கொளத்தூர் தொகுதி தேர்தல் வெற்றி செல்லாது: சென்னை உயர்நீதிமன்றத்தில் மு.க.ஸ்டாலின் வழக்கு

கொளத்தூர் தொகுதியில் பதிவான வாக்குகளில் குளறுபடிகள் உள்ளதாகக் கூறி, அந்தத் தொகுதியின் தேர்தல் முடிவை எதிர்த்து திமுக தலைவர் மு.க.ஸ்டாலின் சென்னை உயர்நீதிமன்றத்தில் வழக்கு தொடர்ந்துள்ளார்.

தமிழக சட்டமன்றத் தேர்தலில் கொளத்தூர் தொகுதியில் பதிவான வாக்குகளை எண்ணுவதிலும், இயந்திரங்களைச் சரிபார்ப்பதிலும் முறைகேடுகள் நடந்ததாகக் குற்றம் சாட்டி, திமுக தலைவரும் முன்னாள் முதலமைச்சருமான மு.க.ஸ்டாலின் சென்னை உயர்நீதிமன்றத்தில் தேர்தல் வழக்கு ஒன்றைத் தொடர்ந்துள்ளார். இந்தத் தேர்தலில் வெற்றி பெற்றதாக அறிவிக்கப்பட்ட தமிழக வெற்றி கழகத்தின் வேட்பாளர் வி.எஸ்.பாபுவின் வெற்றியை ரத்து செய்ய வேண்டும் என்றும், தன்னை வெற்றி பெற்றவராக அறிவிக்க வேண்டும் என்றும் அவர் தனது மனுவில் கோரியுள்ளார்.

தேர்தல் ஆணையத்தின் அனுமதியுடன், வழக்கறிஞர் என்.ஆர். இளங்கோ தலைமையிலான குழுவினர், சிந்தாதிரிப்பேட்டையில் வைக்கப்பட்டிருந்த மின்னணு வாக்குப்பதிவு இயந்திரங்கள் (EVM) மற்றும் வாக்காளர் சரிபார்ப்பு காகித தணிக்கை (VVPAT) இயந்திரங்களை ஆய்வு செய்தனர். பாரத் எலக்ட்ரானிக்ஸ் நிறுவனத்தின் பொறியாளர் முன்னிலையில் நடந்த இந்த ஆய்வில், வாக்குச்சாவடி எண் 1, 17, 28, 32, 75, 78, 79, 84, 87, 112, 122, 157 மற்றும் 170 ஆகிய மையங்களில் உள்ள இயந்திரங்கள் சோதிக்கப்பட்டன. இந்த ஆய்வின்போது மின்னணு வாக்குப்பதிவு இயந்திரங்களில் பதிவான வாக்குகளுக்கும், VVPAT சீட்டுகளுக்கும் இடையே பொருத்தமின்மை இருப்பது கண்டறியப்பட்டதாக மனுவில் குறிப்பிடப்பட்டுள்ளது.

மொத்தம் ஆறு வாக்குச்சாவடிகளில் இத்தகைய குளறுபடிகள் இருந்ததைச் சுட்டிக்காட்டி, சம்பந்தப்பட்ட தேர்தல் அதிகாரியிடம் இது குறித்து புகார் அளிக்கப்பட்டதாக மு.க.ஸ்டாலின் தெரிவித்துள்ளார். மேலும், தேர்தல் நாளன்று பல வாக்குச்சாவடிகளில் மின்னணு இயந்திரங்கள் சரியாகச் செயல்படவில்லை என்றும், அவற்றில் மென்பொருள் மற்றும் வன்பொருள் தொடர்பான தொழில்நுட்பக் கோளாறுகள் இருந்ததாகவும் மனுவில் குற்றம் சாட்டப்பட்டுள்ளது. தனது புகார்கள் முறையாகப் பரிசீலிக்கப்படவில்லை என்று கூறும் ஸ்டாலின், தேர்தல் அதிகாரிகளின் நடைமுறைகள் குறித்து அதிருப்தி தெரிவித்துள்ளார்.

கொளத்தூர் தொகுதியில் பயன்படுத்தப்பட்ட அனைத்து வாக்குப்பதிவு இயந்திரங்கள் மற்றும் VVPAT இயந்திரங்களை விரிவான மற்றும் வெளிப்படையான முறையில் மறு ஆய்வு செய்ய வேண்டும் என உயர்நீதிமன்றத்தை அவர் கேட்டுக்கொண்டுள்ளார். தேர்தல் முறைகேடுகள் நடந்ததாகக் கூறப்படும் சூழலில், வி.எஸ்.பாபுவின் வெற்றியை ரத்து செய்துவிட்டு, தன்னை வெற்றி பெற்றவராக அறிவிக்க வேண்டும் என்பது ஸ்டாலினின் முக்கிய கோரிக்கையாக உள்ளது. இந்த வழக்கு விரைவில் சென்னை உயர்நீதிமன்றத்தில் விசாரணைக்கு வரும் என எதிர்பார்க்கப்படுகிறது.