தமிழகத்தில் பெரும் சைபர் மோசடி: ரூ. 22.10 கோடி அரசு நிதி கொள்ளை

தமிழ்நாட்டில் ஊரக வளர்ச்சித்துறைக்கு ஒதுக்கப்பட்ட ரூ. 22.10 கோடி நிதியை சைபர் குற்றவாளிகள் மோசடி செய்துள்ள சம்பவம் அதிர்ச்சியை ஏற்படுத்தியுள்ளது.
தமிழக அரசு கருவூலம் மூலம் ஊரக வளர்ச்சித் துறைக்கு ஒதுக்கப்பட்ட ரூ. 22.10 கோடி நிதி, இணையவழி மோசடி மூலம் திட்டமிட்டு திருடப்பட்டிருப்பது பெரும் பரபரப்பை ஏற்படுத்தியுள்ளது. 15-வது நிதி ஆணையத்தின் கீழ், கிராமப்புறங்களில் உட்கட்டமைப்பு வசதிகளை மேம்படுத்துவதற்கும், குறிப்பாக கிராமப்புற நல மையங்களை அமைப்பதற்கும் இந்த நிதியானது ஒதுக்கப்பட்டிருந்தது. அரசின் பிரத்யேக பரிவர்த்தனை இணையதளத்தில் ஊடுருவிய மர்ம நபர்கள், இந்தத் தொகையைத் தந்திரமாகப் பல்வேறு வங்கி கணக்குகளுக்கு மாற்றியுள்ளனர்.
இந்தக் கொள்ளைச் சம்பவத்தில், இராமநாதபுரம் மாவட்டம் மண்டபம் பகுதியில் உள்ள வங்கிக் கணக்கிலிருந்து அதிகபட்சமாக ரூ. 14 கோடி திருடப்பட்டுள்ளது. இதனைத் தொடர்ந்து, திருப்பூர் மாவட்டம் தாராபுரத்திலிருந்து ரூ. 5 கோடியும், தாம்பரத்திலிருந்து ரூ. 3.10 கோடியும் மோசடி செய்யப்பட்டுள்ளது. அரசு கருவூலத்தில் நிதி வரவு வைக்கப்பட்ட இரண்டு மணி நேரத்திற்குள்ளேயே, சைபர் குற்றவாளிகள் மிகத் துல்லியமாக இந்தத் தொகையை மியூல் (Mule) எனப்படும் இடைத்தரகர் வங்கி கணக்குகளுக்கு மாற்றியுள்ளது விசாரணையில் தெரியவந்துள்ளது.
இந்த மோசடி தொடர்பாகச் சென்னை மத்திய குற்றப்பிரிவு சைபர் குற்றத் தடுப்புப் பிரிவு காவல்துறையினர் தீவிர விசாரணையைத் தொடங்கியுள்ளனர். அரசு பரிவர்த்தனை இணையதளத்தின் கடவுச்சொற்கள் எப்படி கசிந்தன அல்லது இதில் வங்கி அதிகாரிகளுக்குத் தொடர்பு இருக்கிறதா என்ற கோணத்தில் விசாரணை நடைபெற்று வருகிறது. சர்வதேச அளவில் இயங்கும் சைபர் குற்றக் கும்பல், உள்ளூர் நெட்வொர்க் உதவியுடன் இந்தச் செயலைச் செய்திருக்கலாம் எனச் சந்தேகிக்கப்படுகிறது. சென்னை, கோயம்புத்தூர் மற்றும் திருப்பூர் ஆகிய நகரங்களை மையமாக வைத்து இக்கும்பல் செயல்படுவதற்கான வாய்ப்புகள் குறித்து புலனாய்வு அதிகாரிகள் ஆய்வு செய்து வருகின்றனர்.
சமீபத்தில் புதுச்சேரியில் நடைபெற்ற இது போன்ற ஒரு மோசடிக்கும் இதற்கும் தொடர்பு இருக்கிறதா என்பது குறித்தும் விசாரணை தீவிரப்படுத்தப்பட்டுள்ளது. சட்டவிரோதமாகப் பணத்தை மாற்றிய வங்கிக் கணக்குகளை முடக்க நடவடிக்கை எடுக்கப்பட்டுள்ளதுடன், பரிவர்த்தனைக்குக் பயன்படுத்தப்பட்ட ஐபி முகவரிகளைத் தடயவியல் நிபுணர்கள் மூலம் கண்டறியும் முயற்சியும் மேற்கொள்ளப்பட்டு வருகிறது. இதற்கிடையில், அரசின் சைபர் பாதுகாப்பு மற்றும் நிர்வாக மேற்பார்வை குறித்து எதிர்க்கட்சிகள் கடுமையான விமர்சனங்களை முன்வைத்துள்ளதால், இச்சம்பவம் அரசியல் ரீதியாகவும் சூடுபிடித்துள்ளது.









