குடிநீர் பாட்டில்களில் நுண் பிளாஸ்டிக் ஆபத்து: சென்னை உயர் நீதிமன்றம் முக்கிய எச்சரிக்கை

பிளாஸ்டிக் பாட்டில்களில் உள்ள நுண் பிளாஸ்டிக் துகள்கள் மனித உடலின் செல்களுக்குள் ஊடுருவி பாதிப்பை ஏற்படுத்துவதாக சென்னை உயர் நீதிமன்றம் எச்சரிக்கை விடுத்துள்ளது.

பிளாஸ்டிக் பாட்டில்களில் அடைக்கப்பட்ட குடிநீர் மற்றும் உணவுப் பொருட்களில் கலந்திருக்கும் நுண் பிளாஸ்டிக் துகள்கள் மனித உடலுக்கு ஏற்படுத்தும் பாதிப்புகள் குறித்து சென்னை உயர் நீதிமன்றம் கடும் எச்சரிக்கை விடுத்துள்ளது. இந்த நுண் பிளாஸ்டிக் துகள்கள் மனித உடலின் செல்கள் மற்றும் திசுக்களின் தடைகளைத் தாண்டி இரத்த ஓட்டத்தில் கலந்து உடல் உறுப்புகளைச் சென்றடைவதாக நீதிபதிகள் சுட்டிக்காட்டியுள்ளனர். குறிப்பாக, கர்ப்பிணிப் பெண்களின் நஞ்சுக்கொடி மற்றும் தாய்ப்பாலில் இந்த நுண் பிளாஸ்டிக் துகள்கள் கண்டறியப்பட்டுள்ளது மிகவும் கவலையளிக்கும் விஷயம் என்றும், இது வளரும் கருவைப் பாதிக்கும் அபாயம் உள்ளதால் நிலைமை மிகவும் மோசமாக இருப்பதாக நீதிமன்றம் கருத்து தெரிவித்துள்ளது.

உணவுப் பாதுகாப்பு மற்றும் தர நிர்ணய ஆணையம் (FSSAI) மற்றும் பிளாஸ்டிக் பாட்டில் தயாரிப்பாளர்கள் சங்கங்கள் தாக்கல் செய்த மறுஆய்வு மனுக்களை நீதிபதிகள் என்.சதீஷ்குமார் மற்றும் டி.பரத சக்கரவர்த்தி அடங்கிய அமர்வு தள்ளுபடி செய்துள்ளது. பிளாஸ்டிக் பாட்டில்களில் அடைக்கப்படும் குடிநீர், சர்க்கரை மற்றும் உப்பு ஆகியவற்றில் நுண் அல்லது நானோ பிளாஸ்டிக் துகள்கள் இருப்பது குறித்து எச்சரிக்கை லேபிள்களை கட்டாயமாக்க வேண்டும் என்ற கடந்த பிப்ரவரி 6-ம் தேதி பிறப்பித்த உத்தரவை நீதிமன்றம் மீண்டும் உறுதிப்படுத்தியுள்ளது. நுகர்வோருக்குத் தங்கள் ஆரோக்கியம் குறித்துத் தெரிந்துகொள்ளும் உரிமை உண்டு என்பதைச் சுட்டிக்காட்டிய நீதிபதிகள், ஆரோக்கியம் சார்ந்த முடிவுகளை நுகர்வோர் எடுப்பதற்கு இத்தகைய எச்சரிக்கை அவசியம் என்று வலியுறுத்தியுள்ளனர்.

இந்த துகள்கள் செரிமான மண்டலம், இரத்த ஓட்டம், சிறுநீரகம் மற்றும் இனப்பெருக்க மண்டலங்களில் நீண்டகால பாதிப்புகளையும் புற்றுநோய் அபாயத்தையும் ஏற்படுத்தக்கூடும் என்று பல்வேறு அறிவியல் ஆய்வுகள் உறுதிப்படுத்துவதாக நீதிமன்றம் தெரிவித்துள்ளது. வளரும் நாடுகளில் பாதுகாப்பான குடிநீர் கிடைப்பதில் உள்ள சவால்களைக் கருத்தில் கொள்ளும்போது, வளர்ந்த நாடுகளுடன் ஒப்பிட்டு இந்த விவகாரத்தைப் புறக்கணிக்க முடியாது என்று நீதிபதிகள் திட்டவட்டமாகக் கூறியுள்ளனர். இந்தியாவில் 2024-25 நிதியாண்டில் மட்டும் சுமார் 1.90 மில்லியன் டன் பிளாஸ்டிக் பாட்டில்கள் நுகரப்பட்டுள்ளன, இதில் 92 சதவீதம் பாட்டில்கள் மட்டுமே என்பது குறிப்பிடத்தக்கது.

உணவுப் பாதுகாப்புச் சட்டத்தின் பிரிவு 18-ன் கீழ், பொதுமக்களின் ஆரோக்கியத்திற்கு ஏற்படும் அபாயங்கள் குறித்துத் தெளிவான தகவல்களை வழங்க வேண்டியது உணவுப் பாதுகாப்பு ஆணையத்தின் கடமையாகும். ஆரம்ப நிலையிலேயே நீரில் பிளாஸ்டிக் கலப்பு இருப்பது கண்டறியப்பட்டால், அது குறித்து நுகர்வோருக்குத் தெரிவிக்க வேண்டியது அவசியமானது. எனவே, நுகர்வோர் விழிப்புணர்வுடன் முடிவுகளை எடுக்க வழிவகுக்கும் வகையில், பேக்கேஜிங் செய்யப்பட்ட பொருட்களில் பிளாஸ்டிக் குறித்த எச்சரிக்கையை அச்சிடுவதை உறுதி செய்ய வேண்டும் என்றும் இந்த உத்தரவு வலியுறுத்துகிறது.