கிருஷ்ணகிரி சிறுவன் மாயம்: 24 மணி நேரத்தில் சென்னையில் மீட்ட ஆட்டோ ஓட்டுநர்!

கிருஷ்ணகிரியில் காணாமல் போன 12 வயது சிறுவன், 24 மணி நேரத்திற்குள் சென்னையில் ஆட்டோ ஓட்டுநரின் உதவியால் பத்திரமாக மீட்கப்பட்டான்.

கிருஷ்ணகிரி மாவட்டம் சிங்காரப்பேட்டையைச் சேர்ந்த 12 வயது சிறுவன் டி.சஞ்சய், கடந்த வெள்ளிக்கிழமை மாலை முதல் மாயமான நிலையில், 24 மணி நேரத்திற்குள் சென்னையில் பத்திரமாக மீட்கப்பட்ட சம்பவம் பெரும் நிம்மதியை ஏற்படுத்தியுள்ளது. ஏழாம் வகுப்பு பயின்று வரும் இந்தச் சிறுவன், தனது பள்ளியில் நடந்த காலாண்டுத் தேர்வில் இரண்டு பாடங்களில் தோல்வியடைந்ததால் ஏற்பட்ட பயத்தில் வீட்டை விட்டு வெளியேறியது விசாரணையில் தெரியவந்துள்ளது. தேர்வு மதிப்பெண் பட்டியல் வழங்கப்படாத நிலையில், ஆசிரியர்கள் தனது பெற்றோரை அழைப்பார்கள் என்ற அச்சத்தில் சிறுவன் இந்த முடிவை எடுத்ததாகக் கூறப்படுகிறது.

வீட்டில் டியூசன் செல்வதாகக் கூறிவிட்டு வெளியேறிய சிறுவன், ஊத்தங்கரையிலிருந்து பேருந்து மூலம் சென்னை கோயம்பேட்டிற்கு வந்துள்ளார். சனிக்கிழமை காலை சென்னை வந்தடைந்த சிறுவன், அங்கிருந்து பெரம்பூர் பகுதிக்குச் சென்றான். அன்று மாலை மீண்டும் கோயம்பேடு செல்வதற்காக அவன் ஆட்டோ ஒன்றைத் தேடியபோதுதான், ஆட்டோ ஓட்டுநர் ஒருவரின் கனிவான செயலால் சிறுவனின் இருப்பிடம் கண்டறியப்பட்டது. சிறுவனின் செயல்பாட்டில் சந்தேகம் அடைந்த அந்த ஆட்டோ ஓட்டுநர், அவனிடம் விசாரணை நடத்தியுள்ளார்.

சிறுவனின் பதற்றத்தைக் கவனித்த ஓட்டுநர், உடனடியாக அவனது தந்தையின் தொலைபேசி எண்ணைப் பெற்று அவரைத் தொடர்புகொண்டு விவரத்தைத் தெரிவித்துள்ளார். தகவலறிந்த தந்தை காவல்துறையினருக்கு புகார் அளித்தார். இதனையடுத்து, சிங்காரப்பேட்டை காவல் துறையினர் ஆட்டோ ஓட்டுநரைத் தொடர்புகொண்டு, சிறுவனை புளியந்தோப்பு காவல் நிலையத்தில் ஒப்படைக்குமாறு அறிவுறுத்தினர். ஆட்டோ ஓட்டுநரின் நேர்மையான செயலால் சிறுவன் பாதுகாப்பாக காவல்துறையினரிடம் ஒப்படைக்கப்பட்டான்.

புளியந்தோப்பு காவல் நிலையத்தில் வைக்கப்பட்டிருந்த சிறுவனை, கிருஷ்ணகிரியில் இருந்து விரைந்து வந்த அவனது உறவினர்கள் பெற்றுக்கொண்டனர். இரவு நேரப் பயணத்திற்குப் பிறகு ஞாயிற்றுக்கிழமை காலை சிறுவன் தனது சொந்த ஊரான கிருஷ்ணகிரிக்குத் திரும்பினான். தேர்வு தோல்வியால் ஏற்பட்ட மன அழுத்தத்தினால் வீட்டை விட்டு வெளியேறிய சிறுவனை, பொதுமக்களின் விழிப்புணர்வு மற்றும் காவல்துறையினரின் துரித நடவடிக்கையால் எவ்வித பாதிப்புமின்றி மீட்க முடிந்தது அப்பகுதி மக்களிடையே நெகிழ்ச்சியை ஏற்படுத்தியுள்ளது.