மேரி வோல்ஸ்டோன்கிராஃப்ட் பயோபிக்: புதிய திரைப்படத்தில் ரினேட் ரெய்ன் ஸ்வீ

புகழ்பெற்ற எழுத்தாளர் மேரி வோல்ஸ்டோன்கிராஃப்ட் வாழ்க்கையை மையமாகக் கொண்ட 'இஃப் லவ் ஷுட் டை' படத்தில் ரினேட் ரெய்ன் ஸ்வீ நடிக்கிறார்.

பிரபல ஹாலிவுட் இயக்குனர் மியா ஹான்சன்-லோவ் இயக்கத்தில் உருவாகவுள்ள இஃப் லவ் ஷுட் டை (If Love Should Die) எனும் புதிய காலகட்டப் பின்னணி கொண்ட திரைப்படத்தில் முக்கிய கதாபாத்திரத்தில் நடிக்க ரினேட் ரெய்ன் ஸ்வீ ஒப்பந்தமாகியுள்ளார். எழுத்தாளரும், பெண்களின் உரிமைக்காகப் போராடியவருமான மேரி வோல்ஸ்டோன்கிராஃப்ட்டின் வாழ்க்கையில் நடந்த கடைசி 12 ஆண்டுகளை மையமாக வைத்து இந்தப் படம் உருவாக்கப்படுகிறது. புகழ்பெற்ற பிராங்கென்ஸ்டைன் நாவலை எழுதிய மேரி ஷெல்லியின் தாயான மேரி வோல்ஸ்டோன்கிராஃப்ட்டின் துணிச்சலான பயணத்தை இந்தப் படம் திரையில் பிரதிபலிக்க உள்ளது.

நார்வே நாட்டைச் சேர்ந்த ரினேட் ரெய்ன் ஸ்வீ, முன்னதாக த வர்ஸ்ட் பெர்சன் இன் த வேர்ல்ட், சென்டிமென்டல் வேல்யூ மற்றும் பேக்ரூம்ஸ் போன்ற திரைப்படங்களில் தனது சிறப்பான நடிப்பின் மூலம் உலகளவில் கவனம் ஈர்த்தவர். இந்தப் படத்தில் அவருடன் இணைந்து ஜானி பிளின் மற்றும் விக்கி கிரீப்ஸ் ஆகியோர் நடிக்கின்றனர். மேலும், சார்லி கெல்லி, வில் கென், ஜேன் பீவர் மற்றும் டாம் ஸ்டரிட்ஜ் உள்ளிட்ட நட்சத்திரங்களும் முக்கிய கதாபாத்திரங்களில் நடிக்க ஒப்பந்தம் செய்யப்பட்டுள்ளனர் என்பது குறிப்பிடத்தக்கது.

பிரான்ஸ் புரட்சி நடைபெறுவதற்கு சற்று முன்னதாக இங்கிலாந்து பின்னணியில் இந்தக் கதையானது அமைக்கப்பட்டுள்ளது. அறிவொளி காலத்தின் தொடக்கத்தில், தனது சொந்த அடையாளத்தை செதுக்க போராடும் ஒரு பெண்ணின் வாழ்வை இந்தப் படம் விவரிக்கிறது. தனது பணியிலிருந்து நீக்கப்பட்ட பிறகு, வறுமை மற்றும் சமூக நெருக்கடிகளுக்கு மத்தியிலும், தனது எழுத்தாற்றலால் மட்டுமே வாழ்வாதாரத்தை தேடும் மேரி வோல்ஸ்டோன்கிராஃப்ட்டின் உத்வேகமான போராட்டங்களை இப்படம் காட்சிப்படுத்த உள்ளது.

இயக்குனர் மியா ஹான்சன்-லோவ் கடைசியாக 2021 ஆம் ஆண்டு பெர்க்மேன் ஐலேண்ட் எனும் படத்தை இயக்கினார். நீண்ட இடைவெளிக்குப் பிறகு மீண்டும் ஆங்கில மொழியில் ஒரு பிரம்மாண்டமான படைப்பை அவர் இந்த படத்தின் மூலம் வழங்குகிறார். மேரி வோல்ஸ்டோன்கிராஃப்ட்டின் வாழ்க்கை வரலாறு மற்றும் அவர் சந்தித்த சவால்களை நுணுக்கமாகவும், உணர்வுபூர்வமாகவும் இந்தத் திரைப்படம் பதிவு செய்யும் என எதிர்பார்க்கப்படுகிறது.