கொளத்தூர் தொகுதி தேர்தல் வெற்றி செல்லாது: சென்னை உயர் நீதிமன்றத்தில் மு.க.ஸ்டாலின் வழக்கு

கொளத்தூர் தொகுதியில் பதிவான வாக்குப்பதிவில் முறைகேடு நடந்ததாகக் கூறி, அந்தத் தொகுதியின் தேர்தல் முடிவை ரத்து செய்யக் கோரி சென்னை உயர் நீதிமன்றத்தில் திமுக தலைவர் மு.க.ஸ்டாலின் வழக்கு தொடர்ந்துள்ளார்.

திமுக தலைவரும் முன்னாள் முதலமைச்சருமான மு.க.ஸ்டாலின், கடந்த தேர்தலில் கொளத்தூர் தொகுதியில் பதிவான வாக்குகள் மற்றும் மின்னணு வாக்குப்பதிவு இயந்திரங்களின் செயல்பாடுகளில் பெரும் குளறுபடிகள் நிகழ்ந்துள்ளதாகக் குற்றம் சாட்டி, சென்னை உயர் நீதிமன்றத்தில் தேர்தல் மனுவைத் தாக்கல் செய்துள்ளார். இந்தத் தொகுதியில் வெற்றி பெற்ற தவெக வேட்பாளர் வி.எஸ். பாபுவின் வெற்றியை செல்லாது என்று அறிவிக்க வேண்டும் என்றும், மறு வாக்கு எண்ணிக்கை உள்ளிட்ட சட்டபூர்வ நடவடிக்கைகளை மேற்கொள்ள வேண்டும் என்றும் அவர் தனது மனுவில் வலியுறுத்தியுள்ளார்.

வாக்குப்பதிவு இயந்திரங்களின் கட்டுப்பாட்டு அலகு, வாக்குச்சீட்டு அலகு மற்றும் விவிபேட் (VVPAT) இயந்திரங்களில் பதிவான வாக்குகளுக்கு இடையே பெரும் முரண்பாடுகள் இருப்பதாக ஸ்டாலின் சுட்டிக்காட்டியுள்ளார். குறிப்பாக, 14 வாக்குச்சாவடிகளில் விவிபேட் இயந்திரங்கள் மூலம் அச்சிடப்பட்ட வாக்குச்சீட்டுகள் எங்கு உள்ளன என்பது குறித்த தெளிவான தகவல் இல்லை என்று அவர் குற்றம் சாட்டியுள்ளார். இந்த இயந்திரங்களில் தொழில்நுட்பக் கோளாறுகள் இருந்ததை தேர்தல் அதிகாரிகள் சரிவர கவனிக்கவில்லை என்றும், இது வாக்காளர்களின் நம்பிக்கையை சிதைக்கும் வகையில் அமைந்துள்ளதாகவும் மனுவில் குறிப்பிடப்பட்டுள்ளது.

ஜூலை 29-ஆம் தேதி நடைபெற்ற சரிபார்ப்புப் பணியின் போது பல அதிர்ச்சிகரமான தகவல்கள் வெளியாகியுள்ளன. உதாரணமாக, 28 மற்றும் 75 ஆகிய வாக்குச்சாவடிகளில் இருந்த விவிபேட் இயந்திரங்கள் பாதியிலேயே இயங்காமல் நின்றுவிட்டன. இது குறித்து முறையான தொழில்நுட்ப விளக்கங்கள் எதையும் மாவட்ட தேர்தல் அதிகாரி வழங்கவில்லை. மேலும், 208-வது வாக்குச்சாவடியில் பயன்படுத்தப்பட்ட இயந்திரத்தில், மு.க.ஸ்டாலினின் பெயர் அடங்கிய முதல் வாக்குச்சீட்டு அலகு, கட்டுப்பாட்டு இயந்திரத்தால் கண்டறியப்படவில்லை என்பது பெரும் சந்தேகத்தை ஏற்படுத்தியுள்ளதாகத் தெரிவிக்கப்பட்டுள்ளது.

இந்தத் தேர்தல் முறைகேடுகள் தொடர்பாக தகுந்த விசாரணை நடத்தப்பட வேண்டும் என்று கோரியும், தனது பிரதிநிதியான வழக்கறிஞர் என்.ஆர். இளங்கோ முன்வைத்த ஆட்சேபனைகளை அதிகாரிகள் புறக்கணித்ததாகவும் ஸ்டாலின் குற்றம் சாட்டியுள்ளார். முறையாக விசாரணை நடத்தப்படாமல், ஒருதலைப்பட்சமாக தேர்தல் முடிவு அறிவிக்கப்பட்டதாகவும், இது இயற்கை நீதிக்கு எதிரானது என்றும் அவர் தனது மனுவில் வாதிட்டுள்ளார். கொளத்தூர் தொகுதியில் உள்ள 286 வாக்குப்பதிவு இயந்திரங்களையும் முழுமையாக ஆய்வு செய்து, 100 சதவீதம் விவிபேட் வாக்குச்சீட்டுகளை எண்ணுவதற்கு நீதிமன்றம் உத்தரவிட வேண்டும் என்பதே ஸ்டாலினின் முதன்மையான கோரிக்கையாக உள்ளது.