மேட்டுப்பாளையம் - அவிநாசி சாலை விரிவாக்கம்: இரண்டு மாதங்களாக தேங்கியுள்ள பணிகளால் வாகன ஓட்டிகள் அவதி

மேட்டுப்பாளையம் - அவிநாசி நான்கு வழிச்சாலை விரிவாக்கப் பணிகள் கடந்த இரண்டு மாதங்களாக கிடப்பில் உள்ளதால் பொதுமக்கள் அவதிப்படுகின்றனர்.

கோயம்புத்தூர் மாவட்டத்தில் மேட்டுப்பாளையத்தை அவிநாசியுடன் இணைக்கும் சுமார் 38 கிலோமீட்டர் நீளமுள்ள சாலை, இருவழிச்சாலையிலிருந்து நான்கு வழிச்சாலையாக தரம் உயர்த்தும் பணி தீவிரமாக நடைபெற்று வந்தது. இதற்காக அந்தப் பாதையில் அமைந்துள்ள பாலங்களை அகலப்படுத்துதல் மற்றும் புதிய பாலங்கள் கட்டுதல் போன்ற முக்கிய உள்கட்டமைப்பு பணிகள் மேற்கொள்ளப்பட்டு வருகின்றன. இந்நிலையில், கடந்த இரண்டு மாதங்களாக இந்தப் பணிகள் எந்தவித முன்னெடுப்பும் இன்றி முழுமையாக முடங்கியுள்ளதாக பொதுமக்கள் மற்றும் வாகன ஓட்டிகள் வேதனை தெரிவித்துள்ளனர்.

குறிப்பாக, மேட்டுப்பாளையம் நாடூர் மற்றும் அன்னூர் சாலையில் உள்ள அரசு கலைக் கல்லூரி சந்திப்பு பகுதிகளில் நடைபெற்று வந்த புதிய பால கட்டுமானப் பணிகள் பாதியில் நிறுத்தப்பட்டுள்ளன. நாடூர் பகுதியில் பாலத்திற்காக அமைக்கப்பட்ட இரும்பு கம்பிகள் வெட்டவெளியில் துருப்பிடிக்கும் நிலையில் காணப்படுகின்றன. இப்பகுதிகளில் சாலை விரிவாக்கத்திற்காக சுமார் பத்து வீடுகள் ஏற்கனவே இடிக்கப்பட்டு மக்கள் காலி செய்யப்பட்டுள்ளனர். ஆனால், வீடுகள் இடிக்கப்பட்டு பல வாரங்கள் கடந்தும், சாலை விரிவாக்கப் பணிகளில் எந்தவித முன்னேற்றமும் ஏற்படாதது அப்பகுதி மக்கள் மத்தியில் பெரும் அதிருப்தியை ஏற்படுத்தியுள்ளது.

திட்டப்பணியில் ஏற்பட்டுள்ள தாமதம் குறித்து நெடுஞ்சாலைத்துறை அதிகாரிகள் தரப்பில் விளக்கமளிக்கையில், ஒப்பந்ததாரரின் மெத்தனமான செயல்பாடே பணிகளின் தேக்கத்திற்கு காரணம் என்று ஒப்புக்கொள்ளப்பட்டுள்ளது. மேலும், ஏற்கனவே இது தொடர்பாக சம்பந்தப்பட்ட ஒப்பந்ததாரருக்கு உரிய நோட்டீஸ் வழங்கப்பட்டுள்ளதாக உயர் அதிகாரிகள் தெரிவிக்கின்றனர். கட்டுமானத் தொழிலாளர்கள் பலர் பண்டிகை அல்லது சொந்த காரணங்களுக்காகத் தங்கள் சொந்த ஊர்களுக்குச் சென்றுள்ளதாகவும், அவர்கள் விரைவில் பணிக்குத் திரும்புவார்கள் என்றும், அதன்பிறகு சாலை விரிவாக்கப் பணிகள் போர்க்கால அடிப்படையில் மீண்டும் வேகமெடுக்கும் என்றும் அவர்கள் உறுதி அளித்துள்ளனர்.

சாலை விரிவாக்கப் திட்டத்தின் தற்போதைய நிலவரப்படி, முதல் தொகுப்பான அவிநாசி முதல் நால்ரோடு சந்திப்பு வரையிலான பணியில் 90 சதவீதத்திற்கும் அதிகமான பணிகள் முடிக்கப்பட்டுள்ளன. இரண்டாம் தொகுப்பான நால்ரோடு முதல் மேட்டுப்பாளையம் வரையிலான பகுதியில் 72 சதவீத பணிகள் நிறைவடைந்துள்ளன. நில ஆர்ஜிதம் தொடர்பான சில சிறிய பணிகளும் நிலுவையில் இருப்பதாகத் தெரிவிக்கப்பட்டுள்ளது. இருப்பினும், அனைத்து கட்டுமானப் பணிகளையும் வரும் டிசம்பர் மாதத்திற்குள் முழுமையாக முடித்து மக்கள் பயன்பாட்டிற்குக் கொண்டுவர நெடுஞ்சாலைத்துறை அதிகாரிகள் தீவிர இலக்கு நிர்ணயித்துள்ளனர்.