மேட்டூர் அருகே மர்ம விலங்கு நடமாட்டம்: ஆடுகள், கன்றுகள் பலியானதால் கிராம மக்கள் அச்சம்

மேட்டூர் அருகே உள்ள கண்ணமூச்சி கிராமத்தில் மர்ம விலங்கு தாக்கியதில் கால்நடைகள் உயிரிழந்ததால் வனத்துறையினர் கூண்டுகள் அமைத்து கண்காணிப்பு.

மேட்டூர் அருகே உள்ள கொளத்தூர் பகுதியில் அமைந்துள்ள கண்ணமூச்சி கிராமத்தில் மர்மமான முறையில் கால்நடைகள் உயிரிழந்து வருவது அப்பகுதி விவசாயிகள் மற்றும் பொதுமக்கள் மத்தியில் பெரும் அச்சத்தை ஏற்படுத்தியுள்ளது. கடந்த சில நாட்களாக இப்பகுதியில் பத்து ஆடுகள், இரண்டு கன்றுகள் மற்றும் பல தெருநாய்கள் மர்ம விலங்கால் வேட்டையாடப்பட்டு உயிரிழந்த நிலையில் கண்டெடுக்கப்பட்டுள்ளன. இந்தத் தொடர் உயிரிழப்புகளால் இப்பகுதி மக்கள் தங்கள் வளர்ப்புப் பிராணிகளைப் பாதுகாப்பதில் பெரும் சிரமத்திற்கு உள்ளாகியுள்ளனர்.

சம்பவம் குறித்து தகவல் அறிந்த மேட்டூர் வனச்சரக அலுவலர் செங்கோட்டையன் தலைமையிலான குழுவினர் நேரில் ஆய்வு மேற்கொண்டனர். இது தொடர்பாக அவர் தெரிவிக்கையில், இப்பகுதியில் சிறுத்தை ஒன்று நடமாடுவதற்கான வாய்ப்புகள் அதிகம் உள்ளதாக சந்தேகிக்கப்படுகிறது. ஈரோடு வனப்பகுதியிலிருந்து இடம்பெயர்ந்து வந்திருக்கக்கூடிய அந்தச் சிறுத்தை, காடுகளுக்குள் போதுமான இரைகள் கிடைக்காத சூழலில், அருகில் உள்ள விளைநிலங்களுக்குள் நுழைந்து கால்நடைகளை வேட்டையாடியிருக்கலாம் என்று வனத்துறை அதிகாரிகள் கருதுகின்றனர். கண்ணமூச்சி கிராமத்தைச் சுற்றி சுமார் 717 ஹெக்டேர் பரப்பளவில் வனப்பகுதி அமைந்துள்ளதும் இதற்கு ஒரு காரணமாகப் பார்க்கப்படுகிறது.

விலங்கின் நடமாட்டத்தைக் கண்காணிக்கவும், அதனை விரைவாகப் பிடிக்கவும் வனத்துறையினர் தீவிர நடவடிக்கைகளைத் தொடங்கியுள்ளனர். அந்த விலங்கை உயிருடன் பிடிப்பதற்காக கிராமத்தின் ஐந்து முக்கிய இடங்களில் வனத்துறையினரால் பிரத்யேக இரும்பு கூண்டுகள் வைக்கப்பட்டுள்ளன. மேலும், விலங்கு அடிக்கடி நடமாடும் இடங்களைக் கண்டறிய வனத்துறை சார்பில் நவீன கண்காணிப்பு கேமராக்கள் ஆங்காங்கே பொருத்தப்பட்டுள்ளன. இதன் மூலம் விலங்கின் அசைவுகளை வனத்துறை அலுவலர்கள் தொடர்ந்து கண்காணித்து வருகின்றனர்.

வனத்துறை அதிகாரிகள் மற்றும் பணியாளர்கள் கொண்ட குழுவினர் இரவு பகலாகக் கண்ணமூச்சி கிராமத்தைச் சுற்றியுள்ள பகுதிகளில் தீவிர ரோந்துப் பணிகளில் ஈடுபட்டு வருகின்றனர். கால்நடைகளின் உயிரிழப்பைத் தடுக்கவும், மீண்டும் இத்தகைய சம்பவங்கள் நடைபெறாமல் இருக்கவும் அனைத்து முன்னெச்சரிக்கை நடவடிக்கைகளும் மேற்கொள்ளப்பட்டு வருவதாக வனத்துறை தரப்பில் தெரிவிக்கப்பட்டுள்ளது. இப்பகுதி மக்கள் மிகுந்த கவனத்துடன் இருக்குமாறும், வனத்துறையினரின் அறிவுறுத்தல்களைப் பின்பற்றுமாறும் கேட்டுக்கொள்ளப்பட்டுள்ளனர்.