முதுமலையில் நடந்த முப்பக்க வனத்துறை அதிகாரிகள் ஆலோசனைக் கூட்டம்: வனவிலங்கு பாதுகாப்பு மற்றும் கண்காணிப்பு தீவிரப்படுத்த முடிவு

நீலகிரி முதுமலை புலிகள் காப்பகத்தில் தமிழ்நாடு, கேரளா மற்றும் கர்நாடக மாநில வனத்துறை அதிகாரிகள் இடையிலான ஒருங்கிணைப்பு கூட்டம் நடைபெற்றது.

தமிழ்நாடு, கேரளா மற்றும் கர்நாடகா ஆகிய மாநிலங்களைச் சேர்ந்த புலிகள் காப்பகங்களின் உயர் அதிகாரிகள், வனவிலங்குகள் மற்றும் வனப்பகுதிகளைப் பாதுகாப்பதற்கான ஒருங்கிணைந்த நடவடிக்கைகளை மேற்கொள்ள நீலகிரி மாவட்டத்தில் உள்ள முதுமலை புலிகள் காப்பகத்தில் சந்தித்துப் பேசினர். தேசிய புலிகள் பாதுகாப்பு ஆணையத்தின் வழிகாட்டுதல்களின்படி ஏற்பாடு செய்யப்பட்டிருந்த இந்த ஆலோசனைக் கூட்டம், தேப்பாக்காடு வரவேற்பு மையத்தில் நடைபெற்றது. மூன்று மாநிலங்களுக்கு இடையே தகவல் பரிமாற்றத்தை வலுப்படுத்துவதும், எல்லைப் பகுதிகளில் உள்ள வனப்பகுதிகளைப் பாதுகாப்பதும் இந்த சந்திப்பின் முதன்மை நோக்கமாகும்.

சுமார் மூன்று மணி நேரத்திற்கும் மேலாக நடைபெற்ற இந்த ஆலோசனைக் கூட்டத்தில், கள இயக்குநர்கள், துணை இயக்குநர்கள், உயிரியலாளர்கள் மற்றும் வனச்சரக அலுவலர்கள் பங்கேற்றனர். இவர்களுக்கு இடையே உடனடி தகவல் தொடர்பை ஏற்படுத்த, பிரத்யேகமான வாட்ஸ்அப் குழு ஒன்றை உருவாக்க முடிவு செய்யப்பட்டுள்ளது. இதன் மூலம் காட்டுத்தீ சம்பவங்கள், வனவிலங்குகளுக்கு ஏற்படும் நோய்த்தொற்றுகள் மற்றும் வேட்டை தடுப்பு தொடர்பான தகவல்களை உடனுக்குடன் பகிர்ந்து கொள்ள முடியும். மேலும், வரவிருக்கும் கோடைக் காலத்தைக் கருத்தில் கொண்டு, தமிழ்நாடு-கேரளா மற்றும் தமிழ்நாடு-கர்நாடகா எல்லைப் பகுதிகளில் கூட்டுத் தீத்தடுப்பு கோடுகளை உருவாக்குவது குறித்து ஆலோசிக்கப்பட்டது.

வேட்டை தடுப்பு நடவடிக்கைகள் குறித்து விவாதித்த அதிகாரிகள், யானைகளின் தந்தங்கள் மற்றும் புலிகளின் தோல் கடத்தலில் ஈடுபடும் கும்பல்களைக் கண்காணிப்பதற்கான உளவுத் தகவல்களைப் பரிமாறிக்கொள்ள ஒப்புக்கொண்டனர். மூன்று மாநிலங்களுக்கும் இடையிலான வேட்டையாடும் கும்பல்களின் தொடர்பைக் கண்டறிந்து, அவர்களைக் கூண்டோடு பிடிக்கத் தேவையான நடவடிக்கைகளை மேற்கொள்ளவும் திட்டமிடப்பட்டுள்ளது. இதேபோல், ஆந்த்ராக்ஸ் போன்ற நோய்த்தொற்றுகள் வனவிலங்குகளுக்குப் பரவாமல் தடுக்க, முன்னெச்சரிக்கை நடவடிக்கைகளை மேற்கொள்ளவும் தடுப்பூசி செலுத்துவது குறித்தும் கூட்டத்தில் விரிவாக விவாதிக்கப்பட்டது.

புலிகளின் எண்ணிக்கையைக் கணக்கெடுப்பது மற்றும் கழுகுகளின் மக்கள் தொகை கண்காணிப்பு போன்றவற்றிலும் ஒருங்கிணைந்து செயல்பட அதிகாரிகள் முடிவெடுத்துள்ளனர். வனவிலங்குகளின் வாழ்விடங்களுக்கு அச்சுறுத்தலாக விளங்கும் ஆக்கிரமிப்பு தாவரங்களை அகற்றும் பணிகள் குறித்தும் ஆலோசிக்கப்பட்டது. முதுமலை புலிகள் காப்பக கள இயக்குநர் கிருபா சங்கர், வயநாடு வனவிலங்கு சரணாலய வனக்காப்பாளர் வெங்கடேஸ்வரன் மற்றும் பந்திப்பூர் புலிகள் காப்பக இயக்குநர் நந்தீஷ் எல் உள்ளிட்ட பல உயர் அதிகாரிகள் இந்த முக்கியமான கூட்டத்தில் பங்கேற்றனர். வரும் மாதங்களில் இதேபோன்ற ஒருங்கிணைப்புக் கூட்டங்கள் கேரளா மற்றும் கர்நாடகாவிலும் நடைபெறும் என்று தெரிவிக்கப்பட்டுள்ளது.