மேட்டூர் அணை திறப்பு: காவிரி டெல்டா பாசனத்திற்காக தண்ணீர் திறந்து வைத்தார் முதல்வர் சி. ஜோசப் விஜய்

மேட்டூர் அணையில் இருந்து காவிரி டெல்டா பாசனத்திற்காக தமிழக முதல்வர் சி. ஜோசப் விஜய் தண்ணீர் திறந்து வைத்தார்.

தமிழக முதல்வர் சி. ஜோசப் விஜய், சேலம் மாவட்டம் மேட்டூரில் உள்ள ஸ்டான்லி நீர்த்தேக்கத்தின் மதகுகளைத் திறந்து வைத்து, காவிரி டெல்டா பாசனத்திற்காகத் தண்ணீர் வெளியேற்றத்தைத் தொடங்கி வைத்தார். முதல்வர் பொறுப்பேற்ற பிறகு, டெல்டா விவசாயிகளின் வாழ்வாதாரமாகத் திகழும் மேட்டூர் அணையைத் திறந்து வைப்பது இதுவே முதல்முறை என்பதால், இந்த நிகழ்வு மிகுந்த முக்கியத்துவம் வாய்ந்ததாகக் கருதப்படுகிறது. இந்த விழாவில் மாநில அமைச்சரவை சகாக்களும் உடனிருந்தனர். அணையின் மதகுகளைத் திறக்கும் பொத்தானை முதல்வர் அழுத்தியபோது, நீர் சீறிப்பாய்ந்து வெளியேறியது. அதனைத் தொடர்ந்து, வெளியேறும் நீரின் மீது பூக்களைத் தூவி அவர் மரியாதை செலுத்தினார்.

இந்த நிகழ்வின்போது, விவசாயிகளின் அடையாளமாகக் கருதப்படும் பச்சை நிறத் துண்டு அணிந்திருந்த முதல்வர், அணையின் வளாகத்தில் கூடியிருந்த விவசாயிகளுடன் கலந்துரையாடினார். அணை நிர்வாகம் மற்றும் பாசன வசதிகள் குறித்த ஆலோசனைகளை விவசாயிகளிடம் கேட்டறிந்த அவர், அவர்களுடன் புகைப்படம் எடுத்துக்கொண்டார். முன்னதாக, சென்னை விமான நிலையத்திலிருந்து தனி விமானம் மூலம் வருகை தந்த அவர், அங்கிருந்து சாலை வழியாக மேட்டூர் வந்தடைந்தார். வரும் வழியெங்கும் திரண்டு நின்றிருந்த பொதுமக்களை உற்சாகமாகச் சந்தித்து, கைகளை அசைத்து அவர் வாழ்த்துகளைப் பரிமாறிக்கொண்டார்.

முதல்வரின் வருகையையொட்டி, மேட்டூர் நகர் மற்றும் சுற்றுப்புற பகுதிகளில் தவெக தொண்டர்கள் மற்றும் பொதுமக்கள் சார்பில் உற்சாகமான வரவேற்பு அளிக்கப்பட்டது. முக்கியச் சாலைகள் மற்றும் சந்திப்புகளில் கட்சி கொடிக்கம்பங்கள், வரவேற்பு பதாகைகள் மற்றும் தோரணங்கள் கட்டப்பட்டிருந்தன. வழிநெடுகிலும் திரண்டிருந்த மக்கள், அவர் மீது பூக்களைத் தூவித் தங்கள் மகிழ்ச்சியை வெளிப்படுத்தினர். மக்களின் இந்த வரவேற்பை முதல்வர் மிகுந்த உற்சாகத்துடன் ஏற்றுக்கொண்டார்.

தமிழகத்தின் நெற்களஞ்சியமாகக் கருதப்படும் தஞ்சாவூர் உள்ளிட்ட சுமார் 12 மாவட்டங்களின் பாசனத் தேவைக்காக இந்தத் தண்ணீர் திறக்கப்பட்டுள்ளது. வழக்கமாக ஜூன் 12-ஆம் தேதி அணை திறக்கப்படுவது வழக்கம் என்றாலும், பருவமழைப் பொய்த்ததாலும், போதிய நீர் இருப்பு இல்லாததாலும் இந்த முறை காலதாமதமாகத் தண்ணீர் திறக்கப்பட்டுள்ளது. செப்டம்பர் 1-ஆம் தேதியன்று மேட்டூர் அணையின் நீர்மட்டம் 120 அடியில், 91.56 அடியாகப் பதிவாகியுள்ளது. இந்தத் தண்ணீர் திறப்பு சுமார் 45 நாட்களுக்குத் தொடரும் என்று எதிர்பார்க்கப்படுகிறது.