சர்வதேச அங்கீகாரம் பெற்ற நாகை காமேஸ்வரம் கடற்கரை: சுற்றுச்சூழல் மற்றும் சுற்றுலா மேம்பாட்டில் புதிய மைல்கல்

நாகப்பட்டினம் மாவட்டம் காமேஸ்வரம் கடற்கரை சர்வதேச ப்ளூ ஃபிளாக் அங்கீகாரம் பெற்று உலக சுற்றுலா வரைபடத்தில் இடம் பிடித்துள்ளது.
நாகப்பட்டினம் மாவட்டம் கீழையூர் வட்டாரத்தில் அமைந்துள்ள காமேஸ்வரம் கடற்கரைக்கு, 2026-27ஆம் ஆண்டிற்கான சர்வதேச 'ப்ளூ ஃபிளாக்' (Blue Flag) அங்கீகாரம் கிடைத்துள்ளது. டென்மார்க்கை தளமாகக் கொண்ட சுற்றுச்சூழல் கல்வி அறக்கட்டளை (FEE) இந்த கௌரவமான சான்றிதழை வழங்கியுள்ளது. சுற்றுச்சூழல் தரம், பாதுகாப்பு நடவடிக்கைகள் மற்றும் பார்வையாளர்களுக்கான வசதிகள் ஆகியவற்றின் அடிப்படையில் இந்த கடற்கரை தேர்ந்தெடுக்கப்பட்டுள்ளது. தமிழகத்தில் இந்த ஆண்டு ப்ளூ ஃபிளாக் அந்தஸ்து பெற்ற மூன்று கடற்கரைகளில் ஒன்றாக காமேஸ்வரம் கடற்கரை திகழ்வது குறிப்பிடத்தக்கது.
இந்தத் திட்டம் சுமார் 3.56 கோடி ரூபாய் மதிப்பீட்டில் ப்ளூ ஃபிளாக் கடற்கரை மேம்பாட்டுத் திட்டத்தின் கீழ் செயல்படுத்தப்பட்டது. கடந்த மார்ச் மாதம் பொதுமக்கள் பயன்பாட்டிற்காகத் திறந்து வைக்கப்பட்ட இந்த கடற்கரை, சுமார் 300 மீட்டர் நீளமுள்ள பகுதியில் அமைந்துள்ளது. இதில் 100 மீட்டர் நீளம் பார்வையாளர்களுக்கான அடிப்படை வசதிகளைக் கொண்ட பகுதியாகவும், மீதமுள்ள 200 மீட்டர் மணல் திட்டுகளைப் பாதுகாக்கும் பகுதியாகவும் பிரிக்கப்பட்டுள்ளது. இங்கு கழிப்பறைகள், உடை மாற்றும் அறைகள், குடிநீர் வசதி, நடைபாதைகள், கண்காணிப்பு கோபுரங்கள் மற்றும் முதலுதவி வசதிகள் போன்ற நவீன உள்கட்டமைப்புகள் உருவாக்கப்பட்டுள்ளன.
காமேஸ்வரம் கடற்கரை திறக்கப்பட்ட பிறகு சுற்றுலாப் பயணிகளின் வருகை தொடர்ந்து அதிகரித்து வருகிறது. புள்ளிவிவரங்களின்படி, கடந்த மே மாதம் முதல் செப்டம்பர் மாதம் வரை சுமார் 1,18,579 சுற்றுலாப் பயணிகள் இந்த கடற்கரைக்கு வருகை புரிந்துள்ளனர். இதில் 1,01,731 பெரியவர்களும், 16,878 குழந்தைகளும் அடங்குவர். சுற்றுலாப் பயணிகளின் வரவேற்பைப் பொறுத்தவரை, செப்டம்பர் மாதம் அதிகப்படியாக 26,642 பேர் வருகை தந்துள்ளனர். நாகப்பட்டினம் மாவட்டம் ஏற்கனவே வேளாங்கண்ணி போன்ற ஆன்மீகத் தலங்களால் உலகப் புகழ்பெற்ற நிலையில், தற்போது இந்த சுற்றுச்சூழல் சுற்றுலாத் தளம் மாவட்டத்தின் சுற்றுலா வாய்ப்புகளை மேலும் விரிவுபடுத்தும் என்று எதிர்பார்க்கப்படுகிறது.
காமேஸ்வரம் கடற்கரைக்கான ப்ளூ ஃபிளாக் சீசன் வரும் டிசம்பர் 15ஆம் தேதி தொடங்கப்பட உள்ளது. இந்த சர்வதேச அங்கீகாரத்தைக் கொண்டாடும் விதமாக முறையான கொடி ஏற்றும் விழா விரைவில் நடைபெறும் என மாவட்ட நிர்வாகம் தெரிவித்துள்ளது. இது குறித்து பேசிய மாவட்ட ஆட்சியர் கே.ஜே. பிரவீன் குமார், இந்த சாதனை சுற்றுச்சூழல் நிலைத்தன்மை, தூய்மை மற்றும் பொறுப்பான சுற்றுலா மேலாண்மைக்கு மாவட்ட நிர்வாகம் அளிக்கும் முக்கியத்துவத்தை உணர்த்துகிறது என்று குறிப்பிட்டார். மேலும், இந்த வெற்றிக்கு அரசுத் துறைகள், மீனவ சமூகத்தினர் மற்றும் உள்ளூர் மக்கள் என அனைவரின் பங்களிப்பும் முக்கியமானது என்று அவர் தெரிவித்தார்.









