பண்ருட்டியில் அரங்கேறிய அதிர்ச்சி: பிறந்த குழந்தையை 4.5 லட்சத்திற்கு விற்ற தாய் கைது

பண்ருட்டியில் பிறந்த குழந்தையை 4.5 லட்சம் ரூபாய்க்கு விற்ற தாய் உட்பட நான்கு பேர் மீது வழக்குப்பதிவு செய்யப்பட்டுள்ளது.

கடலூர் மாவட்டம் பண்ருட்டி பகுதியில் பிறந்த குழந்தையை பணத்திற்காக விற்பனை செய்த சம்பவம் பெரும் பரபரப்பை ஏற்படுத்தியுள்ளது. இந்த விவகாரம் தொடர்பாக குழந்தையை பெற்றெடுத்த தாய் உட்பட நான்கு பேர் மீது காவல்துறையினர் வழக்குப்பதிவு செய்து விசாரணை நடத்தி வருகின்றனர். ஆரம்பக்கட்ட விசாரணையில், குழந்தை விற்பனைக்காக 4.5 லட்சம் ரூபாய் கைமாறியுள்ளது உறுதி செய்யப்பட்டுள்ளது. இந்த வழக்கில் தொடர்புடைய ஒருவரை காவல்துறையினர் வியாழக்கிழமை கைது செய்துள்ள நிலையில், மற்றவர்களைத் தேடும் பணி தீவிரப்படுத்தப்பட்டுள்ளது.

காவல்துறை விசாரணையின்படி, அப்துல்லா என்பவரின் மனைவியான மஞ்சு என்ற பாத்திமா, ஒரு காலணி விற்பனை கடையில் பணியாற்றி வந்துள்ளார். அப்போது அந்த கடைக்கு தண்ணீர் விநியோகம் செய்து வந்த ஆட்டோ ஓட்டுநரான ஜாபர்கான் என்பவருடன் அவருக்கு அறிமுகம் ஏற்பட்டுள்ளது. பாத்திமா ஏற்கனவே ஒரு பெண் குழந்தையை வளர்த்து வரும் சூழலில், இரண்டாவது குழந்தையை வளர்ப்பதில் தனக்கு உள்ள சிரமங்களை அவரிடம் பகிர்ந்து கொண்டதாகத் தெரிகிறது. இதன் விளைவாக, பிறந்த குழந்தையை விற்க அவர்கள் இருவரும் திட்டமிட்டுள்ளனர்.

ஜாபர்கானின் வீட்டின் உரிமையாளரான ரேணுகாதேவி என்பவருக்கு திருமணமாகி 11 ஆண்டுகளாக குழந்தை இல்லாமல் இருந்துள்ளது. இவர்களுக்கு இடையிலான திட்டத்தின்படி, பாத்திமா பண்ருட்டி அரசு மருத்துவமனையில் ஆண் குழந்தையைப் பெற்றெடுத்த பிறகு, கடந்த அக்டோபர் 22 ஆம் தேதி அந்த குழந்தையை ரேணுகாதேவியிடம் ஒப்படைத்துள்ளார். இந்த ஒப்பந்தத்தின்படி, குழந்தையை வாங்கியதற்காக ரேணுகாதேவி தரப்பு 4.5 லட்சம் ரூபாயை வழங்கியதாகக் கூறப்படுகிறது. குழந்தையை பெற்றுக் கொண்ட ரேணுகாதேவி தனது கணவர் அருணுடன் வசித்து வருகிறார்.

சம்பவம் நடந்த சில நாட்களுக்குப் பிறகு, பாத்திமா தனது குழந்தையை மீண்டும் தங்களிடம் ஒப்படைக்குமாறு ரேணுகாதேவியிடம் கேட்டுள்ளார். ஆனால், ஏற்கனவே பணம் கொடுத்து குழந்தையை வாங்கிய ரேணுகாதேவி அதனைத் திருப்பித் தர மறுத்துள்ளார். இதனால் ஏற்பட்ட மோதல் மற்றும் வாக்குவாதத்தைத் தொடர்ந்து, பாத்திமா காவல் நிலையத்தில் புகார் அளித்துள்ளார். இந்தப் புகாரின் அடிப்படையில், குழந்தைகள் விற்பனை மற்றும் முறையற்ற பரிவர்த்தனை தொடர்பாக வழக்குப்பதிவு செய்யப்பட்டு, சட்டப்பூர்வ நடவடிக்கைகள் மேற்கொள்ளப்பட்டு வருகின்றன.