மதுரையில் பயங்கரம்: மகனை கொலை செய்து வீட்டிற்குள் புதைத்த தாய் - போலீஸ் விசாரணையில் திடுக்கிடும் தகவல்

மதுரையில் மகனை கொலை செய்து வீட்டிற்குள் புதைத்த தாயார் கைது செய்யப்பட்டு, எலும்புக்கூடு தோண்டி எடுக்கப்பட்டது.

மதுரை மாவட்டம் வரிச்சியூர் பகுதியில் உள்ள ஒரு வீட்டில் இளைஞர் ஒருவரின் எலும்புக்கூடு கண்டெடுக்கப்பட்ட சம்பவம் பெரும் பரபரப்பை ஏற்படுத்தியுள்ளது. உயிரிழந்த நபர் ஜி. ராஜா (30) என அடையாளம் காணப்பட்டுள்ளார். இவர் அப்பகுதியில் உள்ள தனது வீட்டில் தாய் ஜி. அய்யம்மாள் (50) என்பவருடன் வசித்து வந்துள்ளார். ராஜா தனது மனைவியை விட்டுப் பிரிந்த நிலையில், தந்தையின் மறைவுக்குப் பிறகு தாயுடன் வசித்து வந்ததாகக் கூறப்படுகிறது. இந்தச் சூழலில், ராஜா மாயமானதாகப் பல்வேறு தகவல்கள் பரவி வந்தன.

இந்த வழக்கில் திடீர் திருப்பமாக, அய்யம்மாள் கிராம நிர்வாக அலுவலரிடம் நேரில் சென்று சரணடைந்தார். தனது மகன் ராஜாவைத் தான் கொலை செய்து, வீட்டின் கழிப்பறைக்காகத் தோண்டப்பட்ட குழியில் புதைத்ததாக அவர் அதிர்ச்சிகரமான வாக்குமூலத்தை அளித்தார். இதற்கு முன்பாக மகன் எங்கே என்று போலீசார் விசாரித்தபோது, அவர் வெளி மாநிலத்தில் வேலை பார்ப்பதாகக் கூறி வந்த அய்யம்மாளின் முரண்பாடான பதில்கள் போலீசாரின் சந்தேகத்தை வலுப்படுத்தியது. அக்கம் பக்கத்தினரிடமும் அவர் முன்னுக்குப் பின் முரணாகப் பேசியதால் விசாரணை தீவிரப்படுத்தப்பட்டது.

போலீசார் நடத்திய விசாரணையில் அய்யம்மாள் அளித்த வாக்குமூலம் அனைவரையும் உலுக்கியுள்ளது. கடந்த மார்ச் மாதம், ராஜா தன்னை பாலியல் ரீதியாக துன்புறுத்த முயன்றதாகவும், அதிலிருந்து தப்பிப்பதற்காகவே தான் அவரை கொலை செய்ய நேரிட்டதாகவும் அவர் குறிப்பிட்டுள்ளார். ஆத்திரத்தில் தனது மகனைத் தாக்கி கொலை செய்த பிறகு, வீட்டின் உள்ளேயே குழியைத் தோண்டி உடலைப் புதைத்ததாக அவர் தெரிவித்துள்ளார். இந்த வாக்குமூலத்தின் அடிப்படையில், மாவட்ட அதிகாரிகளின் முன்னிலையில் வியாழக்கிழமை அந்த வீட்டின் தரைப்பகுதி தோண்டப்பட்டு எலும்புக்கூடு மீட்கப்பட்டது.

மீட்கப்பட்ட எலும்புக்கூடு மற்றும் பிற தடயங்கள் தடயவியல் ஆய்விற்காக அனுப்பப்பட்டுள்ளன. இந்தச் சம்பவம் அப்பகுதியில் பெரும் அதிர்ச்சியை ஏற்படுத்தியுள்ள நிலையில், சட்டப்பூர்வ நடவடிக்கைகளுக்குப் பிறகு உடலின் எஞ்சிய பாகங்கள் இறுதிச் சடங்கிற்காகக் குடும்பத்தினரிடம் ஒப்படைக்கப்பட்டன. தொடர்ந்து இந்த விவகாரம் குறித்து போலீசார் தீவிர விசாரணை நடத்தி வருகின்றனர். ஒரு தாயே தன் மகனைக் கொலை செய்த சம்பவம் அப்பகுதி மக்களிடையே பெரும் சோகத்தையும் அதிர்ச்சியையும் ஏற்படுத்தியுள்ளது.