில் அவரது ஆரம்பகால வெற்றிப் படமான 1942: ஏ லவ் ஸ்டோரி மீண்டும் திரையரங்குகளில் வெளியாகி ரசிகர்களிடையே பெரும் வரவேற்பைப் பெற்றது. ஹாலிவுட் பயணத்தைத் தொடங்கியுள்ள மனிஷா கொய்ராலா, சர்வதேச அளவில் இந்தியப் பெண்களின் அடையாளத்தைப் பிரதிபலிக்கும் வகையில் இந்தத் திரைப்படத்தில் நடிப்பார் என எதிர்பார்க்கப்படுகிறது.