ஜனவரி 8-ல் திரைக்கு வரும் மிஸ் மேட்ச்: சின்ன ஊர் இளைஞர்களின் காதலை பேசும் ரொமாண்டிக் காமெடி

சாய் ஸ்ரீநிதி இயக்கத்தில் உருவான மிஸ் மேட்ச் திரைப்படம் ஜனவரி 8-ம் தேதி திரைக்கு வருகிறது.
இயக்குநர் சாய் ஸ்ரீநிதி இயக்கத்தில் உருவாகியுள்ள காதல் கலந்த நகைச்சுவைத் திரைப்படம் 'மிஸ் மேட்ச்'. இப்படம் வரும் ஜனவரி 8-ம் தேதி திரையரங்குகளில் பிரம்மாண்டமாக வெளியாக உள்ளது. சடோயர் தேஜஸ் பப்ளிகேஷன்ஸ் தயாரிப்பு நிறுவனத்தின் கீழ் தேஜஸ் வெங்கடேஷ் இப்படத்தைத் தயாரித்துள்ளார். சிறிய நகரத்தில் வசிக்கும் இளைஞர்களின் கனவுகள், வாழ்க்கைச் சூழல் மற்றும் அவர்களுக்கிடையிலான உறவுகளை மையமாக வைத்து இந்தப் படம் உருவாக்கப்பட்டுள்ளது.
படம் குறித்து இயக்குநர் சாய் ஸ்ரீநிதி கூறுகையில், சரியான நபர்கள் தவறான நேரத்தில் சந்திக்கும்போது என்ன நடக்கிறது என்பதைத் தான் இந்தத் திரைப்படம் பேசுகிறது. காலமும் நேரமும் ஒரு மனிதனின் வாழ்க்கையையும் உறவுகளையும் எப்படித் தீர்மானிக்கிறது என்பதே படத்தின் கருப்பொருள். முன்னதாக வெளியான இப்படத்தின் டீசர் மற்றும் முதல் பாடல் இணையத்தில் ரசிகர்களிடையே நல்ல வரவேற்பைப் பெற்றுள்ளது. தயாரிப்பாளர் தேஜஸ் வெங்கடேஷ் தொழில்நுட்பத்துறையில் பத்து ஆண்டுகள் பணியாற்றிய அனுபவம் கொண்டவர், 2019 முதல் திரைப்படத் தயாரிப்பில் ஈடுபட்டு வரும் நிலையில், இந்தப் படம் தனது சினிமா பயணத்தில் மிகப்பெரிய மைல்கல் என்று தெரிவித்துள்ளார்.
இந்தத் திரைப்படத்தின் படப்பிடிப்பு சிக்கமகளூருவின் பசுமையான மலைப்பகுதிகளில் சுமார் 45 நாட்கள் நடைபெற்றுள்ளது. படத்தில் கௌசிக் கௌடா கதாநாயகனாக நடிக்க, அவருக்கு ஜோடியாக அஸ்விதா ஹெக்டே நடித்துள்ளார். அமிருதா கே.பி. மற்றும் தேஜேஷ் எஸ்.எம். ஆகியோர் முக்கிய கதாபாத்திரங்களில் தோன்றுகின்றனர். இயக்குநர் சாய் ஸ்ரீநிதியுடன் நீண்டகாலமாக குறும்படங்கள் மற்றும் தொழில்நுட்பப் பணிகளில் பணியாற்றிய அனுபவம் கொண்ட கௌசிக் கௌடா, முதன்முறையாக கேமராவிற்கு முன்னால் நடித்துள்ளார். அஸ்விதாவின் எதார்த்தமான நடிப்பும், தேஜேஷின் நகைச்சுவைக் காட்சிகளும் படத்திற்கு கூடுதல் வலு சேர்க்கும் என்று எதிர்பார்க்கப்படுகிறது.
இப்படத்தில் மூத்த நடிகர்களான லட்சுமி சித்தையா, நாகேந்திர ஷா மற்றும் அனிருத்தா ஆச்சார்யா ஆகியோர் முக்கியக் கதாபாத்திரங்களில் நடித்துள்ளனர். இசைக்கு ஜூடா சாண்டி பொறுப்பேற்றுள்ளார். படத்தின் ஒளிப்பதிவை கணேஷ் மஹாபாலா கவனிக்க, படத்தொகுப்பை தீபக் குலால் செய்துள்ளார். சிறிய நகரத்து இளைஞர்களின் எதார்த்தமான வாழ்க்கையைப் பிரதிபலிக்கும் இந்தப் படம், ரசிகர்களுக்கு ஒரு புதிய அனுபவத்தைத் தரும் என்று படக்குழுவினர் நம்பிக்கை தெரிவித்துள்ளனர்.









